കേരള ക്രിക്കറ്റ് ലീ​ഗിൽ കന്നി സെഞ്ച്വറി നേടി സഞ്ജു സാംസൺ. ഏരീസ് കൊല്ലം സെയ്ലേഴ്സിനെതിരെ 42 പന്തിലാണ് താരം അതിവേ​ഗ സെഞ്ചുറി തികച്ചത്. 16 പന്തിൽ അർധസെഞ്ചുറി തികച്ച സഞ്ജു പിന്നാലെയാണ് സെഞ്ച്വറി നേട്ടവും സ്വന്തം പേരിലാക്കിയത്. കൊല്ലം ഉയർത്തിയ 237 റൺസെന്ന കൂറ്റൻ വിജയലക്ഷ്യവുമായി മറുപടി ബാറ്റിങ്ങിനിറങ്ങിയതാണ് സഞ്ജു അടങ്ങിയ കൊച്ചി ബ്ലൂ ടൈ​ഗേഴ്സ്

മത്സരത്തിൽ ഏരീസ് കൊല്ലത്തെ കൊച്ചി ബ്ലൂ ടൈഗേഴ്സ് നാല് വിക്കറ്റിന് തോൽപ്പിച്ചു. ആറ് വിക്കറ്റ് നഷ്ടത്തിൽ കൂറ്റൻ വിജയലക്ഷ്യമായ 237 റൺസ് കൊച്ചി മറികടന്നു.

 ആദ്യ മത്സരങ്ങളിൽ തിളങ്ങാനാവാതിരുന്ന സഞ്ജുവിനെതിരെ സമൂഹമാധ്യമങ്ങളിൽ അടക്കം വലിയ ട്രോളുകൾ പ്രത്യക്ഷപ്പെട്ടിരുന്നു. ഏഷ്യാ കപ്പിനുള്ള ഇന്ത്യൻ ടീമിൽ ഇടംപിടിച്ചതിന് ശേഷമുള്ള താരത്തിന്റെ മിന്നും പ്രകടനമാണിത്. കൊല്ലം ബൗളർമാരെ തകർത്തടിച്ച സഞ്ജുവിന്റെ പ്രകടനം കാണികളിലും വലിയ ആവേശമുണ്ടാക്കി. 

ഇക്കുറി ഓപ്പണറായാണ് സഞ്ജു ഇറങ്ങിയത്. ആദ്യ ഓവർ മുതൽ വെടിക്കെട്ടിന് തിരികൊളുത്തി പ്രകടനമാണ് കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടന്നത്. ഏരീസ് കൊല്ലത്തിനായി പന്തെറിഞ്ഞവരെല്ലാം സഞ്ജുവിന്റെ ബാറ്റിന്റെ ചൂടറിഞ്ഞു. 16 പന്തിൽ സഞ്ജു അർധസെഞ്ചുറി തികച്ചപ്പോൾ ടീം നാലോവറിൽ 64 റൺസെന്ന നിലയിലായിരുന്നു

വിനൂപ് മനോഹരൻ പുറത്തായെങ്കിലും സഞ്ജു കുലുങ്ങിയില്ല.  മുഹമ്മദ് ഷാനുവുമൊത്ത് സഞ്ജു സ്കോറുയർത്തി. വെറും 10 ഓവറിൽ 139 റൺസാണ് കൊച്ചി അടിച്ചുകൂട്ടിയത്. പിന്നാലെ 13 ഫോറുകളും അഞ്ച് സിക്സറുകളും അടങ്ങുന്ന കന്നി സെഞ്ച്വറിയും സഞ്ജു തികച്ചു. 51 പന്തിൽ 121 റൺസെടുത്താണ് താരം പുറത്തായത്. 14 ഫോറും ഏഴ് സിക്സും അടങ്ങുന്നതാണ് ഈ തകർപ്പൻ ഇന്നിംഗ്സ്.

നേരത്തെ ആദ്യം ബാറ്റുചെയ്ത ഏരീസ് കൊല്ലം സെയ്‌ലേഴ്‌സ് നിശ്ചിത 20 ഓവറില്‍ അഞ്ച് വിക്കറ്റ് നഷ്ടത്തില്‍ 236 റണ്‍സാണെടുത്തിരുന്നു. ഈ സീസണിലെ ഏറ്റവും ഉയർന്ന ടീം സ്കോറാണിത്. വിഷ്ണു വിനോദും നായകന്‍ സച്ചിന്‍ ബേബിയും അര്‍ധസെഞ്ചുറി നേടി. വിഷ്ണു 41 പന്തില്‍ നിന്ന് 94 റണ്‍സെടുത്തു. മൂന്ന് ഫോറുകളും 10 സിക്‌സറുകളും അടങ്ങുന്നതായിരുന്നു ഇന്നിങ്‌സ്. 

സച്ചിന്‍ ബേബിയാകട്ടെ 44 പന്തില്‍ നിന്ന് ആറ് വീതം ഫോറുകളുടെയും സിക്‌സറുകളുടെയും അകമ്പടിയോടെ 91 റണ്‍സെടുത്തു. കൊച്ചിക്ക് വേണ്ടി പി.എസ്.ജെറിൻ രണ്ട് വിക്കറ്റും സാലി സാംസൺ, കെ.എം ആസിഫ്, എം ആഷിഖ് എന്നിവർ ഓരോ വിക്കറ്റ് വീതവും വീഴ്ത്തി.