ശ്വാസകോശ അർബുദ ശസ്ത്രക്രിയയ്ക്ക് വിധേയനായ ലിയോ പതിനാലാമൻ മാർപ്പാപ്പ നാല് ദിവസത്തെ ആശുപത്രി വാസത്തിനു ശേഷം ആശുപത്രി വിട്ടു. ആരോഗ്യനില സംബന്ധിച്ച ആശങ്കകൾക്ക് വിരാമമിട്ട്, ആരുടെയും സഹായമില്ലാതെ സ്വന്തമായി നടന്നാണ് അദ്ദേഹം ആശുപത്രിക്ക് പുറത്തേക്ക് എത്തിയത്. ഈ സമയം 13 വയസ്സുള്ള ഒരു യുക്രേനിയൻ പെൺകുട്ടി സമ്മാനിച്ച സ്റ്റഫ്ഡ് കളിപ്പാട്ടം സ്വീകരിച്ചുകൊണ്ട് അദ്ദേഹം അഭ്യുദയകാംക്ഷികളെ അഭിവാദ്യം ചെയ്തു.ശ്വാസകോശ അർബുദമായ പൾമണറി അഡിനോകാർസിനോമ ബാധിച്ചതിനെ തുടർന്നാണ് 71 കാരനായ അമേരിക്കൻ പോപ്പിനെ ജെമെല്ലി ആശുപത്രിയിൽ പ്രവേശിപ്പിച്ചത്. തുടർന്ന് ഡോക്ടർമാർ നോഡ്യൂൾ വിജയകരമായി നീക്കം ചെയ്യുകയായിരുന്നു. രക്തപരിശോധനയ്ക്കും എക്സ്-റേയ്ക്കും ശേഷം അദ്ദേഹം പൂർണ്ണ ആരോഗ്യവാനാണെന്ന് ഡോക്ടർമാർ സ്ഥിരീകരിച്ചു. ശസ്ത്രക്രിയ കഴിഞ്ഞ് ഒരാഴ്ച തികയുന്നതിന് മുൻപ് തന്നെ, ഒക്ടോബർ 18 ഞായറാഴ്ച സെന്റ് പീറ്റേഴ്‌സ് സ്‌ക്വയറിന് മുകളിലുള്ള ജനാലയിൽ നിന്ന് അദ്ദേഹം അനുഗ്രഹം നൽകും.മാർപ്പാപ്പയുടെ പെട്ടെന്നുള്ള രോഗവാർത്ത വത്തിക്കാനിൽ ഞെട്ടലും ആശങ്കയും സൃഷ്ടിച്ചിരുന്നു. കഴിഞ്ഞ മെയ് മാസത്തിൽ 69-ാം വയസ്സിൽ മാർപ്പാപ്പയായി തിരഞ്ഞെടുക്കപ്പെട്ട ലിയോ, നല്ല ശാരീരികക്ഷമതയുള്ള വ്യക്തിയാണ്. റോമിൽ കർദ്ദിനാൾ ആയിരുന്ന കാലത്ത് വ്യക്തിഗത പരിശീലകന്റെ കീഴിൽ പരിശീലനം നേടിയിരുന്ന അദ്ദേഹം ടെന്നീസ്, നീന്തൽ തുടങ്ങിയ വിനോദങ്ങളിലും സജീവമായിരുന്നു.

നവംബർ 6 മുതൽ 17 വരെ ഉറുഗ്വേ, അർജന്റീന എന്നിവയുൾപ്പെടെ ലാറ്റിൻ അമേരിക്കയിലേക്ക് വലിയൊരു യാത്രയ്ക്ക് മാർപ്പാപ്പ പദ്ധതിയിട്ടിരുന്നു. കൂടാതെ വർഷങ്ങളോളം മിഷനറിയും ബിഷപ്പുമായി സേവനമനുഷ്ഠിച്ച പെറുവിലേക്കുള്ള മടക്കയാത്രയും ഇതിൽ ഉൾപ്പെടുന്നു. എന്നാൽ ഈ യാത്രാ പദ്ധതികളെക്കുറിച്ച് വത്തിക്കാൻ ജാഗ്രതാപൂർണ്ണമായ സമീപനമാണ് സ്വീകരിച്ചിരിക്കുന്നത്. മാർപ്പാപ്പയുടെ ആരോഗ്യസ്ഥിതി പൂർണ്ണമായി വിലയിരുത്തിയ ശേഷമേ യാത്രയുടെ കാര്യത്തിൽ അന്തിമ തീരുമാനം ഉണ്ടാകൂ എന്ന് ഹോളി സീ സ്റ്റേറ്റ് സെക്രട്ടറി കർദ്ദിനാൾ പിയട്രോ പരോളിൻ വ്യക്തമാക്കി. എങ്കിലും, അടുത്ത മാസം ലാറ്റിൻ അമേരിക്കയിലേക്കുള്ള സന്ദർശനം നടക്കാതിരിക്കാൻ തക്കതായ “ക്ലിനിക്കൽ കാരണങ്ങളൊന്നുമില്ല” എന്ന് ഡോക്ടർമാർ അറിയിച്ചിട്ടുണ്ട്. ലിയോ പൂർണ്ണമായി സുഖം പ്രാപിക്കാൻ ഏകദേശം രണ്ടാഴ്ചെയെങ്കിലും എടുക്കുമെന്നാണ് പ്രതീക്ഷിക്കുന്നത്.ശസ്ത്രക്രിയ കഴിഞ്ഞ ഉടനെ ആശുപത്രി കിടക്കയിൽ ഇരുന്ന് തന്നെ മാർപ്പാപ്പ ഔദ്യോഗിക ജോലികളിൽ വ്യാപൃതനായിരുന്നു. കർദ്ദിനാൾമാരെ സ്വീകരിച്ച അദ്ദേഹം, റഷ്യൻ പ്രസിഡന്റ് വ്‌ളാഡിമിർ പുടിനുമായി ടെലിഫോണിൽ സംസാരിക്കുകയും തെക്കൻ യുക്രേനിയൻ നഗരമായ ഒലെഷ്കിയിലെ സാധാരണക്കാരുടെ ദുരവസ്ഥ ചർച്ച ചെയ്യുകയും ചെയ്തു. മുൻകാല പോപ്പുകൾ കടുത്ത രോഗാവസ്ഥയിൽ രാജിവയ്ക്കൽ കത്തുകൾ എഴുതിവെച്ചിട്ടുണ്ടെങ്കിലും, ലിയോ അത്തരത്തിലുള്ള ഒരു നടപടിയും സ്വീകരിച്ചിട്ടില്ലെന്ന് കർദ്ദിനാൾ പരോളിൻ വ്യക്തമാക്കി. എന്നിരുന്നാലും, ശസ്ത്രക്രിയയ്ക്ക് തൊട്ടുമുമ്പ് കർദ്ദിനാൾ ലൂയിസ് അന്റോണിയോ ടാഗിളിനെ കോളേജ് ഓഫ് കാർഡിനൽസിന്റെ ഡീനായി പോപ്പ് സ്ഥിരീകരിച്ചിരുന്നു.