അമേരിക്കയും ഇറാനും തമ്മിലുള്ള പുതിയ മെമ്മോറാണ്ടം പശ്ചിമേഷ്യൻ സമ്പദ്‌വ്യവസ്ഥയിൽ വൻ മാറ്റങ്ങൾക്ക് തിരികൊളുത്തുന്നു. വർഷങ്ങളായി തുടരുന്ന ഉപരോധങ്ങൾക്കും നിയന്ത്രണങ്ങൾക്കും അന്ത്യം കുറിച്ചുകൊണ്ട് ഇറാന് തങ്ങളുടെ എണ്ണ, ഇന്ധന കയറ്റുമതി പുനഃരാരംഭിക്കാൻ വഴിയൊരുങ്ങുകയാണ്. ഈ നീക്കത്തിലൂടെ പ്രതിവർഷം 60 ബില്യൺ ഡോളറിലധികം വരുമാനം ഇറാൻ ഖജനാവിലേക്ക് എത്തുമെന്നാണ് റിപ്പോർട്ടുകൾ നൽകുന്ന സൂചന.

യുദ്ധത്തിന് മുമ്പുള്ള ഉൽപാദന നിലവാരവും നിലവിലെ ആഗോള എണ്ണ വിലയും കണക്കിലെടുക്കുമ്പോൾ ഇറാന്റെ സാമ്പത്തിക മേഖലയ്ക്ക് ഇതൊരു വലിയ ഉണർവാകും. വർഷങ്ങളായി കടുത്ത ഉപരോധങ്ങൾ നേരിട്ട ഇറാൻ സർക്കാരിന് ഈ വരുമാന വർദ്ധനവ് നിർണ്ണായകമാണ്. ഈ ആഴ്ച തന്നെ എണ്ണ നിറച്ച നിരവധി ഇറാനിയൻ ടാങ്കറുകൾ അമേരിക്കൻ നാവിക ഉപരോധം മറികടന്ന് തുറമുഖങ്ങളിൽ നിന്ന് പുറപ്പെട്ടതായി റിപ്പോർട്ടുകളുണ്ട്. കയറ്റുമതി പുനരാരംഭിക്കുന്നതിന്റെ വ്യക്തമായ സൂചനയാണിത്.അന്താരാഷ്ട്ര വിപണിയിലേക്ക് ഇറാനിയൻ എണ്ണ വീണ്ടും എത്തുന്നത് ഊർജ്ജ വ്യാപാരികൾക്കിടയിൽ വലിയ ചർച്ചയായിട്ടുണ്ട്. ആഗോള എണ്ണ വിപണിയിൽ ഇതിന്റെ പ്രത്യാഘാതങ്ങൾ എന്തൊക്കെയായിരിക്കുമെന്ന് ഉറ്റുനോക്കുകയാണ് ഷിപ്പിംഗ് ഓപ്പറേറ്റർമാർ. നിർദ്ദിഷ്ട കരാറിലെ കണക്കുകളെക്കുറിച്ച് അമേരിക്കയോ ഇറാനോ ഔദ്യോഗികമായി പ്രതികരിച്ചിട്ടില്ലെങ്കിലും, ഇറാന്റെ വരുമാന വർദ്ധനവ് ഉറപ്പാണെന്ന് വിദഗ്ധർ വിലയിരുത്തുന്നു.

വർഷങ്ങളായി തുടരുന്ന നയതന്ത്ര സമ്മർദ്ദങ്ങൾക്കും പ്രാദേശിക സംഘർഷങ്ങൾക്കും ശേഷം അമേരിക്കയും ഇറാനും തമ്മിലുള്ള സംഘർഷം ലഘൂകരിക്കാനുള്ള വിശാലമായ ശ്രമങ്ങളുടെ ഭാഗമാണ് ഈ ധാരണാപത്രം. എന്തായാലും, ഈ നീക്കം ഇറാന്റെ സമ്പദ്‌വ്യവസ്ഥയെ മാത്രമല്ല, ആഗോള ഊർജ്ജ വിപണിയെ മൊത്തത്തിൽ സ്വാധീനിക്കാൻ പോന്നതാണ്. ആഗോള വിപണിയിലേക്ക് ഇറാനിയൻ ക്രൂഡ് ഓയിൽ മടങ്ങിയെത്തുന്നത് ഊർജ്ജ വിലയിൽ വലിയ മാറ്റങ്ങൾ കൊണ്ടുവരുമോ എന്നാണ് ലോകം ഇപ്പോൾ ഉറ്റുനോക്കുന്നത്. നയതന്ത്ര തലത്തിൽ ഒരു പുതിയ തുടക്കത്തിന് വഴിയൊരുക്കുന്ന ഈ സാമ്പത്തിക കരാർ, പശ്ചിമേഷ്യയിലെ രാഷ്ട്രീയ സമവാക്യങ്ങളെ തന്നെ മാറ്റിമറിക്കാൻ സാധ്യതയുണ്ട്.