തിരുവനന്തപുരത്ത് നടന്ന ‘വിഷൻ 2031’ അന്താരാഷ്ട്ര കോൺഫറൻസിന്റെ ഉദ്ഘാടന വേളയിൽ, മുഖ്യമന്ത്രി പിണറായി വിജയനെ സാക്ഷിയാക്കി മുതിർന്ന കോൺഗ്രസ് നേതാവും മുൻ കേന്ദ്രമന്ത്രിയുമായ മണിശങ്കർ അയ്യർ നടത്തിയ പരാമർശം രാഷ്ട്രീയ ശ്രദ്ധ നേടുന്നു. പിണറായി വിജയൻ അടുത്ത തവണയും മുഖ്യമന്ത്രിയാകുമെന്ന് അദ്ദേഹം പ്രത്യാശ പ്രകടിപ്പിച്ചു. കേരള സംസ്ഥാന രൂപീകരണത്തിന്റെ 75-ാം വാർഷികം ആഘോഷിക്കുന്ന 2031-ഓടെ സംസ്ഥാനം കൈവരിക്കേണ്ട വികസന ലക്ഷ്യങ്ങളെക്കുറിച്ചും നവകേരള നിർമ്മിതിയെക്കുറിച്ചും ചർച്ച ചെയ്യാനാണ് ഈ സമ്മേളനം സംഘടിപ്പിച്ചത്.

2031-ലെ കേരളത്തിന്റെ വികസന ഭൂപടം രചിക്കുന്നതിൽ ഈ സംഗമം നിർണ്ണായക പങ്കുവഹിക്കുമെന്ന് സമ്മേളനം ഉദ്ഘാടനം ചെയ്തുകൊണ്ട് മുഖ്യമന്ത്രി പറഞ്ഞു. 2031 എന്നത് കേവലം ഒരു വാർഷികാഘോഷം മാത്രമല്ലെന്നും, അത് കേരളത്തിന്റെ വൻതോതിലുള്ള വികസനത്തിലേക്കുള്ള വലിയൊരു കാഹളമായിരിക്കണമെന്നും അദ്ദേഹം ആഹ്വാനം ചെയ്തു. നവകേരളത്തിനായുള്ള ദീർഘകാല പദ്ധതികൾ ആസൂത്രണം ചെയ്യുന്നതിനും നടപ്പിലാക്കുന്നതിനുമുള്ള പ്രധാന വേദിയായാണ് ‘വിഷൻ 2031’ കോൺഫറൻസിനെ സർക്കാർ കാണുന്നത്.