സാധുവായ എയർവർത്തിനസ് പെർമിറ്റ് (Airworthiness Permit) ഇല്ലാതെ എട്ട് തവണ വിമാനം പറത്തിയതിന് എയർ ഇന്ത്യയ്ക്ക് ഒരു കോടി രൂപ (1,10,350 ഡോളർ) പിഴ ചുമത്തി ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (DGCA).വിമാനക്കമ്പനിയുടെ ഭാഗത്തുനിന്നുണ്ടായ ഈ വീഴ്ച പൊതുജനങ്ങൾക്ക് എയർ ഇന്ത്യയിലുള്ള വിശ്വാസം വീണ്ടും തകർക്കാൻ കാരണമായെന്ന് ഡിജിസിഎയുടെ രഹസ്യ ഉത്തരവിൽ പറയുന്നു. സുരക്ഷാ മാനദണ്ഡങ്ങൾ പാലിക്കുന്നതിൽ കമ്പനി പരാജയപ്പെട്ടുവെന്നും റെഗുലേറ്റർ ചൂണ്ടിക്കാട്ടി.നിർബന്ധിതമായ എയർവർത്തിനസ് റിവ്യൂ സർട്ടിഫിക്കറ്റ് (ARC) ഇല്ലാതെ നവംബർ 24, 25 തീയതികളിൽ ഡൽഹി, ബെംഗളൂരു, മുംബൈ, ഹൈദരാബാദ് എന്നിവിടങ്ങളിലേക്ക് യാത്രക്കാരുമായി പറന്ന എയർബസ് എ320 വിമാനവുമായാണ് ഈ പിഴ ബന്ധപ്പെട്ടിരിക്കുന്നത്.വിമാനത്തിൻ്റെ സുരക്ഷാ പരിശോധനകൾക്ക് ശേഷം റെഗുലേറ്റർ വർഷം തോറും നൽകുന്നതാണ് എആർസി സർട്ടിഫിക്കറ്റ്. ഇത് ലഭിക്കാതെ വിമാനം പറത്തുന്നത് വ്യോമയാന നിയമങ്ങളുടെ ഗുരുതരമായ ലംഘനമാണ്.2025-ൽ നടന്ന ഈ സംഭവത്തെക്കുറിച്ച് എയർ ഇന്ത്യ തന്നെ സ്വമേധയാ റിപ്പോർട്ട് ചെയ്തിരുന്നുവെന്നും തുടർന്ന് ഡിജിസിഎയിൽ നിന്ന് ലഭിച്ച ഉത്തരവ് കൈപ്പറ്റിയതായും എയർ ഇന്ത്യ അറിയിച്ചു. സുരക്ഷാ വീഴ്ചകൾ പരിഹരിച്ചതായും അത് അധികൃതരുമായി പങ്കുവെച്ചതായും കമ്പനി വ്യക്തമാക്കി.പ്രവർത്തനങ്ങളിലെ സുതാര്യതയും സുരക്ഷയും നിലനിർത്തുന്നതിൽ എയർ ഇന്ത്യ പ്രതിജ്ഞാബദ്ധമാണെന്നും കമ്പനി വക്താവ് അറിയിച്ചു. എന്നാൽ കമ്പനിയുടെ ആഭ്യന്തര അന്വേഷണത്തിൽ ഈ സംഭവത്തിൽ 'സിസ്റ്റമിക് ഫെയിലിയർ' (Systemic failures) ഉണ്ടായതായി കണ്ടെത്തിയിരുന്നു.ഫെബ്രുവരി 5-ന് പുറപ്പെടുവിച്ച രഹസ്യ ഉത്തരവിൽ എയർ ഇന്ത്യ സിഇഒ കാംബെൽ വിൽസണെ ഡിജിസിഎ രൂക്ഷമായി വിമർശിച്ചു. ഈ സംഭവം സംഘടനയുടെ സുരക്ഷാ പാലനത്തെ ദോഷകരമായി ബാധിച്ചുവെന്ന് ജോയിന്റ് ഡയറക്ടർ ജനറൽ മനീഷ് കുമാർ പറഞ്ഞു.ഇതിന്റെ ഉത്തരവാദിത്തപ്പെട്ട മാനേജർ എന്ന നിലയിൽ കാംബെൽ വിൽസൺ കുറ്റക്കാരനാണെന്നും ഉത്തരവിൽ പറയുന്നു. പിഴ തുകയായ ഒരു കോടി രൂപ 30 ദിവസത്തിനുള്ളിൽ അടയ്ക്കാനാണ് നിർദ്ദേശം നൽകിയിരിക്കുന്നത്.കഴിഞ്ഞ വർഷം ജൂണിൽ അഹമ്മദാബാദ് വിമാനത്താവളത്തിൽ നിന്ന് പറന്നുയർന്ന ഉടനെ ബോയിംഗ് ഡ്രീംലൈനർ തകർന്ന് 260 പേർ കൊല്ലപ്പെട്ടതിന് ശേഷം എയർ ഇന്ത്യയുടെ സുരക്ഷാ മാനദണ്ഡങ്ങൾ കനത്ത നിരീക്ഷണത്തിലാണ്. ഈ എയർബസ് സംഭവത്തിൽ പൈലറ്റുമാർക്കും വീഴ്ച സംഭവിച്ചതായി എയർ ഇന്ത്യയുടെ അന്വേഷണത്തിൽ വ്യക്തമായിരുന്നു.വിമാനം പറന്നുയരുന്നതിന് മുൻപുള്ള സ്റ്റാൻഡേർഡ് ഓപ്പറേറ്റിംഗ് നടപടിക്രമങ്ങൾ പൈലറ്റുമാർ പാലിച്ചിരുന്നില്ല. എമർജൻസി ഉപകരണങ്ങളുടെ പരിശോധന നടത്താത്തതിനും മറ്റ് ഓഡിറ്റ് സംബന്ധമായ വീഴ്ചകൾക്കും എയർ ഇന്ത്യയ്ക്ക് കഴിഞ്ഞ മാസങ്ങളിലും ഡിജിസിഎ മുന്നറിയിപ്പ് നൽകിയിരുന്നു.