സാമൂഹികവുമായ വിവിധ ആക്ഷേപങ്ങൾക്കിടയിലാണ് സക്കർബർഗ് ഇത്തരം നിർണ്ണായക നീക്കങ്ങളിലൂടെ അമേരിക്കയിൽ തന്റെ സ്വാധീനം ഉറപ്പിക്കുന്നത്. പ്ലാറ്റ്‌ഫോമുകളിലെ ഉള്ളടക്കം കാരണം ഉണ്ടായ തിരിച്ചടികളും പരാജയപ്പെട്ട കോടതി കേസുകളും സൃഷ്ടിച്ച തരിച്ചടികൾക്കിടയിലും ഭരണകൂടവുമായുള്ള ബന്ധം മെച്ചപ്പെടുത്തി കമ്പനിയുടെ സ്ഥാനം സുരക്ഷിതമാക്കാൻ അദ്ദേഹം നേരിട്ട് രംഗത്തിറങ്ങുകയായിരുന്നു.

ദേശീയ മാധ്യമമായ സിഎൻഎൻ റിപ്പോർട്ടുകളുടെ അടിസ്ഥാനത്തിൽ ഈ രാഷ്ട്രീയ തിരിച്ചുവരവിന് പിന്നിൽ വർഷങ്ങൾ നീണ്ട ആസൂത്രിതമായ തന്ത്രങ്ങളും സക്കർബർഗിന്റെ വ്യക്തിപരമായ മേക്കോവറും വലിയ പങ്കുവഹിച്ചിട്ടുണ്ട്. പണ്ടത്തെ ഹൂഡി ധരിച്ച ലളിതമായ രൂപത്തിൽ നിന്നും മാറി, കഠിനമായ കായിക പരിശീലനങ്ങളിലൂടെയും പ്രൊഫഷണൽ ഹെയർ സ്റ്റൈലിസ്റ്റുകളുടെ സഹായത്തോടെയും കൂടുതൽ ഗാംഭീര്യമുള്ള ഒരു ശാരീരിക രൂപത്തിലേക്ക് സക്കർബർഗ് മാറിയത് ട്രംപിന്റെയും സഹായികളുടെയും പ്രത്യേക ശ്രദ്ധയാകർഷിച്ചു. അതിനൊപ്പം ട്രംപിനൊപ്പം മിക്സഡ് ആയോധനകലാ മത്സരങ്ങൾ നേരിട്ട് വീക്ഷിക്കാനും ട്രംപുമായി നേരിട്ടും ഫോൺ വഴിയും സ്ഥിരമായി ആശയവിനിമയം നടത്താനും സക്കർബർഗ് മുൻകൈ എടുത്തു. തിരഞ്ഞെടുപ്പിന് മുൻപ് ട്രംപിനെ പിന്തുണച്ചുകൊണ്ട് മറ്റൊരു വ്യവസായിയായ ഈലോൺ മസ്‌ക് നേടിയ വലിയ രാഷ്ട്രീയ മേൽക്കോയ്മയെ സക്കർബർഗ് ശ്രദ്ധയോടെ നിരീക്ഷിച്ചിരുന്നു. സർക്കാരിന്റെ തീരുമാനങ്ങളിൽ സ്വാധീനം ചെലുത്തണമെങ്കിൽ ഭരണകൂടവുമായുള്ള ബന്ധങ്ങൾ മെച്ചപ്പെടുത്തേണ്ടത് അത്യന്താപേക്ഷിതമാണെന്ന് അദ്ദേഹം തിരിച്ചറിഞ്ഞു. ഇതിനായി വൈറ്റ് ഹൗസിലെ നിർണ്ണായക ബോൾറൂം പ്രോജക്റ്റുകൾക്ക് സാമ്പത്തിക സഹായം നൽകിയും, ട്രംപിന്റെ സ്ഥാനാരോഹണ ചടങ്ങിലേക്ക് ഒരു മില്യൺ ഡോളർ സംഭാവന ചെയ്തും, കമ്പനിക്കെതിരെ ചുമത്തിയ മുൻകാല കേസുകളിൽ കോടിക്കണക്കിന് ഡോളറിന്റെ സാമ്പത്തിക ഒത്തുതീർപ്പുകൾക്ക് തയ്യാറായും സക്കർബർഗ് വഴി തുറന്നു.

