കേന്ദ്ര വിദേശകാര്യ മന്ത്രി എസ്. ജയശങ്കർ ചൊവ്വാഴ്ച വാഷിംഗ്ടൺ ഡിസിയിൽ യുഎസ് ട്രഷറി സെക്രട്ടറി സ്കോട്ട് ബെസെൻ്റ്, സ്റ്റേറ്റ് സെക്രട്ടറി മാർക്കോ റൂബിയോ എന്നിവരുമായി നിർണ്ണായക കൂടിക്കാഴ്ചകൾ നടത്തി. വ്യാപാരം, ഊർജ്ജം, പ്രതിരോധം, സാങ്കേതികവിദ്യ എന്നീ മേഖലകളിൽ ഇരുരാജ്യങ്ങളും തമ്മിലുള്ള ബന്ധം കൂടുതൽ ശക്തമാക്കുന്നതിന്റെ ഭാഗമായാണ് ഈ മൂന്ന് ദിവസത്തെ സന്ദർശനം.

പ്രധാനമന്ത്രി നരേന്ദ്ര മോദിയും യുഎസ് പ്രസിഡൻ്റ് ഡൊണാൾഡ് ട്രംപും തമ്മിലുള്ള ചർച്ചയ്ക്ക് പിന്നാലെ പ്രഖ്യാപിക്കപ്പെട്ട ചരിത്രപരമായ വ്യാപാര കരാറിൻ്റെ പശ്ചാത്തലത്തിലാണ് ഈ കൂടിക്കാഴ്ചകൾക്ക് പ്രാധാന്യമേറുന്നത്.

സന്ദർശനത്തിന്റെ തുടക്കത്തിൽ ജയശങ്കർ യുഎസ് ട്രഷറി സെക്രട്ടറി സ്കോട്ട് ബെസെന്റുമായി സംസാരിച്ചു. പുതിയ സാമ്പത്തിക കരാർ പ്രായോഗികമായി നടപ്പിലാക്കുന്നതിനെക്കുറിച്ചായിരുന്നു പ്രധാന ചർച്ചകൾ. ഞായറാഴ്ച പ്രഖ്യാപിച്ച വ്യാപാര കരാറിലെ നിർണ്ണായകമായ പല കാര്യങ്ങളും ഈ ചർച്ചയിലൂടെ അന്തിമരൂപത്തിലെത്തിച്ചു.

ഇരുരാജ്യങ്ങളും തമ്മിലുള്ള സാമ്പത്തിക പങ്കാളിത്തവും തന്ത്രപരമായ സഹകരണവും മെച്ചപ്പെടുത്തുന്നതിൽ ഈ കൂടിക്കാഴ്ച ഏറെ ഉപകാരപ്രദമായെന്ന് ജയശങ്കർ എക്‌സിൽ (X) കുറിച്ചു. രാഷ്ട്രീയമായ ഉറപ്പുകളെ കൃത്യമായ നയങ്ങളാക്കി മാറ്റുന്നതിനും വിപണിയിലേക്കുള്ള പ്രവേശനം എളുപ്പമാക്കുന്നതിനും ഈ ചർച്ചകൾ സഹായിക്കും.

തുടർന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോയുമായി ജയശങ്കർ കൂടിക്കാഴ്ച നടത്തി. ഉഭയകക്ഷി സഹകരണം, പ്രാദേശിക-ആഗോള പ്രശ്നങ്ങൾ, പ്രതിരോധം, ആണവ സഹകരണം, ക്രിട്ടിക്കൽ മിനറൽസ് (നിർണ്ണായക ധാതുക്കൾ) എന്നീ വിഷയങ്ങൾ ചർച്ചയിൽ കടന്നുവന്നു.

ക്രിട്ടിക്കൽ മിനറൽസ് പര്യവേക്ഷണത്തിൽ സഹകരിക്കുന്നതിനും പുതിയ സാമ്പത്തിക അവസരങ്ങൾ കണ്ടെത്തുന്നതിനും ഇരുപക്ഷവും താല്പര്യം പ്രകടിപ്പിച്ചു. ബുധനാഴ്ച വാഷിംഗ്ടണിൽ നടക്കുന്ന ആദ്യ 'ക്രിട്ടിക്കൽ മിനറൽസ് മിനിസ്റ്റീരിയൽ' സമ്മേളനത്തിന് മുന്നോടിയായായിരുന്നു ഈ കൂടിക്കാഴ്ച. 50-ലധികം രാജ്യങ്ങൾ പങ്കെടുക്കുന്ന ഈ സമ്മേളനത്തിൽ ആഗോള സപ്ലൈ ചെയിൻ സുരക്ഷിതമാക്കുന്നതിനെക്കുറിച്ച് ചർച്ചകൾ നടക്കും.

ഇന്ത്യൻ ഉൽപ്പന്നങ്ങളുടെ മേലുള്ള ഇറക്കുമതി നികുതി 25 ശതമാനത്തിൽ നിന്ന് 18 ശതമാനമായി ട്രംപ് ഭരണകൂടം കുറച്ചിട്ടുണ്ട്. ഇത് ഉടനടി പ്രാബല്യത്തിൽ വരും. ഈ നികുതി ഇളവ് ഇന്ത്യൻ കയറ്റുമതിക്കാർക്ക്, പ്രത്യേകിച്ച് ഫാർമസ്യൂട്ടിക്കൽസ്, പുനരുപയോഗ ഊർജ്ജം, നിർമ്മാണ മേഖല എന്നിവയ്ക്ക് വലിയ ഗുണം ചെയ്യും. തൊഴിലവസരങ്ങൾ സൃഷ്ടിക്കുന്നതിനും സാമ്പത്തിക വളർച്ചയ്ക്കും 'മേക് ഇൻ ഇന്ത്യ' പദ്ധതിക്കും ഈ കരാർ വലിയ പിന്തുണ നൽകുമെന്ന് ജയശങ്കർ ചൂണ്ടിക്കാട്ടി.ചൈനയെ ആശ്രയിക്കുന്നത് കുറയ്ക്കുന്നതിനും ആഗോള സപ്ലൈ ചെയിനിൽ ഇന്ത്യയുടെ സ്ഥാനം ഉറപ്പിക്കുന്നതിനും ഈ സന്ദർശനം വഴിത്തിരിവാകും. ഇന്ത്യ ഏതാണ്ട് 500 ബില്യൺ ഡോളറിന്റെ അമേരിക്കൻ ഉൽപ്പന്നങ്ങൾ വാങ്ങുമെന്ന സൂചനകളും ഈ കരാറിന്റെ ഭാഗമായി പുറത്തുവരുന്നുണ്ട്.