പ്രധാനമന്ത്രി നരേന്ദ്ര മോദിയുമായുള്ള അത്താഴ വിരുന്നിന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു എത്തിയത് പരമ്പരാഗത ഇന്ത്യൻ വേഷത്തിൽ. തന്റെ സുഹൃത്തിന് ഒരു സർപ്രൈസ് നൽകിയതാണെന്ന് നെതന്യാഹു എക്സിൽ വീഡിയോ പങ്കുവെച്ച് കൊണ്ട് ഹിന്ദിയിൽ കുറിച്ചു. ഇതിന് "ബഹുത് ഹി ഷാൻദാർ!" (വളരെ ഗംഭീരം!) എന്നാണ് പ്രധാനമന്ത്രി മോദി മറുപടി നൽകിയത്. ഇരുവരും തമ്മിലുള്ള വീഡിയോ സോഷ്യൽ മീഡിയയിൽ തരംഗമായതോടെ, ഇന്ത്യയും ഇസ്രായേലും തമ്മിലുള്ള ശക്തമായ ബന്ധത്തിന്റെ തെളിവായി ഇതിനെ പലരും ചൂണ്ടിക്കാട്ടുന്നു.

ഇസ്രായേൽ പ്രധാനമന്ത്രിയുടെ ഈ സർപ്രൈസ് നീക്കവും ഇതിനോടുള്ള ഇന്ത്യൻ പ്രധാനമന്ത്രിയുടെ മറുപടിയും ഇരുരാജ്യങ്ങളും തമ്മിലുള്ള ശക്തമായ തന്ത്രപ്രധാനമായ പങ്കാളിത്തത്തിന്റെ പ്രതീകമായാണ് വിലയിരുത്തപ്പെടുന്നത്. ഇത് നയതന്ത്ര, പ്രതിരോധ ബന്ധങ്ങൾ ആഴത്തിലാക്കുക മാത്രമല്ല, ഇരു നേതാക്കളും പങ്കിടുന്ന വ്യക്തമായ വ്യക്തിപരമായ ബന്ധത്തെയും പ്രതിഫലിപ്പിക്കുന്നു.ഇന്ത്യൻ പ്രധാനമന്ത്രിക്ക് നൽകിയ സർപ്രൈസിനെ കുറിച്ച് നെതന്യാഹു സോഷ്യൽ മീഡിയയിൽ ഹിന്ദിയിലാണ് വിവരിച്ചത്. 'ഞങ്ങളുടെ സംയുക്ത വിരുന്നിന് മുൻപായി, പരമ്പരാഗത ഇന്ത്യൻ വേഷം ധരിച്ച് ഞാൻ എന്റെ സുഹൃത്ത് പ്രധാനമന്ത്രി മോദിയെ സർപ്രൈസ് ചെയ്തു.' ഇതിന് പിന്നാലെ ഇരുരാജ്യങ്ങളുടെയും ദേശീയ പതാകകളുടെ ചിഹ്നങ്ങളും അദ്ദേഹം പോസ്റ്റിൽ ഉൾപ്പെടുത്തിയിരുന്നു.

അമേരിക്കയും ഇറാനും തമ്മിലുള്ള ബന്ധം വഷളാകുന്നത് ഉൾപ്പെടെ, മിഡിൽ ഈസ്റ്റിൽ തുടരുന്ന സംഘർഷഭരിതമായ സാഹചര്യങ്ങൾക്കിടയിലും പ്രതിരോധ-വ്യാപാര ബന്ധങ്ങൾ ശക്തിപ്പെടുത്തുക എന്ന ലക്ഷ്യത്തോടെയാണ് പ്രധാനമന്ത്രി മോദി ബുധനാഴ്ച ഇസ്രായേലിലെത്തിയത്.

ആദ്യ ദിവസം ഇസ്രായേൽ പാർലമെന്റായ നെസെറ്റിൽ അദ്ദേഹം പ്രസംഗിച്ചു. പിന്നീട് ഇസ്രായേൽ പ്രധാനമന്ത്രിയുമായി സംയുക്ത അത്താഴ കൂടിക്കാഴ്ചയിലും പങ്കെടുത്തു. രണ്ടാം ദിവസം അദ്ദേഹം യാദ് വസീം ഹോളോകോസ്റ്റ് മെമ്മോറിയൽ സന്ദർശിക്കുമെന്നും ഇസ്രായേൽ പ്രസിഡന്റ് ഐസക് ഹെർസോഗുമായും ബെഞ്ചമിൻ നെതന്യാഹുമായും നിർണ്ണായക ചർച്ചകൾ നടത്തുമെന്നും പ്രതീക്ഷിക്കുന്നു.ബഹുത് ഹി ഷാൻദാർ! ഇന്ത്യൻ വേഷത്തോടുള്ള നിങ്ങളുടെ താല്പര്യം നമ്മുടെ രാജ്യത്തിന്റെ സമ്പന്നമായ സംസ്കാരത്തോടും പാരമ്പര്യത്തോടുമുള്ള നിങ്ങളുടെ ബഹുമാനത്തെയാണ് പ്രതിഫലിപ്പിക്കുന്നത്.' എന്ന് നെതന്യാഹുവിന്റെ പോസ്റ്റിന് മറുപടിയായി പ്രധാനമന്ത്രി പോസ്റ്റ് ചെയ്തത്.