ഡൽഹിയിലെ രാഷ്ട്രപതി ഭവന്റെ അഭിമാനമായ അമൃത് ഉദ്യാനം (മുൻപ് മുഗൾ ഗാർഡൻ) ഈ വർഷത്തെ സന്ദർശനത്തിനായി ഒരുങ്ങിക്കഴിഞ്ഞു. ഫെബ്രുവരി 3 മുതൽ മാർച്ച് 31 വരെയാണ് പൊതുജനങ്ങൾക്ക് ഉദ്യാനത്തിൽ പ്രവേശനം അനുവദിക്കുന്നത്. 'ഉദ്യാൻ ഉത്സവ്' എന്നറിയപ്പെടുന്ന ഈ കാലയളവിൽ ലോകത്തിന്റെ വിവിധ ഭാഗങ്ങളിൽ നിന്നുള്ള പുഷ്പവൈവിധ്യങ്ങൾ കാണാൻ ആയിരക്കണക്കിന് ആളുകളാണ് തലസ്ഥാനത്തെത്തുന്നത്.തിങ്കളാഴ്ചകൾ ഒഴികെയുള്ള ആറ് ദിവസങ്ങളിൽ രാവിലെ 10 മണി മുതൽ വൈകിട്ട് 6 മണി വരെയാണ് സന്ദർശന സമയം. വൈകിട്ട് 5:15-ന് ശേഷം ആരെയും ഉദ്യാനത്തിനകത്തേക്ക് പ്രവേശിപ്പിക്കില്ല. അറ്റകുറ്റപ്പണികൾക്കായി തിങ്കളാഴ്ചകളിൽ ഉദ്യാനം അടച്ചിടും. കൂടാതെ, ഹോളി പ്രമാണിച്ച് മാർച്ച് 4-നും സന്ദർശകർക്ക് പ്രവേശനമുണ്ടായിരിക്കില്ല. രാഷ്ട്രപതി ഭവൻ എസ്റ്റേറ്റിലെ ഗേറ്റ് നമ്പർ 35 വഴിയാണ് (നോർത്ത് അവന്യൂവിന് സമീപം) സന്ദർശകർ പ്രവേശിക്കേണ്ടതും പുറത്തിറങ്ങേണ്ടതും.അമൃത് ഉദ്യാനത്തിലേക്കുള്ള പ്രവേശനം പൂർണ്ണമായും സൗജന്യമാണ്. തിരക്ക് ഒഴിവാക്കുന്നതിനായി രാഷ്ട്രപതി ഭവന്റെ ഔദ്യോഗിക വെബ്സൈറ്റ് ([https://visit.rashtrapatibhavan.gov.in/](https://visit.rashtrapatibhavan.gov.in/)) വഴി മുൻകൂട്ടി ടിക്കറ്റുകൾ ബുക്ക് ചെയ്യാവുന്നതാണ്. ഓൺലൈൻ ബുക്കിംഗ് ഇല്ലാതെ എത്തുന്നവർക്കായി ഗേറ്റ് നമ്പർ 35-ന് സമീപം സെൽഫ് സർവീസ് രജിസ്ട്രേഷൻ കിയോസ്കുകളും സജ്ജീകരിച്ചിട്ടുണ്ട്.സന്ദർശകരുടെ സൗകര്യം കണക്കിലെടുത്ത് സെൻട്രൽ സെക്രട്ടേറിയറ്റ് മെട്രോ സ്റ്റേഷനിൽ നിന്ന് ഗേറ്റ് നമ്പർ 35-ലേക്ക് ഓരോ 30 മിനിറ്റ് കൂടുമ്പോഴും ഷട്ടിൽ ബസ് സർവീസ് ഉണ്ടായിരിക്കും. രാവിലെ 9:30 മുതൽ വൈകിട്ട് 6 മണി വരെ ലഭ്യമാകുന്ന ഈ ബസ്സുകളിൽ 'Shuttle Service for Amrit Udyan' എന്ന ബോർഡ് പ്രദർശിപ്പിച്ചിരിക്കും.15 ഏക്കറിലായി വ്യാപിച്ചു കിടക്കുന്ന അമൃത് ഉദ്യാനത്തെ രാഷ്ട്രപതി ഭവന്റെ ആത്മാവ് എന്നാണ് വിശേഷിപ്പിക്കുന്നത്. മുഗൾ ശൈലിയും ഇംഗ്ലീഷ് ഗാർഡൻ ശൈലിയും ഒത്തുചേരുന്ന ഇവിടെ ഈസ്റ്റ് ലോൺ, സെൻട്രൽ ലോൺ, ലോംഗ് ഗാർഡൻ, സർക്കുലർ ഗാർഡൻ എന്നിങ്ങനെ വിവിധ ഭാഗങ്ങളുണ്ട്. 159 ഇനം റോസാപ്പൂക്കൾ, 10,000-ത്തോളം ട്യൂലിപ് പൂക്കൾ, സീസണൽ പുഷ്പങ്ങൾ എന്നിവ ഇത്തവണത്തെ പ്രധാന ആകർഷണങ്ങളാണ്. ബോൺസായ് ഗാർഡൻ, മ്യൂസിക്കൽ ഫൗണ്ടൻ എന്നിവയും സന്ദർശകർക്ക് ആസ്വദിക്കാം