സ്വന്തം രാജ്യത്തെ ആദ്യത്തെ ബഹിരാകാശ സഞ്ചാരിയെ വിണ്ണിലെത്തിക്കാനൊരുങ്ങി പാകിസ്ഥാൻ. ചൈനയുടെ ടിയാൻഗോങ് ബഹിരാകാശ നിലയത്തിലേക്കുള്ള (Tiangong Space Station) ചരിത്രപരമായ ദൗത്യത്തിനായി പാകിസ്ഥാൻ രണ്ട് ബഹിരാകാശ സഞ്ചാരികളെ ഷോർട്ട്ലിസ്റ്റ് ചെയ്തു.2026 ഒക്ടോബറിലോ നവംബറിലോ ആയിരിക്കും ഈ വിക്ഷേപണം നടക്കുക എന്ന് പാകിസ്ഥാൻ്റെ ഔദ്യോഗിക ബഹിരാകാശ ഏജൻസിയായ സുപാർകോ (Suparco) അറിയിച്ചു. ചൈനീസ് ബഹിരാകാശ നിലയത്തിൽ താമസിക്കുന്ന ആദ്യ വിദേശ സഞ്ചാരി എന്ന ബഹുമതിയും ഈ ദൗത്യത്തിലൂടെ പാക് പ്രതിനിധിക്ക് ലഭിക്കും.പാകിസ്ഥാനിൽ നടന്ന പ്രാഥമിക സ്ക്രീനിംഗിന് ശേഷം തിരഞ്ഞെടുക്കപ്പെട്ടവർ ചൈനയിലെ അസ്‌ട്രോനോട്ട്സ് സെന്ററിൽ (ACC) വെച്ച് നടന്ന കഠിനമായ ശാരീരിക-മാനസിക പരിശോധനകൾ വിജയകരമായി പൂർത്തിയാക്കി. അന്താരാഷ്ട്ര നിലവാരത്തിലുള്ള മെഡിക്കൽ, സൈക്കോളജിക്കൽ ടെസ്റ്റുകൾക്ക് ശേഷമാണ് രണ്ട് പേരെ അന്തിമ പട്ടികയിൽ ഉൾപ്പെടുത്തിയത്.ഇവരുടെ പേരുകൾ നിലവിൽ പുറത്തുവിട്ടിട്ടില്ല. ഈ രണ്ട് പേർക്കും ചൈനയിൽ വെച്ച് ആറ് മാസത്തെ അത്യാധുനിക പരിശീലനം നൽകും. പരിശീലനം പൂർത്തിയാക്കുന്നവരിൽ നിന്ന് ഏറ്റവും മികച്ച ഒരാളെയായിരിക്കും ഒക്ടോബറിൽ ബഹിരാകാശത്തേക്ക് അയക്കുക.2025 ഫെബ്രുവരിയിൽ പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫിൻ്റെ നേതൃത്വത്തിൽ ചൈനയുമായി ഒപ്പിട്ട 'അസ്‌ട്രോനോട്ട് കോപ്പറേഷൻ എഗ്രിമെന്റ്' പ്രകാരമാണ് ഈ ദൗത്യം നടപ്പിലാക്കുന്നത്. ചൈന തങ്ങളുടെ ബഹിരാകാശ പദ്ധതിയിൽ ആദ്യമായി പങ്കാളിയാക്കുന്ന വിദേശ രാജ്യമാണ് പാകിസ്ഥാൻ.

പരീക്ഷണങ്ങൾ നടത്താനുള്ള പേലോഡ് സ്പെഷ്യലിസ്റ്റ് (Payload Specialist) എന്ന നിലയിലായിരിക്കും പാക് സഞ്ചാരി ദൗത്യത്തിൽ പങ്കെടുക്കുക. നാലോ അഞ്ചോ ദിവസം നീണ്ടുനിൽക്കുന്ന യാത്രയിൽ പാകിസ്ഥാന് വേണ്ടി വിവിധ ശാസ്ത്ര പരീക്ഷണങ്ങൾ ഇവർ നിലയത്തിൽ വെച്ച് നടത്തും.ബഹിരാകാശ രംഗത്ത് ഇന്ത്യയുടെ ഐഎസ്ആർഒ (ISRO) കൈവരിച്ച വൻ നേട്ടങ്ങൾക്ക് പിന്നാലെയാണ് ചൈനയുടെ സഹായത്തോടെയെങ്കിലും കരുത്ത് തെളിയിക്കാൻ പാകിസ്ഥാൻ ശ്രമിക്കുന്നത്. 2026-ൽ ചൈനയുടെ സഹായത്തോടെ ചന്ദ്രനിലേക്ക് ഉപഗ്രഹം അയക്കാനും 2035-ഓടെ കൂടുതൽ വിപുലമായ ചാന്ദ്ര ദൗത്യങ്ങൾ നടത്താനും പാകിസ്ഥാന് പദ്ധതിയുണ്ട്.ഉറാൻ പാകിസ്ഥാൻ' (Uraan Pakistan) എന്ന പദ്ധതിയുടെ ഭാഗമായാണ് ഇത്തരം പ്രവർത്തനങ്ങൾ നടക്കുന്നത്. ബഹിരാകാശ സാങ്കേതിക വിദ്യയിൽ ചൈനയുമായുള്ള സഹകരണം പാകിസ്ഥാന്റെ സൈനിക-സാങ്കേതിക മേഖലകളിൽ വലിയ മാറ്റങ്ങൾ വരുത്തുമെന്നാണ് വിലയിരുത്തപ്പെടുന്നത്.

'