ലോകത്തിലെ ഏറ്റവും തന്ത്രപ്രധാനമായ സമുദ്രപാതകളിലൊന്നായ ഹോർമുസ് കടലിടുക്കിനെച്ചൊല്ലി ഇറാനും അമേരിക്കയും തമ്മിലുള്ള ശീതയുദ്ധം പുതിയൊരു ഘട്ടത്തിലേക്ക് കടന്നിരിക്കുകയാണ്. ആഗോള എണ്ണവ്യാപാരത്തിന്റെ ജീവനാഡിയായ ഈ ജലപാതയുടെ പൂർണ്ണമായ നിയന്ത്രണം തങ്ങൾക്കാണെന്നും, തങ്ങളുടെ അനുമതിയില്ലാതെ ഒരു കപ്പലിനും ഇതിലൂടെ കടന്നുപോകാനാകില്ലെന്നുമുള്ള ഇറാന്റെ പ്രഖ്യാപനം അന്താരാഷ്ട്ര തലത്തിൽ വലിയ ചർച്ചകൾക്ക് വഴിവെച്ചിരിക്കുന്നു. അമേരിക്കൻ സാമ്രാജ്യത്വത്തിന്റെ ഇടപെടലുകളെ പൂർണ്ണമായും ചെറുക്കാനും മേഖലയിൽ തങ്ങളുടെ പരമാധികാരം ഉറപ്പിക്കാനും ഇറാൻ സ്വീകരിക്കുന്ന കർശനമായ സൈനിക-നിയമ നടപടികൾ പേർഷ്യൻ ഗൾഫിന്റെ ഭാവി തന്നെ മാറ്റിമറിക്കുന്ന ഒന്നാണ്.

ഹോർമുസ് കടലിടുക്കിന്മേൽ ഇറാന് പൂർണ്ണമായ നിയന്ത്രണമുണ്ടെന്നും അവരുടെ സായുധ സേനയുടെ അനുമതിയില്ലാതെ ഒരു കപ്പലിനും ഇതിലൂടെ കടന്നുപോകാൻ സാധിക്കില്ലെന്നും ഇറാന്റെ സൈനിക വക്താവ് മുഹമ്മദ് അക്രമിനിയ വ്യക്തമാക്കിയിരിക്കുന്നത്. കടലിടുക്കിന്റെ നിയന്ത്രണം ഇറാന്റെ “അന്തർലീനമായ അവകാശമാണ്”. വർഷങ്ങളായി ഇറാൻ ഈ അവകാശം പൂർണ്ണമായി പ്രയോഗിച്ചിരുന്നില്ലെങ്കിലും നിലവിലെ സാഹചര്യങ്ങൾ കാരണം ഈ ജലപാതയിലൂടെയുള്ള ഗതാഗതം നിയന്ത്രിക്കാൻ രാജ്യം നിർബന്ധിതരായിരിക്കുകയാണ്.

നിലവിൽ പടിഞ്ഞാറൻ മേഖലയിൽ ഇസ്ലാമിക് റെവല്യൂഷൻ ഗാർഡ് കോർപ്സും, കിഴക്കൻ മേഖലയിൽ ഇറാന്റെ ഔദ്യോഗിക സൈന്യവും ചേർന്നാണ് ഹോർമുസ് കടലിടുക്കിൽ ശക്തമായ കാവൽ ഏർപ്പെടുത്തിയിരിക്കുന്നത്. ഇരു സേനകളുടെയും കൃത്യമായ അനുമതിയില്ലാതെ സുഹൃത് രാജ്യങ്ങൾക്കോ ശത്രുക്കൾക്കോ ഈ വഴിയിലൂടെ സഞ്ചരിക്കാൻ കഴിയില്ല. ഈ തന്ത്രപ്രധാനമായ പാതയിലൂടെയുള്ള ഓരോ കപ്പലിന്റെയും നീക്കം ഇറാൻ സൈന്യം അതീവ ജാഗ്രതയോടെയാണ് നിരീക്ഷിക്കുന്നത്.

