ഇറാൻ-ഇസ്രായേൽ യുദ്ധം പശ്ചിമേഷ്യയിൽ പടരുന്നതിനിടയിൽ ആഗോള എണ്ണ വിപണിയിലെ ആശങ്കകളും വ്യാപാര ബന്ധങ്ങളിലെ വിള്ളലുകളും ചർച്ച ചെയ്യാൻ അമേരിക്കൻ പ്രസിഡന്റ് ഡൊണാൾഡ് ട്രംപ് ചൈനയിലേക്ക് തിരിച്ചു. മെയ് 13 മുതൽ മെയ് 15 വരെ നീണ്ടുനിൽക്കുന്ന ഈ മൂന്ന് ദിവസത്തെ സന്ദർശനം, ലോകത്തിലെ ഏറ്റവും വലിയ രണ്ട് സാമ്പത്തിക ശക്തികൾക്കിടയിലുള്ള ബന്ധത്തിൽ അതീവ നിർണ്ണായകമാണ്. ഇൻഡോ-പസഫിക് മേഖലയിലെ രാഷ്ട്രീയ മത്സരവും വിതരണ ശൃംഖലകളിലെ മാറ്റങ്ങളും സന്ദർശനത്തിന്റെ പ്രാധാന്യം വർദ്ധിപ്പിക്കുന്നു.ചൊവ്വാഴ്ച വൈറ്റ് ഹൗസിൽ നിന്ന് യാത്ര തിരിച്ച ട്രംപ് ബുധനാഴ്ച ബീജിംഗിലെത്തും. വ്യാഴം, വെള്ളി ദിവസങ്ങളിലായിരിക്കും ചൈനീസ് പ്രസിഡന്റ് ഷി ജിൻപിംഗുമായുള്ള ഔദ്യോഗിക കൂടിക്കാഴ്ചകൾ. 2025 ഒക്ടോബറിൽ ദക്ഷിണ കൊറിയയിലെ ബുസാനിൽ നടന്ന എപെക് (APEC) ഉച്ചകോടിക്ക് ശേഷം ഇരുവരും നേരിട്ട് കാണുന്ന ആദ്യ അവസരമാണിത്. 2025 ജനുവരി 20-ന് രണ്ടാം തവണ പ്രസിഡന്റായി അധികാരമേറ്റ ശേഷം ട്രംപ് ചൈനയിൽ നടത്തുന്ന ആദ്യ സന്ദർശനം കൂടിയാണിത്.ഇറാൻ സംഘർഷത്തിന് സന്ദർശന വേളയിൽ അമിത പ്രാധാന്യം നൽകില്ലെന്ന് യുഎസ് ഉദ്യോഗസ്ഥർ സൂചിപ്പിച്ചിരുന്നുവെങ്കിലും ട്രംപ് സമ്മിശ്ര പ്രതികരണമാണ് നൽകിയത്. ഷി ജിൻപിംഗുമായി ഇക്കാര്യം വിശദമായി ചർച്ച ചെയ്യുമെന്നും ഇക്കാര്യത്തിൽ അദ്ദേഹം ഇതുവരെ നല്ല രീതിയിലാണ് പ്രതികരിച്ചതെന്നും ട്രംപ് പറഞ്ഞു.എന്നാൽ മിനിറ്റുകൾക്ക് ശേഷം, ഇറാൻ വിഷയം ചർച്ച ചെയ്യേണ്ട കാര്യമില്ലെന്നും സാഹചര്യം പൂർണ്ണമായും നിയന്ത്രണത്തിലാണെന്നും അദ്ദേഹം മാറ്റിപ്പറഞ്ഞു. "ഇറാൻ വിഷയത്തിൽ ആരുടെയും സഹായം ഞങ്ങൾക്ക് ആവശ്യമില്ല, സമാധാനപരമായോ അല്ലാതെയോ ഞങ്ങൾ ജയിക്കും," ട്രംപ് കൂട്ടിച്ചേർത്തു.അതേസമയം, യുഎസ് സ്റ്റേറ്റ് സെക്രട്ടറി മാർക്കോ റൂബിയോയും ട്രഷറി സെക്രട്ടറി സ്കോട്ട് ബെസന്റും ഹോർമുസ് കടലിടുക്ക് വീണ്ടും തുറക്കാൻ ചൈന തങ്ങളുടെ സ്വാധീനം ഉപയോഗിക്കണമെന്ന് സമ്മർദ്ദം ചെലുത്തുന്നുണ്ട്. യുദ്ധം തുടങ്ങുന്നതിന് മുമ്പ് ലോകത്തെ എണ്ണ വിതരണത്തിന്റെ അഞ്ചിലൊന്നും ഈ പാതയിലൂടെയായിരുന്നു കടന്നുപോയിരുന്നത്.വ്യാപാര ബന്ധങ്ങൾ ശക്തിപ്പെടുത്തുക എന്ന ലക്ഷ്യത്തോടെ വൻ ബിസിനസ്സ് പ്രതിനിധി സംഘത്തെയും ട്രംപ് കൂടെ കൂട്ടിയിട്ടുണ്ട്. ടെസ്‌ല സിഇഒ ഇലോൺ മസ്ക്, ആപ്പിൾ സിഇഒ ടിം കുക്ക്, ബോയിംഗ് സിഇഒ കെല്ലി ഓർട്ടർബർഗ് എന്നിവർ ട്രംപിനൊപ്പമുണ്ട്.ഏകദേശം 500 ബോയിംഗ് 737 മാക്സ് വിമാനങ്ങൾ വാങ്ങാനുള്ള വൻ കരാറിൽ ചൈന ഒപ്പിട്ടേക്കുമെന്നാണ് റിപ്പോർട്ടുകൾ. ഇത് യാഥാർത്ഥ്യമായാൽ ഏവിയേഷൻ ചരിത്രത്തിലെ തന്നെ ഏറ്റവും വലിയ വിമാന കരാറായിരിക്കും ഇത്.കാർഷിക ഉൽപ്പന്നങ്ങൾക്കും ഊർജ്ജ വിതരണത്തിനുമായി പുതിയ കരാറുകൾ ഉണ്ടാകുമെന്നും പ്രതീക്ഷിക്കുന്നു. കൂടാതെ, ചൈനയിൽ നിന്നുള്ള അപൂർവ്വ ധാതുക്കളുടെ (Rare earth minerals) വിതരണവുമായി ബന്ധപ്പെട്ട വ്യാപാര ഉടമ്പടി നീട്ടുന്നതിനെക്കുറിച്ചും ചർച്ചകൾ നടന്നേക്കാം.അതേസമയം, ട്രംപിന്റെ മുൻ ചൈന സന്ദർശനങ്ങളിൽ സജീവ സാന്നിധ്യമായിരുന്ന മെലാനിയ ട്രംപ് ഇത്തവണ അദ്ദേഹത്തോടൊപ്പമില്ല.