ഇന്ത്യയുമായുള്ള പുതിയ വ്യാപാര കരാറിന്റെ ഭാഗമായി അമേരിക്കൻ വ്യാപാര പ്രതിനിധി പുറത്തുവിട്ട ഭൂപടത്തിൽ പാകിസ്ഥാൻ അധിനിവേശ കശ്മീരും (PoK) അക്സായി ചിന്നും ഇന്ത്യൻ പ്രദേശത്തിന്റെ ഭാഗമായി രേഖപ്പെടുത്തിയത് പാകിസ്ഥാനെ ചൊടിപ്പിച്ചു. അമേരിക്കൻ ഉന്നത ഉദ്യോഗസ്ഥൻ സോഷ്യൽ മീഡിയയിൽ പങ്കുവെച്ച ഈ ഭൂപടം തങ്ങളുടെ രാജ്യത്തിന് വലിയ നാണക്കേടുണ്ടാക്കിയെന്നും വിഷയം അമേരിക്കയുടെ ശ്രദ്ധയിൽപ്പെടുത്തിയെന്നും പാകിസ്ഥാൻ വിദേശകാര്യ മന്ത്രാലയം അറിയിച്ചു. മേഖലയിലെ മുൻകാല ചിത്രീകരണങ്ങളിൽ നിന്ന് വ്യത്യസ്തമായ ഈ നീക്കം അന്താരാഷ്ട്ര തലത്തിൽ വലിയ ചർച്ചകൾക്കാണ് വഴിവെച്ചത്.

യുഎൻ അംഗീകരിച്ച ഭൂപടത്തിന് വിരുദ്ധമായാണ് അമേരിക്ക ഇന്ത്യയുടെ ചിത്രം നൽകിയതെന്ന് ചൂണ്ടിക്കാട്ടി പാക് വിദേശകാര്യ മന്ത്രാലയ വക്താവ് താഹിർ ആൻഡ്രാബി രംഗത്തെത്തി. ഭൂപടം തെറ്റാണെന്ന് അമേരിക്കൻ അധികൃതർ സമ്മതിച്ചതായും അദ്ദേഹം അവകാശപ്പെട്ടു. ജമ്മു കശ്മീർ ഒരു തർക്കപ്രദേശമാണെന്നും യുഎൻ സുരക്ഷാ കൗൺസിൽ പ്രമേയങ്ങൾ പ്രകാരം ജനഹിത പരിശോധനയിലൂടെയാണ് ഇതിൽ പരിഹാരം കാണേണ്ടതെന്നും പാകിസ്ഥാൻ ആവർത്തിച്ചു. പാകിസ്ഥാന്റെ പ്രതിഷേധത്തിന് പിന്നാലെ അമേരിക്കയുടെ വ്യാപാര പ്രതിനിധിയുടെ ഓഫീസ് ഈ വിവാദ ഭൂപടം സോഷ്യൽ മീഡിയയിൽ നിന്ന് നീക്കം ചെയ്തു. 

ഏകദേശം 30 ട്രില്യൺ ഡോളർ മൂല്യമുള്ള സമ്പദ്‌വ്യവസ്ഥയിലേക്ക് പ്രവേശനം നൽകുന്ന ഇന്ത്യ-അമേരിക്ക വ്യാപാര കരാറിന്റെ ചട്ടക്കൂട് പ്രഖ്യാപിക്കുന്നതിനിടയിലാണ് ഈ വിവാദം ഉടലെടുത്തത്. കരാറിന്റെ വിശദാംശങ്ങൾക്കൊപ്പം പ്രസിദ്ധീകരിച്ച ഭൂപടത്തിൽ പാകിസ്ഥാൻ അധിനിവേശ കശ്മീരും ചൈന അവകാശവാദം ഉന്നയിക്കുന്ന അക്സായി ചിന്നും ഇന്ത്യയുടെ ഭാഗമായാണ് കാണിച്ചിരുന്നത്. ഇന്ത്യയുടെ പ്രാദേശിക പരമാധികാരത്തിന് അമേരിക്കയുടെ പ്രത്യേക അംഗീകാരം ആവശ്യമില്ലെങ്കിലും, വാഷിംഗ്ടണിന്റെ ദീർഘകാലമായുള്ള നയതന്ത്ര നിലപാടുകളിൽ നിന്നുള്ള പ്രകടമായ മാറ്റമായാണ് ഈ ഭൂപടം വിലയിരുത്തപ്പെട്ടത്.

ഉഭയകക്ഷി ബന്ധങ്ങളിലെ പുതിയ മാറ്റങ്ങളുടെ സൂചനയാണോ അതോ വെറുമൊരു സാങ്കേതിക പിഴവാണോ ഈ ഭൂപടം എന്ന കാര്യത്തിൽ വലിയ ഊഹാപോഹങ്ങൾ ഉയർന്നു. എന്നാൽ ചർച്ചകൾ കൊഴുക്കുന്നതിനിടെ തങ്ങളുടെ ഔദ്യോഗിക എക്സ് അക്കൗണ്ടിൽ നിന്ന് പോസ്റ്റ് പൂർണ്ണമായും നീക്കം ചെയ്തുകൊണ്ട് വിവാദങ്ങൾക്ക് വിരാമമിടാനാണ് അമേരിക്കൻ വ്യാപാര പ്രതിനിധി ഓഫീസ് തീരുമാനിച്ചത്. എന്നിരുന്നാലും, തങ്ങളുടെ പ്രതിഷേധത്തെത്തുടർന്ന് അമേരിക്ക തിരുത്തൽ വരുത്തിയതിൽ പാകിസ്ഥാൻ ഔദ്യോഗികമായി സംതൃപ്തി രേഖപ്പെടുത്തിയിട്ടുണ്ട്.