പ്രധാനമന്ത്രി നരേന്ദ്ര മോദിയെ പ്രശംസിച്ച് അമേരിക്കൻ പ്രസിഡൻ്റ് ഡൊണാൾഡ് ട്രംപ്. തങ്ങൾ തമ്മിലുള്ള ശക്തമായ വ്യക്തിബന്ധം ചൂണ്ടിക്കാണിച്ച ട്രംപ്, അമേരിക്കയും ഇന്ത്യയും തമ്മിൽ ഉടൻ തന്നെ ഒരു സുപ്രധാന വ്യാപാര കരാറിൽ (Trade agreement) ഒപ്പുവെക്കുമെന്ന ആത്മവിശ്വാസവും പ്രകടിപ്പിച്ചു.എനിക്ക് നിങ്ങളുടെ പ്രധാനമന്ത്രിയെ വളരെ ഇഷ്ടമാണ്. അദ്ദേഹം എന്റെ നല്ലൊരു സുഹൃത്താണ്, ഞങ്ങൾ തമ്മിൽ വളരെ നല്ല രീതിയിലാണ് മുന്നോട്ട് പോകുന്നത്. ഞങ്ങളുടേത് മികച്ചൊരു ബന്ധമാണ്," ഇരുരാജ്യങ്ങളും തമ്മിലുള്ള വ്യാപാര ബന്ധത്തെക്കുറിച്ച് സംസാരിക്കവെ വൈറ്റ് ഹൗസിൽ വെച്ച് മാധ്യമപ്രവർത്തകരോട് ട്രംപ് പറഞ്ഞു.മുൻകാലങ്ങളിൽ ഇരുരാജ്യങ്ങളും തമ്മിൽ വ്യാപാര അസന്തുലിതാവസ്ഥ നിലനിന്നിരുന്നുവെങ്കിലും, വാഷിംഗ്ടണും ന്യൂഡൽഹിയും ഒടുവിൽ ഒരു ധാരണയിലെത്തുമെന്ന് വിശ്വസിക്കുന്നതായി ട്രംപ് വ്യക്തമാക്കി. മുൻവർഷങ്ങളിൽ ഉയർന്ന നികുതി ചുമത്തിക്കൊണ്ട് ഇന്ത്യ അമേരിക്കയുമായുള്ള വ്യാപാര ബന്ധത്തിൽ നിന്നും വലിയ ലാഭമുണ്ടാക്കിയിരുന്നതായി അവകാശപ്പെട്ട അദ്ദേഹം, എന്നാൽ ഇപ്പോൾ സാഹചര്യം പൂർണ്ണമായും മാറിയതായും കൂട്ടിച്ചേർത്തു.വർഷങ്ങളോളം ഇന്ത്യ അമേരിക്കയെ ചൂഷണം ചെയ്യുകയായിരുന്നു. അവർ ഞങ്ങൾക്ക് മേൽ വൻതോതിൽ നികുതി ചുമത്തുകയും എന്നാൽ തിരിച്ച് ഒന്നും നൽകാതിരിക്കുകയും ചെയ്തു. ഇപ്പോൾ സ്ഥിതി കൃത്യമായി മാറി മറിഞ്ഞിരിക്കുകയാണ്, ഞങ്ങൾ ഇന്ത്യയുമായുള്ള വ്യാപാരത്തിലൂടെ വലിയ രീതിയിൽ പണം സമ്പാദിക്കുന്നുണ്ട്," ട്രംപ് പറഞ്ഞു.സാമ്പത്തിക ബന്ധങ്ങൾ കൂടുതൽ ശക്തമാക്കുന്നതിനും ഇരുരാജ്യങ്ങളും തമ്മിൽ ദീർഘകാലമായി നിലനിൽക്കുന്ന വ്യാപാര തർക്കങ്ങൾ പരിഹരിക്കുന്നതിനുമുള്ള ശക്തമായ ശ്രമങ്ങൾ തുടരുന്നതിനിടയിലാണ് യുഎസ് പ്രസിഡന്റിന്റെ ഈ പുതിയ പരാമർശങ്ങൾ പുറത്തുവരുന്നത്. പ്രധാനമന്ത്രി മോദിയുമായുള്ള തന്റെ നല്ല ബന്ധം ഇരുവിഭാഗവും തമ്മിലുള്ള കരാർ പ്രക്രിയകൾ കൂടുതൽ എളുപ്പമാക്കാൻ സഹായിക്കുമെന്നും ട്രംപ് സൂചിപ്പിച്ചു.എന്തായാലും ഞങ്ങൾ ഒരു കരാറിലെത്തുക തന്നെ ചെയ്യും," യുഎസ്-ഇന്ത്യ വ്യാപാര ബന്ധത്തിന്റെ ഭാവിയെക്കുറിച്ച് വലിയ രീതിയിലുള്ള ശുഭപ്രതീക്ഷ പങ്കുവെച്ചുകൊണ്ട് ട്രംപ് വ്യക്തമാക്കി.ഇന്ത്യയും അമേരിക്കയും തമ്മിലുള്ള നാല് ദിവസത്തെ നിർണ്ണായക വ്യാപാര ചർച്ചകൾ അടുത്തിടെ ജൂൺ 1 മുതൽ ജൂൺ 4 വരെ ന്യൂഡൽഹിയിൽ വെച്ച് നടന്നിരുന്നു. ഓഫീസ് ഓഫ് ദി യുണൈറ്റഡ് സ്റ്റേറ്റ്സ് ട്രേഡ് റെപ്രസെന്റേറ്റീവിലെ (USTR) ചീഫ് നെഗോഷ്യേറ്ററുടെ നേതൃത്വത്തിലുള്ള ഉദ്യോഗസ്ഥ സംഘമാണ് ഇന്ത്യൻ പ്രതിനിധികളുമായി ചർച്ച നടത്തിയത്. ഉൽപ്പന്നങ്ങളുടെ വ്യാപാരം, കസ്റ്റംസ് നടപടിക്രമങ്ങൾ, വ്യാപാര സുഗമമാക്കൽ, താരിഫ് ഇതര തടസ്സങ്ങൾ (Non-tariff barriers), സാമ്പത്തിക സുരക്ഷാ സഹകരണം തുടങ്ങി ഒട്ടനവധി വിഷയങ്ങൾ ഈ ചർച്ചകളിൽ ഉടനീളം ഉയർന്നുവന്നു.ഈ ചർച്ചകൾ വളരെ ഫലപ്രദമായിരുന്നുവെന്ന് ഇരുവിഭാഗവും വിശേഷിപ്പിച്ചു. ഇരുരാജ്യങ്ങൾക്കും പരസ്പര പ്രയോജനകരമായ ഒരു താൽക്കാലിക കരാറിന് (Interim agreement) അന്തിമരൂപം നൽകാനുള്ള ശ്രമങ്ങൾ തുടരുകയാണെന്നും, അതിനോടൊപ്പം വിപുലമായ ഉഭയകക്ഷി വ്യാപാര കരാറിനായുള്ള (Bilateral Trade Agreement) പ്രവർത്തനങ്ങൾ പുരോഗമിക്കുകയാണെന്നും അധികൃതർ അറിയിച്ചു.

"