ജനുവരി 26-ന് കർത്തവ്യ പഥിൽ നടക്കുന്ന 77-ാമത് റിപ്പബ്ലിക് ദിന പരേഡിൽ ഇന്ത്യൻ സായുധ സേനയുടെ സംയുക്ത കരുത്ത് വിളിച്ചോതുന്ന ‘ഓപ്പറേഷൻ സിന്ദൂർ: വിക്ടറി ത്രൂ ജോയിന്റ്‌നെസ്’ എന്ന നിശ്ചലദൃശ്യം അവതരിപ്പിക്കും. ഇന്ത്യയുടെ ആധുനിക യുദ്ധതന്ത്രങ്ങളും അത്യാധുനിക ആയുധശേഖരവും മുപ്പടകളുടെ ഏകോപനവും പ്രദർശിപ്പിക്കുന്നതാണ് ഈ ടാബ്ലോ. 2025 മെയ് മാസത്തിൽ പാകിസ്ഥാനിലെ ഭീകരകേന്ദ്രങ്ങൾക്ക് നേരെ ഇന്ത്യ നടത്തിയ ശക്തമായ തിരിച്ചടിയാണ് ഇതിലൂടെ പുനരാവിഷ്കരിക്കപ്പെടുന്നത്.2025 ഏപ്രിൽ 22-ന് പഹൽഗാമിലുണ്ടായ ഭീകരാക്രമണത്തിൽ 26 പേർ കൊല്ലപ്പെട്ടതിന് മറുപടിയായാണ് ഇന്ത്യൻ സൈന്യം മെയ് 7-ന് ‘ഓപ്പറേഷൻ സിന്ദൂർ’ ആരംഭിച്ചത്. 88 മണിക്കൂർ നീണ്ടുനിന്ന ഈ സൈനിക നടപടിയിൽ പാകിസ്ഥാനിലെയും പാക് അധിനിവേശ കശ്മീരിലെയും ഒമ്പതോളം ഭീകരകേന്ദ്രങ്ങൾ തകർത്തു. 1971-ലെ യുദ്ധത്തിന് ശേഷം കര, നാവിക, വ്യോമ സേനകൾ ഒന്നിച്ച് നടത്തിയ ഏറ്റവും വലിയ സംയുക്ത നീക്കമായിരുന്നു ഇത്.പ്രധാനമന്ത്രിയുടെ ‘ആത്മനിർഭർ ഭാരത്’, ‘വികസിത ഭാരതം @ 2047’ എന്നീ ലക്ഷ്യങ്ങൾ മുൻനിർത്തിയാണ് ടാബ്ലോ രൂപകൽപ്പന ചെയ്തിരിക്കുന്നത്. നിശ്ചലദൃശ്യത്തിന്റെ ആദ്യഭാഗത്ത് ഇന്ത്യൻ നാവികസേന സമുദ്രമേഖലയിൽ പുലർത്തുന്ന ആധിപത്യം ചിത്രീകരിക്കുന്നു. തുടർന്ന് ഇന്ത്യൻ കരസേനയുടെ എം777 അൾട്രാ ലൈറ്റ് ഹോവിറ്റ്‌സറുകളും ആകാശ് വ്യോമ പ്രതിരോധ സംവിധാനവും അണിനിരക്കും. ശത്രുക്കളുടെ വ്യോമാക്രമണങ്ങളെ നിഷ്പ്രഭമാക്കിയ ആകാശ് മിസൈലുകളുടെ കരുത്ത് ഇതിൽ എടുത്തു കാട്ടുന്നു.ഇന്ത്യയുടെ വളർന്നുവരുന്ന ഡ്രോൺ യുദ്ധമുറകൾ പ്രദർശിപ്പിക്കുന്നതിനായി ഹരോപ് (HAROP) ലോയിറ്ററിംഗ് മ്യൂണിഷൻ ടാബ്ലോയുടെ ഭാഗമാകും. ഭീകരകേന്ദ്രങ്ങളെ തകർക്കാൻ ഉപയോഗിച്ച റഫാൽ യുദ്ധവിമാനങ്ങൾ, ബ്രഹ്മോസ് മിസൈലുകൾ വഹിക്കുന്ന സുഖോയ്-30 എംകെഐ എന്നിവയും ടാബ്ലോയിൽ ഉണ്ടാകും. ഓപ്പറേഷന്റെ ഏറ്റവും നിർണ്ണായക ഘട്ടമായ എസ്-400 വ്യോമ പ്രതിരോധ സംവിധാനവും ഇതിൽ പ്രദർശിപ്പിക്കും. 350 കിലോമീറ്റർ അകലെയുള്ള ശത്രുവിമാനങ്ങളെ തകർക്കാൻ ശേഷിയുള്ള എസ്-400 ആണ് ഇന്ത്യയുടെ ആകാശം സുരക്ഷിതമാക്കിയത്.ഓപ്പറേഷൻ സിന്ദൂർ നൽകുന്ന പ്രധാന സന്ദേശം ‘ഭീകരതയും രക്തവും ഒരുമിച്ച് ഒഴുകില്ല’ എന്നതാണ്. ഭീകരതയെ പ്രോത്സാഹിപ്പിക്കുന്നവർക്ക് ഇന്ത്യ നൽകുന്ന കൃത്യവും ശക്തവുമായ മറുപടിയാണ് ഈ നിശ്ചലദൃശ്യം. തദ്ദേശീയമായി നിർമ്മിച്ച ആയുധങ്ങൾ ഉപയോഗിച്ച് ശത്രുക്കളെ നേരിടാനുള്ള ഇന്ത്യയുടെ ശേഷി ഇതിലൂടെ ലോകത്തിന് മുന്നിൽ ഒരിക്കൽ കൂടി തെളിയും. ഇത്തവണത്തെ ഫ്ലൈപാസ്റ്റിലും ‘സിന്ദൂർ ഫോർമേഷൻ’ എന്ന പേരിൽ യുദ്ധവിമാനങ്ങൾ ആകാശത്ത് വിസ്മയം തീർക്കും.