അഫ്ഗാനിസ്ഥാന്റെ മണ്ണ് മറ്റൊരു രാജ്യത്തിനെതിരെയും ഉപയോഗിക്കാൻ അനുവദിക്കില്ലെന്ന് ഉറപ്പ് നൽകി വിദേശകാര്യ മന്ത്രി ആമിർ ഖാൻ മുത്തഖി. ഡൽഹിയിൽ വിദേശകാര്യ മന്ത്രി എസ് ജയശങ്കറുമായി കൂടിക്കാഴ്ച നടത്തിയ ശേഷമാണിത്. ഇരുരാജ്യങ്ങളും ഭീകരവാദത്തിന് എതിരെ ഒന്നിക്കാൻ ധാരണയായിരുന്നു. ജയ്ശങ്കറുമായുള്ള തന്റെ ചർച്ചകൾ "ഫലപ്രദവും ഭാവിയെക്കുറിച്ചുള്ളതുമായിരുന്നു" എന്ന് മുത്തഖി പറഞ്ഞു. 

വ്യാപാരം, വികസനം, സുരക്ഷ എന്നിവയിൽ സഹകരണം കൂടുതൽ ആഴത്തിലാക്കാൻ ഇരുപക്ഷവും സമ്മതിച്ചു. "അഫ്ഗാനിസ്ഥാനിൽ വികസന പദ്ധതികൾ തുടരാനും അവരുടെ വ്യാപ്തി വികസിപ്പിക്കാനുമുള്ള ഇന്ത്യയുടെ തീരുമാനത്തെ ഞങ്ങൾ സ്വാഗതം ചെയ്യുന്നു," സമീപകാല ഭൂകമ്പങ്ങളിലും വെള്ളപ്പൊക്കങ്ങളിലും ഇന്ത്യ നൽകിയ മാനുഷിക പിന്തുണയ്ക്ക് അദ്ദേഹം നന്ദി പറയുകയും ചെയ്തു. 

2021-ൽ താലിബാൻ ഏറ്റെടുത്തതിനുശേഷം ഏറെക്കുറെ സ്തംഭിച്ചുപോയ സാമ്പത്തിക ഇടപെടൽ പുനരുജ്ജീവിപ്പിക്കാനുള്ള ശ്രമത്തിന്റെ സൂചനയായി, "ഉഭയകക്ഷി വ്യാപാരത്തിന്റെ തടസ്സങ്ങൾ നീക്കുന്നതിനായി" ഇരു രാജ്യങ്ങളും ഒരു സംയുക്ത വ്യാപാര സമിതി രൂപീകരിക്കാൻ തീരുമാനിച്ചതായി മുത്തഖി പ്രഖ്യാപിച്ചു. സുരക്ഷാ രംഗത്ത്, താലിബാൻ സർക്കാർ പ്രാദേശിക സ്ഥിരത ഉറപ്പാക്കാൻ പ്രതിജ്ഞാബദ്ധമാണെന്ന് മുത്തഖി ഊന്നിപ്പറഞ്ഞു.

സുരക്ഷാ സഹകരണത്തെക്കുറിച്ച് ഞങ്ങൾ വിശദമായ ചർച്ച നടത്തി. അഫ്ഗാൻ പ്രദേശം ഒരു രാജ്യത്തിനെതിരെയും ഉപയോഗിക്കാൻ ഞങ്ങൾ അനുവദിക്കില്ല. ഈ വിഷയത്തിൽ ഇരുപക്ഷവും ബന്ധം തുടരും' അദ്ദേഹം പറഞ്ഞു, മേഖലയിൽ പ്രവർത്തിക്കുന്ന ഭീകര ശൃംഖലകളെക്കുറിച്ചുള്ള ഇന്ത്യയുടെ ദീർഘകാല ആശങ്കകൾ ലഘൂകരിക്കുമെന്നും അദ്ദേഹം വ്യക്തമാക്കി. 

ജയ്ശങ്കറും മുത്താക്കിയും തമ്മിലുള്ള കൂടിക്കാഴ്ച പ്രധാനമായും അഫ്ഗാനിസ്ഥാനിൽ ഇന്ത്യയുടെ നിലവിലുള്ള വികസന സഹായവും ഭാവിയിലെ സുരക്ഷാ സഹകരണവുമാണ് കേന്ദ്രീകരിച്ചതെന്ന് വൃത്തങ്ങൾ അറിയിച്ചു. കഴിഞ്ഞ രണ്ട് പതിറ്റാണ്ടുകളായി റോഡുകൾ, സ്കൂളുകൾ, ആശുപത്രികൾ, പാർലമെന്റ് മന്ദിരം എന്നിവയുൾപ്പെടെ അഫ്ഗാനിസ്ഥാനിലെ വിവിധ പുനർനിർമ്മാണ പദ്ധതികളിൽ ഇന്ത്യ 3 ബില്യൺ ഡോളറിലധികം നിക്ഷേപിച്ചിട്ടുണ്ട്.