ദേശീയ തലസ്ഥാനവും പരിസര പ്രദേശങ്ങളും തിങ്കളാഴ്ച രാവിലെ അതിശക്തമായ മൂടൽമഞ്ഞിലും പുകമഞ്ഞിലും (Smog) അമർന്നു. കാഴ്ചപരിധി ഗണ്യമായി കുറഞ്ഞതോടെ റോഡ്, വ്യോമ ഗതാഗതങ്ങൾ താറുമാറായി.

ഡൽഹി അന്താരാഷ്ട്ര വിമാനത്താവളത്തിൽ കാഴ്ചപരിധി കുറഞ്ഞതിനെത്തുടർന്ന് വിമാന സർവീസുകൾക്ക് നിയന്ത്രണം ഏർപ്പെടുത്തിയിരിക്കുകയാണ്. വിമാനങ്ങൾ വൈകാൻ സാധ്യതയുള്ളതിനാൽ യാത്രക്കാർ അതത് എയർലൈനുകളുമായി ബന്ധപ്പെടണമെന്ന് വിമാനത്താവള അധികൃതർ നിർദ്ദേശിച്ചു.

ഡൽഹിയുടെ വിവിധ ഭാഗങ്ങളിൽ കാഴ്ചപരിധി 50 മീറ്ററിൽ താഴെയായി കുറഞ്ഞു. ധൗല കുവാൻ, അക്ഷർധാം തുടങ്ങിയ പ്രധാന മേഖലകളിൽ വാഹനങ്ങൾ വളരെ സാവധാനത്തിലാണ് നീങ്ങുന്നത്. കനത്ത മൂടൽമഞ്ഞ് കാരണം ഡ്രൈവർമാർക്ക് മുൻപിലെ റോഡ് കാണാൻ പ്രയാസപ്പെടുന്നത് ഗതാഗതക്കുരുക്കിന് കാരണമായി. വരും മണിക്കൂറുകളിൽ സ്ഥിതി കൂടുതൽ വഷളാകാൻ സാധ്യതയുണ്ടെന്നാണ് ഔദ്യോഗിക വിവരം.

അതിശക്തമായ മൂടൽമഞ്ഞ് കാരണം ഡൽഹി വിമാനത്താവളത്തിൽ കാറ്റ് III (CAT III) സംവിധാനത്തിലാണ് പ്രവർത്തനങ്ങൾ നടക്കുന്നത്. കാഴ്ചപരിധി 50 മീറ്റർ വരെയുള്ള സാഹചര്യത്തിലും വിമാനങ്ങൾ സുരക്ഷിതമായി ഇറക്കാൻ സഹായിക്കുന്ന അത്യാധുനിക ഇൻസ്ട്രുമെന്റ് ലാൻഡിംഗ് സിസ്റ്റമാണിത്.എങ്കിലും വിമാനങ്ങൾ പുറപ്പെടുന്നതിലും എത്തിച്ചേരുന്നതിലും കാലതാമസം നേരിടുന്നുണ്ട്. സ്പൈസ് ജെറ്റ് ഉൾപ്പെടെയുള്ള വിമാനക്കമ്പനികൾ യാത്രക്കാർക്കായി പ്രത്യേക നിർദ്ദേശങ്ങൾ പുറപ്പെടുവിച്ചു.

ഡൽഹിക്ക് പുറമെ ഉത്തർപ്രദേശിലെ ആഗ്ര, ബറേലി, ഹിൻഡൻ, പഞ്ചാബിലെ ഭട്ടിൻഡ തുടങ്ങിയ വിമാനത്താവളങ്ങളിലും കാഴ്ചപരിധി പൂജ്യമായി കുറഞ്ഞു. വെസ്റ്റ് ഉത്തർപ്രദേശ്, ഡൽഹി എന്നിവിടങ്ങളിൽ അതിശക്തമായ മൂടൽമഞ്ഞിന് സാധ്യതയുള്ളതിനാൽ കാലാവസ്ഥാ നിരീക്ഷണ കേന്ദ്രം ഓറഞ്ച്, റെഡ് അലർട്ടുകൾ പ്രഖ്യാപിച്ചിട്ടുണ്ട്. വരും ദിവസങ്ങളിലും ഈ സാഹചര്യം തുടരാനാണ് സാധ്യത.ഡൽഹിയിലെ ശരാശരി വായുനിലവാര സൂചിക (AQI) തിങ്കളാഴ്ച രാവിലെ 196 ആയി രേഖപ്പെടുത്തി. നോയിഡ, ഗാസിയാബാദ് എന്നിവിടങ്ങളിൽ വായുനിലവാരം 'മോശം' വിഭാഗത്തിലാണ്. ഡൽഹിയിൽ കുറഞ്ഞ താപനില 11 ഡിഗ്രി സെൽഷ്യസും കൂടിയ താപനില 21 ഡിഗ്രി സെൽഷ്യസും ആയിരിക്കുമെന്ന് കാലാവസ്ഥാ വകുപ്പ് പ്രവചിച്ചു. ഫെബ്രുവരി മാസത്തിൽ താപനില സാധാരണയേക്കാൾ ഉയരാൻ സാധ്യതയുള്ളതിനാൽ ഇത്തവണ തണുപ്പ് നേരത്തെ കുറഞ്ഞേക്കുമെന്നും റിപ്പോർട്ടുകളുണ്ട്.