ചെന്നൈ : തമിഴ്നാട് രാഷ്ട്രീയത്തിൽ പുതിയ അട്ടിമറി. എഐഎഡിഎംകെയ്ക്ക് കനത്ത തിരിച്ചടി സൃഷ്ടിച്ചുകൊണ്ട് മൂന്ന് വിമത എംഎൽഎമാർ രാജിവെച്ചു. മുഖ്യമന്ത്രി സി. ജോസഫ് വിജയ്‌യുടെ നേതൃത്വത്തിലുള്ള തമിഴക വെട്രി കഴകത്തിൽ ഇവർ ഉടൻ തന്നെ ചേരുമെന്നാണ് സൂചന. സംസ്ഥാനത്ത് അടുത്തിടെ നടന്ന നിയമസഭാ തിരഞ്ഞെടുപ്പിന് പിന്നാലെ ഉണ്ടായ രാഷ്ട്രീയ നാടകങ്ങളുടെ തുടർച്ചയായാണ് ഈ നിർണായക നീക്കം. 

തിരഞ്ഞെടുപ്പ് പരാജയങ്ങൾക്ക് പിന്നാലെ എടപ്പാടി പളനിസാമി നയിക്കുന്ന ഔദ്യോഗിക വിഭാഗത്തിനെതിരെ പാർട്ടിയിൽ വലിയ ആഭ്യന്തര കലഹം ഉടലെടുത്തിരുന്നു. ഇതിന് പിന്നാലെയാണ് നിയമസഭയിൽ വിജയ് സർക്കാരിനെ പിന്തുണച്ച എഐഎഡിഎംകെയിലെ ഒരു വിഭാഗം എംഎൽഎമാരിൽ മൂന്ന് പേർ ഇപ്പോൾ ഔദ്യോഗികമായി തങ്ങളുടെ രാജി സ്പീക്കർക്ക് സമർപ്പിച്ചത്. വിശ്വാസ വോട്ടെടുപ്പ് സമയത്ത് എഐഎഡിഎംകെയിൽ ഉണ്ടായ ആഭ്യന്തര പിളർപ്പിൽ സി.വി. ഷൺമുഖം, എസ്.പി. വേലുമണി എന്നിവരുടെ നേതൃത്വത്തിലുള്ള വിമത വിഭാഗം വിജയ് സർക്കാരിനെ അനുകൂലിച്ച് വോട്ട് ചെയ്തിരുന്നു. ഇവരിൽ പെട്ട മൂന്ന് എംഎൽഎമാരാണ് ഇപ്പോൾ പാർട്ടി ബന്ധം പൂർണ്ണമായി ഉപേക്ഷിച്ച് രാജിവെക്കാൻ തീരുമാനിച്ചത്.