ഇറാൻ കടലിടുക്കിൽ ഏർപ്പെടുത്തിയ നിയന്ത്രണങ്ങൾ മൂലം ആഗോള തലത്തിൽ വലിയ പ്രതിസന്ധിയാണ് ഉണ്ടായിരിക്കുന്നത്. വിവിധ രാജ്യങ്ങൾ തങ്ങളുടെ കപ്പലുകൾക്ക് സുരക്ഷിതമായി കടന്നുപോകാൻ അനുമതി നൽകണമെന്ന് ആവശ്യപ്പെട്ട് ഇറാന് അടിയന്തിര കത്തുകളും ടെലക്സുകളും അയക്കുകയാണ്. ഇറാന്റെ പുതിയ നിയന്ത്രണങ്ങൾ കാരണം ലോകത്തെ പല പ്രമുഖ കപ്പൽ കമ്പനികളും ആശങ്കയിലാണ്.

ഇറാനിയൻ പ്രദേശങ്ങൾക്ക് നേരെയുണ്ടായ സംയുക്ത ആക്രമണങ്ങൾക്ക് ശേഷം, ഇസ്രയേലിന്റെയും അമേരിക്കയുടെയും ഉടമസ്ഥതയിലുള്ളതോ അവരുമായി ബന്ധമുള്ളതോ ആയ കപ്പലുകൾക്ക് കടലിടുക്കിലൂടെയുള്ള സുരക്ഷിത ഗതാഗതം ഇറാൻ പൂർണ്ണമായും നിരോധിച്ചു. കഴിഞ്ഞ ഫെബ്രുവരി 28 മുതൽ ഇറാൻ ഈ മേഖലയിൽ തങ്ങളുടെ പിടി മുറുക്കിയിരിക്കുകയാണ്. അമേരിക്കൻ സാമ്രാജ്യത്വത്തിന്റെ ഇടപെടലുകളെ ചെറുക്കുക എന്നതാണ് ഇതിലൂടെ ഇറാൻ ലക്ഷ്യമിടുന്നത്.ഇറാന്റെ പുതിയ പരമോന്നത നേതാവായ മുജ്തബ ഖമേനി, പേർഷ്യൻ ഗൾഫിലും ഹോർമുസ് കടലിടുക്കിലും ഒരു “പുതിയ അധ്യായം” എഴുതിച്ചേർക്കുകയാണെന്ന് പ്രഖ്യാപിച്ചു. വിദേശ ശക്തികളുടെ ദുഷ്ടലാക്കോടെയുള്ള ഇടപെടലുകൾ അവസാനിപ്പിക്കാൻ പുതിയ മാനേജ്മെന്റ് രീതികളും നിയമ ചട്ടക്കൂടുകളും ഇറാൻ കൊണ്ടുവരുമെന്ന് അദ്ദേഹം ഉറപ്പിച്ചു പറഞ്ഞു. ഇത് മേഖലയിലെ മറ്റ് രാജ്യങ്ങളുടെ പുരോഗതിക്കും സുരക്ഷയ്ക്കും അനിവാര്യമാണെന്ന് ഇറാൻ വിശ്വസിക്കുന്നു.

നൂറ്റാണ്ടുകളായി വിദേശ ശക്തികളുടെ, പ്രത്യേകിച്ച് യൂറോപ്യൻ-അമേരിക്കൻ ശക്തികളുടെ അത്യാഗ്രഹത്തിന് പേർഷ്യൻ ഗൾഫ് ഇരയായിട്ടുണ്ടെന്ന് ഇറാൻ വ്യക്തമാക്കുന്നു. ഈ അധിനിവേശങ്ങൾ മേഖലയിൽ അരക്ഷിതാവസ്ഥയും വലിയ സാമ്പത്തിക നഷ്ടങ്ങളും ഭീഷണികളും മാത്രമാണ് വരുത്തിവെച്ചത്. അമേരിക്കയുടെ ഈ ചൂഷണ തന്ത്രങ്ങൾക്കെതിരെയുള്ള ഇറാന്റെ ചെറുത്തുനിൽപ്പ് തുടരുമെന്ന് നേതൃത്വം ആവർത്തിച്ചു.