അതോടൊപ്പം കമ്പനിക്കുള്ളിൽ വരുത്തിയ ചില തന്ത്രപ്രധാനമായ നേതൃമാറ്റങ്ങളും മെറ്റയും റിപ്പബ്ലിക്കൻ പാർട്ടിയും തമ്മിലുള്ള ബന്ധം കൂടുതൽ ഊഷ്മളമാക്കി. അമേരിക്കയിലെ നയതന്ത്ര കാര്യങ്ങൾ ഏകോപിപ്പിക്കുന്നതിന് മുൻ നിരയിലുണ്ടായിരുന്ന നേതൃത്വത്തെ മാറ്റി പകരം ദീർഘകാല റിപ്പബ്ലിക്കൻ പ്രവർത്തകനായ ജോയൽ കപ്ലാനെയും, പിന്നീട് ട്രംപിന്റെ വിശ്വസ്തയും മുൻ ഭരണകൂടത്തിലെ ഉന്നത ഉദ്യോഗസ്ഥയുമായിരുന്ന ദിന പവൽ മക്കോർമിക്കിനെയും സുപ്രധാന പദവികളിൽ സക്കർബർഗ് നിയമിച്ചു. ഒപ്പം, തങ്ങളുടെ പ്ലാറ്റ്‌ഫോമുകളിൽ യാഥാസ്ഥിതിക ആശയങ്ങളെ തടയുന്നു എന്ന പരാതി പരിഹരിക്കാൻ ഉള്ളടക്ക നിയന്ത്രണ നയങ്ങളിൽ വലിയ തിരുത്തലുകൾ വരുത്താനും കമ്പനി തയ്യാറായി. ഈ വിപ്ലവകരമായ മാറ്റങ്ങൾ ഭരണകൂടവുമായുള്ള വഴി അടയാതെ സൂക്ഷിക്കാൻ സഹായിച്ചു. ചരിത്രപരമായ എഐ കരാറുകൾ ലളിതമാക്കാനും മറ്റ് ഉന്നത വ്യവസായികളെ ഇതിന്റെ ഭാഗമാക്കാനും സക്കർബർഗ് മുൻകൈ എടുത്തു. സാങ്കേതികവിദ്യയുടെ വേഗത്തിലുള്ള വികസനത്തിന് തടസ്സമാകുന്ന കർശനമായ നിയമങ്ങൾ ഒഴിവാക്കുക എന്നതായിരുന്നു സക്കർബർഗിന്റെയും പ്രധാന ടെക് വ്യവസായികളുടെയും ലക്ഷ്യം. ഇത് ഭരണകൂടത്തിന്റെ വികസന കാഴ്ചപ്പാടുമായി ഒത്തുപോകുന്നതായിരുന്നു.

എന്നാൽ, സക്കർബർഗിന്റെ ഈ അതിവേഗ രാഷ്ട്രീയ ചുവടുമാറ്റം തികച്ചും സുരക്ഷിതമാണെന്ന് പറയാനാകില്ല. ഭാവിയിൽ കോൺഗ്രസിലോ വൈറ്റ് ഹൗസിലോ രാഷ്ട്രീയമായ അധികാരമാറ്റങ്ങൾ സംഭവിച്ചാൽ മെറ്റ ഇപ്പോൾ പിന്തുടരുന്ന ഈ തീവ്ര റിപ്പബ്ലിക്കൻ അനുകൂല നിലപാട് വലിയ തിരിച്ചടിയാകുമെന്ന് ഡെമോക്രാറ്റിക് നേതാക്കൾ മുന്നറിയിപ്പ് നൽകുന്നുണ്ട്. കമ്പനിയുടെ രാഷ്ട്രീയ സംഭാവനകളെക്കുറിച്ചും ആനുകൂല്യങ്ങളെക്കുറിച്ചും ഇതിനകം തന്നെ ഉന്നത തലത്തിലുള്ള അന്വേഷണ ആവശ്യങ്ങൾ ഉയർന്നു കഴിഞ്ഞു. താൽക്കാലികമായി ഭരണകൂടത്തിന്റെ പിന്തുണ നേടാൻ സാധിച്ചെങ്കിലും, ആഗോളതലത്തിൽ ഉയരുന്ന സുരക്ഷാ ആശങ്കകൾക്കും രാഷ്ട്രീയ അസ്ഥിരതകൾക്കും നടുവിൽ അമേരിക്കയിലെ ഈ പുതിയ സ്വാധീനം എത്രത്തോളം നീണ്ടുനിൽക്കുമെന്ന ചോദ്യം സാങ്കേതിക ലോകത്തും രാഷ്ട്രീയ വൃത്തങ്ങളിലും സജീവമായി നിലനിൽക്കുകയാണ്.