ഗ്രീൻലൻഡ് വിഷയത്തിൽ ഡെന്മാർക്ക് ഉൾപ്പെടെയുള്ള യൂറോപ്യൻ രാജ്യങ്ങൾക്കെതിരെ ഏർപ്പെടുത്താനിരുന്ന കടുത്ത താരിഫ് ഭീഷണിയിൽ നിന്ന് യുഎസ് പ്രസിഡന്റ് ഡൊണാൾഡ് ട്രംപ് പിൻവാങ്ങി. സ്വിറ്റ്സർലൻഡിലെ ദാവോസിൽ നടക്കുന്ന ലോക സാമ്പത്തിക ഫോറത്തിനിടെ നാറ്റോ സെക്രട്ടറി ജനറൽ മാർക്ക് റൂട്ടെയുമായി നടത്തിയ നിർണ്ണായക ചർച്ചയ്ക്ക് പിന്നാലെയാണ് ട്രംപിന്റെ ഈ നയതന്ത്ര പിൻമാറ്റം. ഫെബ്രുവരി 1 മുതൽ പ്രാബല്യത്തിൽ വരാനിരുന്ന താരിഫുകൾ ഇനി ഉണ്ടാകില്ലെന്ന് അദ്ദേഹം വ്യക്തമാക്കി.തന്റെ ട്രൂത്ത് സോഷ്യൽ പ്ലാറ്റ്‌ഫോമിലൂടെയാണ് ട്രംപ് ഈ വിവരം പങ്കുവെച്ചത്. നാറ്റോ തലവനുമായി നടത്തിയ കൂടിക്കാഴ്ച അത്യന്തം ഫലപ്രദമായിരുന്നുവെന്നും ഗ്രീൻലൻഡിന്റെയും ആർട്ടിക് മേഖലയുടെയും ഭാവി സുരക്ഷാ കാര്യങ്ങളിൽ ഇരുപക്ഷവും ഒരു പൊതു ധാരണയിൽ എത്തിയതായും ട്രംപ് പറഞ്ഞു.ഈ പുതിയ കരാർ അമേരിക്കയ്ക്കും നാറ്റോ സഖ്യകക്ഷികൾക്കും ഒരുപോലെ ഗുണകരമാകുമെന്നും അദ്ദേഹം കൂട്ടിച്ചേർത്തു. ഗ്രീൻലൻഡിലെ ഖനി നിക്ഷേപങ്ങളും സുരക്ഷാ സംവിധാനങ്ങളുമായി ബന്ധപ്പെട്ട "ഗോൾഡൻ ഡോം" ചർച്ചകൾ തുടരുമെന്നും വൈസ് പ്രസിഡന്റ് ജെഡി വാൻസ്, വിദേശകാര്യ സെക്രട്ടറി മാർക്കോ റൂബിയോ എന്നിവരുടെ നേതൃത്വത്തിലുള്ള സംഘം ഇതിന് മേൽനോട്ടം വഹിക്കുമെന്നും അദ്ദേഹം അറിയിച്ചു.സഖ്യകക്ഷികൾ എന്നും വാഷിംഗ്ടണിനൊപ്പം നിൽക്കുമെന്ന് മാർക്ക് റൂട്ടെ ട്രംപിന് ഉറപ്പ് നൽകി. സെപ്റ്റംബർ 11 ആക്രമണത്തിന് ശേഷം നാറ്റോ സൈന്യം അഫ്ഗാനിസ്ഥാനിൽ അമേരിക്കയ്ക്കൊപ്പം പോരാടിയത് അദ്ദേഹം ചൂണ്ടിക്കാട്ടി. റൂട്ടെയുടെ വാക്കുകളെ ട്രംപ് പ്രശംസിച്ചു.നേരത്തെ ഗ്രീൻലൻഡ് പിടിച്ചെടുക്കാൻ സൈനിക ശക്തി ഉപയോഗിക്കില്ലെന്ന് ട്രംപ് ദാവോസിൽ പ്രഖ്യാപിച്ചിരുന്നു. ഗ്രീൻലൻഡിനെ വെറുമൊരു "ഐസ് കഷ്ണം" എന്ന് വിശേഷിപ്പിച്ച അദ്ദേഹം, ദശാബ്ദങ്ങളായി യൂറോപ്പിനെ സംരക്ഷിക്കുന്ന അമേരിക്കയ്ക്ക് പകരമായി ആ പ്രദേശം നൽകുന്നത് ചെറിയൊരു ആവശ്യമാണെന്നും വാദിച്ചു.താരിഫ് പിൻവലിക്കാനുള്ള ട്രംപിന്റെ തീരുമാനത്തെ ഡെന്മാർക്ക് വിദേശകാര്യ മന്ത്രി ലാർസ് ലോക്കെ റാസ്മുസെൻ സ്വാഗതം ചെയ്തു. ഗ്രീൻലൻഡിനെ സ്വന്തമാക്കാനുള്ള ട്രംപിന്റെ മോഹം ഇപ്പോഴും അവസാനിച്ചിട്ടില്ലെങ്കിലും, സൈനിക ശക്തി ഉപയോഗിക്കില്ലെന്ന പ്രഖ്യാപനം പോസിറ്റീവ് ആണെന്ന് അദ്ദേഹം പറഞ്ഞു. എങ്കിലും ഗ്രീൻലൻഡിന്റെ പരമാധികാരത്തിൽ വിട്ടുവീഴ്ചയില്ലെന്ന് അദ്ദേഹം ആവർത്തിച്ചു.ട്രംപിന്റെ പ്രഖ്യാപനത്തിന് മണിക്കൂറുകൾക്ക് മുമ്പ്, അമേരിക്കയുമായുള്ള വ്യാപാര കരാർ മരവിപ്പിക്കാൻ യൂറോപ്യൻ പാർലമെന്റ് തീരുമാനിച്ചിരുന്നു. ഗ്രീൻലൻഡ് വിഷയത്തിൽ ട്രംപ് തുടർച്ചയായി ഭീഷണി മുഴക്കുന്ന സാഹചര്യത്തിലായിരുന്നു ഈ നീക്കം. ട്രംപിന്റെ പുതിയ നിലപാട് ഈ വ്യാപാര ബന്ധങ്ങളിൽ മാറ്റമുണ്ടാക്കുമോ എന്ന് വരും ദിവസങ്ങളിൽ വ്യക്തമാകും.