ഇറാൻ വിഷയത്തിൽ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവുമായി നടത്തിയ മൂന്ന് മണിക്കൂർ നീണ്ട ചർച്ചയിൽ അന്തിമ തീരുമാനമൊന്നും ഉണ്ടായില്ലെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് വ്യക്തമാക്കി. വാഷിംഗ്ടണിൽ വെച്ച് നടന്ന കൂടിക്കാഴ്ചയിൽ ഇറാനുമായുള്ള ആണവ ചർച്ചകൾ തുടരാനാണ് ട്രംപ് നിർദ്ദേശം നൽകിയത്.

കഴിഞ്ഞ വർഷം ട്രംപ് അധികാരത്തിൽ തിരിച്ചെത്തിയ ശേഷം ഇരുവരും തമ്മിൽ നടത്തുന്ന ഏഴാമത്തെ കൂടിക്കാഴ്ചയാണിത്. ചർച്ചകൾ അതീവ രഹസ്യ സ്വഭാവമുള്ളതായിരുന്നുവെന്നും മാധ്യമങ്ങൾക്ക് പ്രവേശനമില്ലായിരുന്നുവെന്നും റിപ്പോർട്ടുകൾ സൂചിപ്പിക്കുന്നു.

ഇറാനുമായി ഒരു കരാറിലെത്താനാണ് തന്റെ താൽപ്പര്യമെന്ന് കൂടിക്കാഴ്ചയ്ക്ക് ശേഷം സോഷ്യൽ മീഡിയയിലൂടെ ട്രംപ് അറിയിച്ചു. "ഇറാനുമായുള്ള ചർച്ചകൾ തുടരണമെന്ന് ഞാൻ നെതന്യാഹുവിനോട് ആവശ്യപ്പെട്ടു. കരാർ സാധ്യമാകുമെങ്കിൽ അതിനാണ് മുൻഗണന. ഇല്ലെങ്കിൽ ഭാവിയിൽ എന്ത് സംഭവിക്കുമെന്ന് കാത്തിരുന്ന് കാണാം," ട്രംപ് പറഞ്ഞു. എന്നാൽ ട്രംപിന്റെ ഈ നിലപാടിൽ നെതന്യാഹു സംതൃപ്തനാണോ എന്ന കാര്യത്തിൽ വ്യക്തതയില്ല.ഇറാൻ നടത്തുന്ന ആണവ പരീക്ഷണങ്ങൾക്കൊപ്പം ബാലിസ്റ്റിക് മിസൈൽ വികസനവും പ്രാദേശികമായ ഇടപെടലുകളും ചർച്ചാവിഷയമാക്കണമെന്ന് നെതന്യാഹു ആവശ്യപ്പെട്ടതായാണ് വിവരം. എന്നാൽ ഈ കാര്യങ്ങളിൽ ട്രംപ് ഉറപ്പുനൽകിയിട്ടില്ല. ഇറാനുമായി ഒരു ചെറിയ ആണവ കരാർ മാത്രം ഉണ്ടാക്കുന്നത് ഇസ്രായേലിന്റെ സുരക്ഷയെ ബാധിക്കുമെന്ന് ഇസ്രായേൽ ഉദ്യോഗസ്ഥർ മുന്നറിയിപ്പ് നൽകുന്നുണ്ട്.

അതേസമയം, നയതന്ത്രം പരാജയപ്പെട്ടാൽ സൈനിക നീക്കം നടത്തുമെന്ന ഭീഷണി ട്രംപ് ആവർത്തിച്ചിട്ടുണ്ട്. 2025 ജൂണിൽ ഇറാന്റെ ആണവ കേന്ദ്രങ്ങളിൽ അമേരിക്ക നടത്തിയ 'മിഡ്‌നൈറ്റ് ഹാമർ' (Midnight Hammer) ആക്രമണത്തെ അദ്ദേഹം ഇതിനായി ഓർമ്മിപ്പിച്ചു. ഇറാൻ ഇത്തവണ കൂടുതൽ ഉത്തരവാദിത്തത്തോടെ പെരുമാറുമെന്ന് കരുതുന്നതായും അദ്ദേഹം കൂട്ടിച്ചേർത്തു.കൂടിക്കാഴ്ചയ്ക്ക് മുന്നോടിയായി ഇസ്രായേൽ ട്രംപിന്റെ 'ബോർഡ് ഓഫ് പീസ്' (Board of Peace) എന്ന സമാധാന സംരംഭത്തിൽ അംഗമായി. അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോയുമായുള്ള കൂടിക്കാഴ്ചയ്ക്ക് ശേഷമാണ് നെതന്യാഹു ഇതിൽ ഒപ്പുവെച്ചത്.

ഗാസയിലെ വെടിനിർത്തലിനും പുനർനിർമ്മാണത്തിനുമായി ട്രംപ് മുൻകൈയെടുത്ത് രൂപീകരിച്ച സംവിധാനമാണിത്. പിന്നീട് ഈ സംരംഭം ആഗോളതലത്തിലുള്ള സമാധാന ചർച്ചകൾക്കായി വിപുലീകരിക്കാനാണ് ട്രംപ് പദ്ധതിയിടുന്നത്. ഫെബ്രുവരി 19-ന് വാഷിംഗ്ടണിൽ നടക്കുന്ന ബോർഡ് ഓഫ് പീസിന്റെ ആദ്യ യോഗത്തിൽ ഗാസയുടെ പുനർനിർമ്മാണം പ്രധാന ചർച്ചയാകും.ഗാസയിലെ സ്ഥിതിഗതികളും ട്രംപ്-നെതന്യാഹു ചർച്ചയിൽ വിഷയമായി. ഗാസയിൽ വലിയ പുരോഗതിയുണ്ടെന്നാണ് ട്രംപ് അവകാശപ്പെടുന്നത്. ഹമാസിന്റെ നിരായുധീകരണം, ഇസ്രായേൽ സൈനികരുടെ പിന്മാറ്റം തുടങ്ങിയ കാര്യങ്ങളിൽ തർക്കം നിലനിൽക്കുന്നതിനാൽ വെടിനിർത്തൽ പ്രക്രിയ ഇപ്പോഴും മന്ദഗതിയിലാണ്. നെതന്യാഹുവുമായുള്ള ബന്ധം ദൃഢമാണെന്നും വരും ദിവസങ്ങളിലും അടുത്ത ഏകോപനത്തോടെ പ്രവർത്തിക്കുമെന്നും ട്രംപ് വ്യക്തമാക്കി.