ഇറാനുമായുള്ള നയതന്ത്ര ചർച്ചകളിൽ പുരോഗതി പ്രകടമായതിനെത്തുടർന്ന് ഹോർമുസ് കടലിടുക്കിലൂടെയുള്ള കപ്പലുകളുടെ സഞ്ചാരം ഉറപ്പാക്കാൻ ലക്ഷ്യമിട്ടുള്ള 'പ്രോജക്ട് ഫ്രീഡം' താൽക്കാലികമായി നിർത്തിവെക്കുന്നതായി യുഎസ് പ്രസിഡന്റ് ഡൊണാൾഡ് ട്രംപ് അറിയിച്ചു.പാകിസ്ഥാൻ ഉൾപ്പെടെയുള്ള രാജ്യങ്ങളുടെ അഭ്യർത്ഥന മാനിച്ചും ഇറാനെതിരായ സൈനിക നീക്കങ്ങളിൽ വൻ വിജയം കൈവരിച്ച സാഹചര്യത്തിലുമാണ് ഈ തീരുമാനമെന്ന് ട്രംപ് തന്റെ സോഷ്യൽ മീഡിയ പ്ലാറ്റ്‌ഫോമായ ട്രൂത്ത് സോഷ്യലിലൂടെ വ്യക്തമാക്കി.ഇറാനുമായുള്ള ചർച്ചകൾ ഒരു പൂർണ്ണമായ കരാറിന് (Complete and Final Agreement) അടുത്താണെന്നും ചർച്ചകളിൽ വലിയ പുരോഗതിയുണ്ടെന്നും ട്രംപ് കുറിച്ചു. കരാർ ഒപ്പിടുന്നതിന്റെയും അത് നടപ്പിലാകുന്നതിന്റെയും സാധ്യതകൾ പരിശോധിക്കാനാണ് ഈ താൽക്കാലിക പിന്മാറ്റമെന്ന് അദ്ദേഹം വിശദീകരിച്ചു.

എന്നാൽ കടൽമാർഗമുള്ള നീക്കങ്ങൾ നിർത്തിവെച്ചാലും ഇറാനുമേലുള്ള ഉപരോധം മാറ്റമില്ലാതെ തുടരുമെന്നും അദ്ദേഹം വ്യക്തമാക്കി. ഉപരോധം പൂർണ്ണ ശക്തിയോടെ നിലനിൽക്കുമെന്നും ചുരുങ്ങിയ കാലയളവിലേക്ക് മാത്രമായിരിക്കും പ്രോജക്ട് ഫ്രീഡം നിർത്തിവെക്കുകയെന്നും ട്രംപ് കൂട്ടിച്ചേർത്തു.മേഖലയിലെ സംഘർഷങ്ങൾക്കിടയിൽ ഹോർമുസ് കടലിടുക്കിൽ കുടുങ്ങിക്കിടക്കുന്ന വിദേശ കപ്പലുകളെ സുരക്ഷിതമായി പുറത്തെത്തിക്കുന്നതിനായി ട്രംപ് പ്രഖ്യാപിച്ച പദ്ധതിയാണിത്. സംഘർഷത്തിൽ നേരിട്ട് പങ്കാളികളല്ലാത്ത രാജ്യങ്ങളുടെ കപ്പലുകളെ സഹായിക്കുകയാണ് ഇതിന്റെ ലക്ഷ്യം.അത്തരം കപ്പലുകളെയും അതിലെ ജീവനക്കാരെയും 'നിഷ്കളങ്കരായ വഴിയാത്രക്കാർ' എന്നാണ് ട്രംപ് വിശേഷിപ്പിച്ചത്. കപ്പലുകളിലെ ഭക്ഷണവും മറ്റ് അവശ്യവസ്തുക്കളും തീരുന്ന സാഹചര്യം കണക്കിലെടുത്ത് മാനുഷിക പരിഗണനയോടെയാണ് ഈ പദ്ധതിയെന്ന് ട്രംപ് അവകാശപ്പെട്ടിരുന്നു.ഇറാന്റെ സൈനിക ശക്തി പൂർണ്ണമായും തകർന്നുവെന്നും അവർ ഇപ്പോൾ 'പീഷൂട്ടറുകൾ' (peashooters) മാത്രമാണ് ഉപയോഗിക്കുന്നതെന്നും ട്രംപ് നേരത്തെ പരിഹസിച്ചിരുന്നു. ഇറാൻ പരസ്യമായി എതിർപ്പ് പ്രകടിപ്പിക്കുന്നുണ്ടെങ്കിലും രഹസ്യമായി കരാറിനായി ശ്രമിക്കുന്നുണ്ടെന്നും അദ്ദേഹം പറഞ്ഞു.യുഎസ് നേതൃത്വത്തിലുള്ള ഇറാൻ തുറമുഖ ഉപരോധം ഉരുക്കുപോലെ ശക്തമാണെന്നും അത് ആർക്കും ഭേദിക്കാനാവില്ലെന്നും അദ്ദേഹം ഓവൽ ഓഫീസിൽ മാധ്യമപ്രവർത്തകരോട് പറഞ്ഞു.

വെടിനിർത്തൽ കരാർ ലംഘിച്ചാൽ കടുത്ത പ്രത്യാഘാതങ്ങൾ നേരിടേണ്ടി വരുമെന്ന് ഇറാനോട് ട്രംപ് മുന്നറിയിപ്പ് നൽകി. ഇറാൻ വെള്ളക്കൊടി കാട്ടി കീഴടങ്ങുകയാണ് വേണ്ടതെന്നും യഥാർത്ഥ പോരാട്ടത്തിൽ അവർക്ക് പിടിച്ചുനിൽക്കാനാവില്ലെന്നും അദ്ദേഹം ആവർത്തിച്ചു.ലോകത്തെ ഏറ്റവും പ്രധാനപ്പെട്ട എണ്ണ വ്യാപാര പാതയായ ഹോർമുസ് കടലിടുക്കിലെ ഈ പുതിയ മാറ്റങ്ങൾ ആഗോള ഊർജ്ജ വിപണിയിൽ വലിയ സ്വാധീനം ചെലുത്താൻ സാധ്യതയുണ്ട്. നയതന്ത്ര ചർച്ചകളിലൂടെ സംഘർഷം അയയുന്നു എന്ന സൂചനയുണ്ടെങ്കിലും ഉപരോധം തുടരുന്നത് മേഖലയിൽ അസ്ഥിരത നിലനിൽക്കുന്നു എന്ന് തന്നെയാണ് വ്യക്തമാക്കുന്നത്.