ഇറാനുമായുള്ള യുദ്ധത്തിൽ അമേരിക്കയ്ക്ക് വ്യക്തമായ മേൽക്കൈയെന്ന് ഡൊണാൾഡ് ട്രംപ്. സൈനിക നീക്കം അതിവേഗം പുരോഗമിക്കുകയാണെന്ന് അദ്ദേഹം പറഞ്ഞു. വൈറ്റ് ഹൗസിൽ ടെക്നോളജി എക്സിക്യൂട്ടീവുകളുമായി സംസാരിച്ച ട്രംപ്, സംഘർഷത്തിൽ യുഎസും സഖ്യകക്ഷികളും മേൽക്കൈ നേടുകയാണെന്ന് വ്യക്തമാക്കി.യുദ്ധത്തിലെ പ്രകടനത്തിന് യുഎസ് സൈന്യത്തിന് ട്രംപ് അസാധാരണമായ ഒരു റേറ്റിംഗ് നൽകി.യുദ്ധമുന്നണിയിൽ നമ്മൾ നന്നായി പ്രവർത്തിക്കുന്നുണ്ട്. ലളിതമായി പറഞ്ഞാൽ, 10 എന്ന സ്കെയിലിൽ നിങ്ങൾ എങ്ങനെ റേറ്റ് ചെയ്യുമെന്ന് ഒരാൾ ചോദിച്ചു. ഞാൻ 15 എന്നായിരുന്നു ഉത്തരം പറഞ്ഞത്," ട്രംപ് പറഞ്ഞു.സൈനിക നീക്കത്തിനിടെ ഇറാനിയൻ നേതാക്കൾ തുടർച്ചയായി ആക്രമിക്കപ്പെടുന്നതിനാൽ അമേരിക്ക ഇപ്പോൾ ഒരു ആധിപത്യ സ്ഥാനത്താണ് എന്ന് പ്രസിഡന്റ് കൂട്ടിച്ചേർത്തു.

"നമ്മൾ ഇപ്പോൾ വളരെ ശക്തമായ ഒരു നിലയിലാണ്, അവരുടെ നേതൃത്വം അതിവേഗം ഇല്ലാതാവുകയാണ്. നേതാവാകാൻ ആഗ്രഹിക്കുന്ന എല്ലാവരും മരിക്കുന്നു," ട്രംപ് പറഞ്ഞു.യുദ്ധം അഞ്ചാം ദിവസത്തിലേക്ക് കടന്ന സാഹചര്യത്തിലാണ് ട്രംപിന്റെ പരാമർശം. മിഡിൽ ഈസ്റ്റിലുടനീളം പുതിയ സ്ഫോടനങ്ങൾ റിപ്പോർട്ട് ചെയ്യപ്പെടുകയും യുഎസ് സൈന്യം ഇസ്രായേലിനൊപ്പം ഏകോപിത പ്രവർത്തനങ്ങൾ തുടരുകയും ചെയ്തു.ഏറ്റവും നാടകീയമായ സംഭവവികാസങ്ങളിലൊന്നിൽ, ശ്രീലങ്കൻ തീരത്ത് ഒരു യുഎസ് അന്തർവാഹിനി ഒരു ഇറാനിയൻ യുദ്ധക്കപ്പൽ മുക്കി. ഇറാൻ യുദ്ധക്കപ്പലായ 'ഐആർഐഎസ് ഡെന'യെ ഇന്ത്യൻ മഹാസമുദ്രത്തിൽവെച്ച് ആക്രമിച്ച് മുക്കിയത് തങ്ങളുടെ മുങ്ങിക്കപ്പലാണെന്ന് അമേരിക്ക സ്ഥിരീകരിച്ചു. കപ്പൽ ആക്രമിക്കുന്നതിന്റെ ദൃശ്യങ്ങൾ എക്സിലൂടെ പുറത്തുവിട്ടു. ആക്രമണത്തിൽ 87 പേർ കൊല്ലപ്പെട്ടുവെന്ന് രാജ്യത്തെ ഡെപ്യൂട്ടി വിദേശകാര്യ മന്ത്രി ബുധനാഴ്ച പ്രാദേശിക ടെലിവിഷനിൽ പറഞ്ഞു.ഇറാന്റെ മിസൈൽ ശേഷിയെ ദുർബലപ്പെടുത്തുകയും സൈനിക അടിസ്ഥാന സൗകര്യങ്ങൾ തകർക്കുകയും ചെയ്യുക എന്നതാണ് ഇപ്പോൾ നടക്കുന്ന നീക്കത്തിന്റെ ലക്ഷ്യമെന്ന് പെന്റഗൺ പറഞ്ഞു.