അന്താരാഷ്ട്ര വ്യാപാരത്തിൽ അമേരിക്കൻ ഡോളറിനെയും ബാങ്കിംഗ് സംവിധാനങ്ങളെയും ആശ്രയിക്കുന്നത് കുറയ്ക്കാൻ ലക്ഷ്യമിട്ട് ബ്രിക്സ് കൂട്ടായ്മയിൽ സ്വന്തം പേയ്‌മെന്റ് ശൃംഖല കൊണ്ടുവരാൻ ശക്തമായി വാദിച്ച് ഇന്ത്യ. കൂട്ടായ്മയുടെ അധ്യക്ഷ പദവി വഹിക്കുന്ന ഇന്ത്യ, ന്യൂഡൽഹിയിൽ നടക്കുന്ന ഉച്ചകോടിയിൽ അംഗരാജ്യങ്ങളുടെ തദ്ദേശീയ കറൻസികളിൽ നേരിട്ട് ഇടപാടുകൾ നടത്താൻ സഹായിക്കുന്ന സാങ്കേതിക പേയ്‌മെന്റ് സംവിധാനം ഔദ്യോഗികമായി നിർദ്ദേശിക്കും.

 അതിർത്തി കടന്നുള്ള തടസ്സമില്ലാത്ത ഡിജിറ്റൽ ഇടപാടുകളും സെൻട്രൽ ബാങ്ക് ഡിജിറ്റൽ കറൻസികളുടെ (CBDC) സംയോജനവുമാണ് ഇന്ത്യ മുന്നോട്ടുവെക്കുന്നത്. റിസർവ് ബാങ്ക് ഓഫ് ഇന്ത്യയുടെ നേതൃത്വത്തിൽ രൂപകൽപ്പന ചെയ്യുന്ന ഈ പ്ലാറ്റ്‌ഫോം വഴി ഇന്ത്യയുടെ ഇ-രൂപ (e-rupee), ചൈനയുടെ ഇ-യുവാൻ (e-CNY), റഷ്യയുടെ ഡിജിറ്റൽ റൂബിൾ, ബ്രസീലിന്റെ ഡ്രെക്സ് (Drex) എന്നിവ പരസ്പരം ബന്ധിപ്പിക്കാനും, ഇന്ത്യയുടെ യു.പി.ഐ (UPI), ബ്രസീലിന്റെ പിക്സ് (Pix) തുടങ്ങിയ തത്സമയ പണമിടപാട് ശൃംഖലകൾ തമ്മിൽ ഒരു സാങ്കേതിക പാലം ഒരുക്കാനുമാണ് പദ്ധതി.

പൊതുവായ ഒരു പുതിയ കറൻസി അവതരിപ്പിക്കുന്നതിന് ഇന്ത്യ എതിരാണെന്നും, മറിച്ച് വ്യാപാര ഇടപാടുകളിലെ ചെലവ് കുറയ്ക്കാനും സാധ്യതകൾ വർദ്ധിപ്പിക്കാനുമാണ് സ്വന്തം കറൻസികളിലുള്ള ഇടപാടുകൾ പ്രോത്സാഹിപ്പിക്കുന്നതെന്നും ഔദ്യോഗിക കേന്ദ്രങ്ങൾ വ്യക്തമാക്കിയിട്ടുണ്ട്. ദേശീയ അതിവേഗ പേയ്‌മെന്റ് സംവിധാനങ്ങളെ തമ്മിൽ ബന്ധിപ്പിക്കുക, അല്ലെങ്കിൽ ഡിജിറ്റൽ കറൻസികളെ പരസ്പരം വിനിമയം ചെയ്യാൻ പ്രാപ്തമാക്കുക എന്നീ രണ്ട് സാധ്യതകളാണ് പ്രത്യേക ടാസ്‌ക് ഫോഴ്‌സ് പ്രധാനമായും പരിശോധിക്കുന്നത്. 

ആഗോള വിപണിയിലെ ഡോളർ പ്രതിസന്ധികൾ, രാജ്യാന്തര പണമിടപാട് ഉപരോധങ്ങൾ, വിദേശ ബാങ്കിംഗ് ചാനലുകളിലെ സാങ്കേതിക തടസ്സങ്ങൾ എന്നിവയിൽ നിന്നുള്ള പ്രത്യാഘാതങ്ങൾ ലഘൂകരിക്കാൻ ഇത്തരം നേരിട്ടുള്ള പേയ്‌മെന്റ് സംവിധാനം അംഗരാജ്യങ്ങളെ സഹായിക്കും. ഏതെങ്കിലും ഒരു രാജ്യത്തിനെതിരായ സാമ്പത്തിക ചേരിതിരിവിനപ്പുറം തങ്ങളുടെ ബിസിനസ് മേഖലയ്ക്ക് കൂടുതൽ സാമ്പത്തിക സുരക്ഷിതത്വവും ബദൽ മാർഗ്ഗങ്ങളും ഉറപ്പാക്കുക എന്ന ലക്ഷ്യത്തോടെയാണ് ഇന്ത്യ ഈ സമഗ്ര നിർദ്ദേശം ഉച്ചകോടിയുടെ അജണ്ടയിൽ ഉൾപ്പെടുത്തുന്നത്.