ഡൽഹിയിൽ വിദ്യാർത്ഥിക്ക് പെല്ലറ്റ് ആക്രമണത്തിൽ പരിക്കേറ്റ സംഭവത്തിൽ കേസെടുക്കണമെന്നാവശ്യപ്പെട്ട് പ്രതിപക്ഷ നേതാവ് രാഹുൽ ഗാന്ധി നടത്തിയ മിന്നൽ സമരം വിജയം കണ്ടു. പൊലീസിന്റെ കുത്തിയിരിപ്പ് സമരത്തിനൊടുവിൽ ഡൽഹി പൊലീസ് കേസ് രജിസ്റ്റർ ചെയ്തു. വിദ്യാർത്ഥിയുടെ മൊഴി രേഖപ്പെടുത്തിയ ശേഷം കൂടുതൽ വകുപ്പുകൾ ചുമത്തുന്നത് ആലോചിക്കുമെന്ന് പൊലീസ് വൃത്തങ്ങൾ വ്യക്തമാക്കി. കേസ് എടുത്തതോടെ രാഹുൽ ഗാന്ധിയും പ്രവർത്തകരും സമരം അവസാനിപ്പിച്ച് മടങ്ങി. അനീതി നേരിടുന്ന ഏവർക്കും രാഹുൽ ഗാന്ധി വീണ്ടും ഹീറോയായി മാറിയെന്ന് കോൺഗ്രസ് നേതൃത്വം പ്രതികരിച്ചു.

പാർലമെന്റ് സ്ട്രീറ്റിലെ സെൻട്രൽ ഡൽഹി ഡി.സി.പി ഓഫീസിന് മുന്നിലായിരുന്നു രാഹുൽ ഗാന്ധി പരിക്കേറ്റ യുവാവിനൊപ്പം കുത്തിയിരിപ്പ് സമരം നടത്തിയത്. സമരക്കാർക്ക് നേരെ പെല്ലറ്റ് ഗൺ ഉപയോഗിച്ചിട്ടില്ലെന്ന ഡൽഹി പൊലീസിന്റെയും സർക്കാരിന്റെയും വാദങ്ങൾ തള്ളിക്കൊണ്ടാണ് രാഹുൽ പ്രതികരിച്ചത്. പരിക്കേറ്റ വിദ്യാർത്ഥിയെയും മെഡിക്കൽ രേഖകളെയും മാധ്യമങ്ങൾക്ക് മുന്നിൽ ഹാജരാക്കി സമരം ശക്തമാക്കിയ രാഹുൽ ഗാന്ധി, ആക്രമണത്തിന് ഉത്തരവാദികളായ ഉന്നതർ ഉൾപ്പെടെയുള്ള കുറ്റക്കാർ ശിക്ഷിക്കപ്പെടണമെന്ന് ആവശ്യപ്പെടുകയും ചെയ്തു.

അതേസമയം രാഹുൽ ഗാന്ധിയുടെ മിന്നൽ സമരത്തിനെതിരെ ബി.ജെ.പി നേതാക്കളായ രവിശങ്കർ പ്രസാദും സ്മൃതി ഇറാനിയും രംഗത്തെത്തി. വിഷയത്തിൽ അന്വേഷണം പുരോഗമിക്കുമ്പോഴും സുപ്രീം കോടതി നിയോഗിച്ച പ്രത്യേക സമിതി വിഷയം പരിശോധിക്കുമ്പോഴും നേരിട്ടെത്തി സമരം നടത്തുന്നത് അരാജകത്വത്തിന്റെ രാഷ്ട്രീയമാണെന്ന് അവർ കുറ്റപ്പെടുത്തി. രാഷ്ട്രീയ മുതലെടുപ്പിനും സ്വാർത്ഥ ലാഭത്തിനുമായി രാഹുൽ ഗാന്ധി വിഷയം ദുരുപയോഗം ചെയ്യുകയാണെന്നും ബി.ജെ.പി ആരോപിച്ചു.