ഇന്ത്യൻ കോർപ്പറേറ്റ് മേഖലയിൽ 2026-ൽ ശരാശരി 9.1 ശതമാനം ശമ്പള വർദ്ധനവ് ലഭിക്കുമെന്ന് പ്രമുഖ കൺസൾട്ടൻസി സ്ഥാപനമായ ഇ വൈ ഇന്ത്യയുടെ (EY India) ഏറ്റവും പുതിയ 'ഫ്യൂച്ചർ ഓഫ് പേ' റിപ്പോർട്ട് വ്യക്തമാക്കുന്നു. കോവിഡ് കാലത്തെ വലിയ ഏറ്റക്കുറച്ചിലുകൾക്ക് ശേഷം ഇന്ത്യയിലെ ശമ്പള വർദ്ധനവ് ഒരു സുസ്ഥിരമായ രീതിയിലേക്ക് മാറുന്നതായാണ് റിപ്പോർട്ട് സൂചിപ്പിക്കുന്നത്. കൂടാതെ, ശമ്പള നിർണ്ണയത്തിലും പ്രകടനം വിലയിരുത്തുന്നതിലും ആർട്ടിഫിഷ്യൽ ഇന്റലിജൻസ് (AI) വലിയ പങ്ക് വഹിക്കുന്നുണ്ടെന്നും റിപ്പോർട്ട് അടിവരയിടുന്നു.ഗ്ലോബൽ കാപ്പബിലിറ്റി സെന്ററുകളിലായിരിക്കും (GCCs) അടുത്ത വർഷം ഏറ്റവും ഉയർന്ന ശമ്പള വർദ്ധനവ് ദൃശ്യമാകുക. ഏകദേശം 10.4 ശതമാനം വർദ്ധനവാണ് ഈ മേഖലയിൽ പ്രതീക്ഷിക്കുന്നത്. ഡിജിറ്റൽ മേഖലയിലും സ്പെഷ്യലൈസ്ഡ് സ്കില്ലുകളിലുമുള്ള ആഗോള നിക്ഷേപം ഈ വളർച്ചയ്ക്ക് കാരണമാകുന്നു.ഫിനാൻഷ്യൽ സർവീസ് മേഖലയിൽ 10 ശതമാനവും ഇ-കൊമേഴ്‌സ് കമ്പനികളിൽ 9.9 ശതമാനവും ശമ്പള വർദ്ധനവ് ലഭിച്ചേക്കാം. ലൈഫ് സയൻസസ്, ഫാർമസ്യൂട്ടിക്കൽസ് മേഖലകളിൽ ഏകദേശം 9.7 ശതമാനം വർദ്ധനവാണ് പ്രതീക്ഷിക്കുന്നത്. സാങ്കേതികവിദ്യയും ഡിജിറ്റൽ ഓപ്പറേഷനുമായി ബന്ധപ്പെട്ട മേഖലകൾ ശമ്പളത്തിന്റെ കാര്യത്തിൽ മുന്നിട്ടുനിൽക്കും.സ്ഥാപനങ്ങളിൽ നിന്നും ജീവനക്കാർ ജോലി ഉപേക്ഷിച്ചു പോകുന്ന നിരക്കിൽ (Attrition) കുറവുണ്ടായത് തൊഴിലുടമകൾക്ക് ആശ്വാസം നൽകുന്നു. 2024-ൽ 17.5 ശതമാനമായിരുന്ന ഈ നിരക്ക് 2025-ൽ 16.4 ശതമാനമായി കുറഞ്ഞു. ജോലി മാറുന്നവരുടെ എണ്ണത്തിൽ നേരിയ കുറവ് വന്നിട്ടുണ്ട്.ജോലി ഉപേക്ഷിച്ചവരിൽ 80 ശതമാനവും മികച്ച അവസരങ്ങൾ തേടി സ്വമേധയാ മാറിയവരാണ്. ഫിനാൻഷ്യൽ സർവീസസ് മേഖലയിലാണ് ഏറ്റവും കൂടുതൽ തൊഴിൽ മാറ്റം നടന്നത് (24%). എന്നാൽ ജിസിസി മേഖലയിൽ ഇത് 14.1 ശതമാനം മാത്രമാണ്.ആർട്ടിഫിഷ്യൽ ഇന്റലിജൻസ് ഇന്ന് ശമ്പള നിർണ്ണയ മാതൃകകളെ സ്വാധീനിക്കുന്നുണ്ട്. 50 മുതൽ 60 ശതമാനം വരെ വലിയ സ്ഥാപനങ്ങൾ ബോണസും ശമ്പളവും തീരുമാനിക്കാൻ ഡാറ്റാ അനലിറ്റിക്സ് ഉപയോഗിക്കുന്നു. ആർട്ടിഫിഷ്യൽ ഇന്റലിജൻസ്, ജനറേറ്റീവ് എഐ, മെഷീൻ ലേണിംഗ് തുടങ്ങിയ സാങ്കേതിക വിദ്യകളിൽ വൈദഗ്ധ്യമുള്ളവർക്ക് 40 ശതമാനം വരെ അധിക ശമ്പള ആനുകൂല്യം (Skill Premium) ലഭിക്കുന്നുണ്ട്.ഇത് ഡിജിറ്റൽ വൈദഗ്ധ്യമുള്ളവർക്ക് വിപണിയിലുള്ള ഉയർന്ന ഡിമാൻഡിനെയാണ് സൂചിപ്പിക്കുന്നത്. കൃത്യമായ ഡാറ്റയുടെ അടിസ്ഥാനത്തിൽ ശമ്പളം നിശ്ചയിക്കുന്ന രീതിയിലേക്ക് കമ്പനികൾ മാറുന്നതായാണ് ഇ വൈ റിപ്പോർട്ട് പറയുന്നത്.