ഇന്ത്യൻ സമ്പദ്‌വ്യവസ്ഥയുടെ വളർച്ചാ കണക്കുകളെച്ചൊല്ലിയുള്ള സംശയങ്ങളും വിമർശനങ്ങളും തള്ളി ലോകബാങ്ക് എക്സിക്യൂട്ടീവ് ഡയറക്ടർ നീലകണ്ഠ് മിശ്ര. നിലവിലെ ഉയർന്ന വളർച്ചാ നിരക്കുകൾ അടിത്തട്ടിലെ യാഥാർത്ഥ്യവുമായി പൊരുത്തപ്പെടുന്നില്ലെന്ന വാദങ്ങൾക്ക് അടിസ്ഥാനമില്ലെന്നും, വിവിധ സാമ്പത്തിക സൂചകങ്ങൾ രാജ്യം അതിവേഗം മുന്നേറുന്നതിന്റെ തെളിവുകൾ നൽകുന്നുണ്ടെന്നും അദ്ദേഹം വ്യക്തമാക്കി.

 ഏപ്രിൽ-ജൂൺ പാദത്തിൽ 7.8 ശതമാനം വളർച്ച രേഖപ്പെടുത്തിക്കൊണ്ട് ലോകത്തിലെ ഏറ്റവും വേഗത്തിൽ വളരുന്ന വലിയ സമ്പദ്‌വ്യവസ്ഥയായി ഇന്ത്യ തുടരുകയാണ്. മുൻ പാദങ്ങളെ അപേക്ഷിച്ച് നിരക്കിൽ മാറ്റങ്ങൾ വന്നിട്ടുണ്ടെങ്കിലും, ഔദ്യോഗിക ജിഡിപി കണക്കുകൾക്കപ്പുറം വാഹന വിൽപന, സിമന്റ് ഉപഭോഗം, ബാങ്ക് വായ്പകളുടെ വർദ്ധനവ് തുടങ്ങിയ സൂചകങ്ങൾ മികച്ച വളർച്ചയാണ് പ്രകടമാക്കുന്നത്.

കോവിഡ് മഹാമാരിക്ക് ശേഷമുള്ള സാമ്പത്തിക വീണ്ടെടുക്കൽ പൂർണ്ണതോതിൽ എത്തിയിട്ടില്ലാത്തതിനാലാണ് ചില മേഖലകളിൽ ഈ വളർച്ചയുടെ സ്വാധീനം സാധാരണക്കാർക്ക് അനുഭവപ്പെടാത്തതെന്ന് മിശ്ര വിശദീകരിച്ചു. രാജ്യത്തെ മൂലധന നിക്ഷേപം എക്കാലത്തെയും ഉയർന്ന നിലയിലെത്തിയിട്ടുണ്ടെന്നും വിദേശ നിക്ഷേപത്തിൽ കഴിഞ്ഞ 15 വർഷത്തിനിടയിലെ ഏറ്റവും വലിയ കുതിപ്പാണ് രേഖപ്പെടുത്തിയിരിക്കുന്നതെന്നും അദ്ദേഹം ചൂണ്ടിക്കാട്ടി.