കൃത്യമായ സാമ്പത്തിക പരിഷ്കാരങ്ങളിലൂടെ 2047-ഓടെ ഇന്ത്യയ്ക്ക് വികസിത രാഷ്ട്രമായി മാറാൻ കഴിയുമെന്ന് ലോകബാങ്ക്. ഇന്ത്യയുടെ നിലവിലെ സാമ്പത്തിക വളർച്ച ശുഭസൂചകമാണെങ്കിലും വികസിത രാജ്യമെന്ന പദവിയിലേക്ക് ഉയരാൻ ചില ഘടനാപരമായ മാറ്റങ്ങൾ അത്യാവശ്യമാണെന്ന് റിപ്പോർട്ട് വ്യക്തമാക്കുന്നു.അടുത്ത രണ്ട് പതിറ്റാണ്ടുകളിൽ ഇന്ത്യയുടെ വാർഷിക വളർച്ചാ നിരക്ക് 8 ശതമാനത്തിന് മുകളിൽ നിലനിർത്തണം. തൊഴിൽ മേഖലയിൽ സ്ത്രീകളുടെ പങ്കാളിത്തം വർദ്ധിപ്പിക്കുന്നത് സമ്പദ്‌വ്യവസ്ഥയ്ക്ക് വലിയ കരുത്തേകും. ഉൽപ്പാദന മേഖലയിലും അടിസ്ഥാന സൗകര്യ വികസനത്തിലും കൂടുതൽ സ്വകാര്യ നിക്ഷേപങ്ങൾ ആകർഷിക്കണം. ആരോഗ്യം, വിദ്യാഭ്യാസം, നൈപുണ്യ വികസനം എന്നീ മേഖലകളിൽ നിക്ഷേപം വർദ്ധിപ്പിക്കുന്നത് ഉൽപ്പാദനക്ഷമത കൂട്ടാൻ സഹായിക്കും. ആർട്ടിഫിഷ്യൽ ഇന്റലിജൻസ് ഉൾപ്പെടെയുള്ള നവസാങ്കേതികവിദ്യകൾ ഫലപ്രദമായി വിനിയോഗിക്കണം.ആഗോള സാമ്പത്തിക അസ്ഥിരതയും കാലാവസ്ഥാ വ്യതിയാനവും വെല്ലുവിളിയാണെങ്കിലും, ഇന്ത്യയുടെ ശക്തമായ ആഭ്യന്തര വിപണിയും യുവജനതയുടെ ആധിക്യവും വലിയ പ്രതീക്ഷ നൽകുന്നുവെന്ന് ലോകബാങ്ക് നിരീക്ഷിക്കുന്നു. ഈ ലക്ഷ്യങ്ങൾ കൈവരിക്കുന്നതോടെ ലോകത്തെ മൂന്നാമത്തെ വലിയ സമ്പദ്‌വ്യവസ്ഥയായി മാറാനും കോടിക്കണക്കിന് ആളുകളെ ദാരിദ്ര്യത്തിൽ നിന്ന് മോചിപ്പിക്കാനും ഇന്ത്യയ്ക്ക് സാധിക്കുമെന്ന് റിപ്പോർട്ട് അടിവരയിടുന്നു.