ഹോർമുസ് കടലിടുക്കിനായി ഇറാൻ ആവിഷ്കരിക്കുന്ന പുതിയ നിയമ ചട്ടക്കൂട് മേഖലയിലെ എല്ലാ രാജ്യങ്ങൾക്കും സന്തോഷവും വികസനവും നൽകുമെന്നാണ് മുജ്തബ ഖമേനിയുടെ വാദം. മേഖലയുടെ സാമ്പത്തിക നേട്ടങ്ങൾ മറ്റ് അയൽ രാജ്യങ്ങൾക്കും കൂടി ഉപകാരപ്പെടുന്ന രീതിയിലായിരിക്കും ഇറാന്റെ ഭാവി നീക്കങ്ങൾ. അമേരിക്കൻ സ്വാധീനത്തിൽ നിന്ന് പൂർണ്ണമായും മോചിതമായ ഒരു മേഖലയാണ് ഇറാൻ വിഭാവനം ചെയ്യുന്നത്.

ഹോർമുസ് കടലിടുക്കിലൂടെ കടന്നുപോകുന്ന കപ്പലുകളിൽ നിന്ന് ടോൾ ഈടാക്കാനുള്ള പുതിയ നടപടികളിലേക്ക് ഇറാൻ കടന്നിട്ടുണ്ട്. തങ്ങളുടെ സമുദ്ര അതിർത്തിയിലൂടെയുള്ള യാത്രയ്ക്ക് പണം ഈടാക്കുന്നത് നിയമപരമാണെന്ന് ഇറാൻ വാദിക്കുമ്പോൾ, ഇതിനെതിരെ അമേരിക്ക പുതിയ സാമ്പത്തിക ഉപരോധങ്ങളുമായി രംഗത്തെത്തി. എന്നാൽ ഈ ഉപരോധങ്ങളെ വകവെക്കാതെ തങ്ങളുടെ സാമ്പത്തിക-സൈനിക താല്പര്യങ്ങൾ സംരക്ഷിക്കാൻ ഇറാൻ മുന്നോട്ട് പോവുകയാണ്.

ഇറാന്റെ കർശനമായ നിയന്ത്രണങ്ങൾക്ക് മറുപടിയായി ഇറാന്റെ തുറമുഖങ്ങളിലേക്കുള്ള കപ്പൽ ഗതാഗതം തടയാൻ അമേരിക്ക ഒരു പ്രത്യാക്രമണ ഉപരോധം ആരംഭിച്ചിട്ടുണ്ട്. ഇറാന്റെ തുറമുഖങ്ങളിലേക്ക് പോകുന്ന കപ്പലുകളെ അമേരിക്കൻ നാവികസേന തടയുകയും വഴിതിരിച്ചുവിടുകയും ചെയ്യുന്നു. ഇത് പേർഷ്യൻ ഗൾഫിൽ വലിയൊരു സൈനിക-സാമ്പത്തിക പ്രതിസന്ധിക്ക് കാരണമായിട്ടുണ്ട്.അമേരിക്കയുടെ കടന്നുകയറ്റങ്ങളിൽ നിന്നും ഭീഷണികളിൽ നിന്നും പൂർണ്ണമായും മുക്തമായ ഒരു ഭാവി പേർഷ്യൻ ഗൾഫിനുണ്ടാകുമെന്ന് ഇറാൻ ഉറച്ചു വിശ്വസിക്കുന്നു. അമേരിക്കൻ സൈനിക താവളങ്ങൾക്ക് സ്വന്തം സുരക്ഷ പോലും ഉറപ്പാക്കാൻ സാധിക്കാത്ത അവസ്ഥയാണുള്ളതെന്ന് ഇറാൻ പരിഹസിക്കുന്നു. അതുകൊണ്ട് തന്നെ മേഖലയിലെ രാജ്യങ്ങളുടെ സമാധാനവും പുരോഗതിയും ഇറാന്റെ നേതൃത്വത്തിൽ സുരക്ഷിതമായിരിക്കുമെന്നാണ് അവരുടെ അവകാശവാദം.