2026 ലെ തമിഴ്‌നാട് നിയമസഭാ തിരഞ്ഞെടുപ്പിലേക്കുള്ള ഒരുക്കങ്ങൾ ശക്തമാകുന്നതിനിടെ, രാഷ്ട്രീയ രംഗത്ത് വലിയ ശ്രദ്ധ പിടിച്ചുപറ്റുന്ന ഒരു നീക്കമാണ് സമീപ ദിവസങ്ങളിലായി ഉണ്ടായത്. 234 നിയമസഭാ സീറ്റുകളിലും ഒറ്റ ചിഹ്നത്തിൽ മത്സരിക്കാനുള്ള തമിഴക വെട്രി കഴകത്തിന്റെ (ടിവികെ) അഭ്യർത്ഥന അംഗീകരിച്ചുകൊണ്ട്, ഇലക്ഷൻ കമ്മീഷൻ ഓഫ് ഇന്ത്യ, പാർട്ടിയുടെ പൊതു തിരഞ്ഞെടുപ്പ് ചിഹ്നമായി ‘വിസിൽ’ അനുവദിച്ചു. ഇതോടെ, പുതിയ രാഷ്ട്രീയ കക്ഷിയായ ടിവികെക്ക് ഔദ്യോഗികമായ ഒരു തിരഞ്ഞെടുപ്പ് തിരിച്ചറിയൽ ലഭിച്ചിരിക്കുകയാണ്.

ഒരു പൊതു ചിഹ്നം അനുവദിക്കണമെന്ന ആവശ്യവുമായി ടിവികെ നേരത്തെ തന്നെ തിരഞ്ഞെടുപ്പ് കമ്മീഷനെ സമീപിച്ചിരുന്നു. അവരുടെ അപേക്ഷയിൽ വിസിൽ, ഓട്ടോ, ക്രിക്കറ്റ് ബാറ്റ്, ചാമ്പ്യൻ ട്രോഫി, മൈക്രോഫോൺ ഉൾപ്പെടെ പത്ത് ഇഷ്ടചിഹ്നങ്ങളാണ് പട്ടികപ്പെടുത്തിയിരുന്നത്. ഇതിൽ നിന്നാണ് കമ്മീഷൻ വിസിൽ തിരഞ്ഞെടുക്കുകയും ഔദ്യോഗികമായി അംഗീകരിക്കുകയും ചെയ്തത്. തെരഞ്ഞെടുപ്പ് രാഷ്ട്രീയത്തിൽ ഒരു പാർട്ടിക്ക് സ്ഥിരമായ ചിഹ്നം ലഭിക്കുന്നത് സംഘടനാ ശക്തിക്കും വോട്ടർമാരുമായുള്ള മാനസിക ബന്ധത്തിനും നിർണായകമാണെന്നതിനാൽ, ടിവികെയ്ക്ക് ഇത് വലിയ നേട്ടമായി വിലയിരുത്തപ്പെടുന്നു.

ടിവികെയുടെ രാഷ്ട്രീയ ബ്രാൻഡിംഗിൽ ‘V’ എന്ന അക്ഷരത്തിന് നൽകുന്ന പ്രാധാന്യത്തിന്റെ തുടർച്ചയായാണ് വിസിൽ ചിഹ്നവും കാണപ്പെടുന്നത്. വിജയ് എന്ന നേതൃമുഖം, വിക്രവണ്ടി, വി റോഡ് തുടങ്ങിയ വാക്കുകളും ചിഹ്നങ്ങളും ഉപയോഗിച്ചുള്ള പാർട്ടിയുടെ ദൃശ്യ–രാഷ്ട്രീയ ഐഡന്റിറ്റി ഇപ്പോൾ വിസിലിലൂടെ കൂടുതൽ ശക്തമാകുകയാണ്. പരമ്പരാഗതമായി വിസിൽ ചിഹ്നം കൂടുതലായി സ്വതന്ത്ര സ്ഥാനാർത്ഥികൾക്കാണ് അനുവദിച്ചിരുന്നത്. നിയമസഭാ തിരഞ്ഞെടുപ്പുകളിൽ മാത്രമല്ല, തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പുകളിലും വിസിൽ പലപ്പോഴും കണ്ടുവരുന്ന ഒരു ചിഹ്നമാണ്.

ഇന്ത്യൻ രാഷ്ട്രീയ ചരിത്രത്തിൽ വിസിലിന് പ്രത്യേകമായ ഒരു പശ്ചാത്തലമുണ്ട്. 2009-ൽ വിരമിച്ച ഐഎഎസ് ഉദ്യോഗസ്ഥനായ ജയപ്രകാശ് നാരായണൻ ലോക് സത്ത പാർട്ടി രൂപീകരിച്ചപ്പോൾ വിസിൽ ആയിരുന്നു അവരുടെ തിരഞ്ഞെടുപ്പ് ചിഹ്നം. അതിന് മുമ്പും പിന്നീട്, ഭരണകൂടത്തിനെതിരായ പ്രതിഷേധങ്ങളുടെ പ്രതീകമായി വിസിൽ ഇന്ത്യൻ രാഷ്ട്രീയത്തിൽ വ്യാപകമായി ഉപയോഗിക്കപ്പെട്ടിട്ടുണ്ട്. ഔദ്യോഗിക രാഷ്ട്രീയ പ്രവേശനത്തിന് മുമ്പ്, ആം ആദ്മി പാർട്ടിയും വിസിൽ പ്രതിഷേധത്തിന്റെ അടയാളമായി സ്വീകരിച്ചിരുന്നു.

തമിഴ്‌നാട്ടിൽ തന്നെ, 2016 ലെ നിയമസഭാ തിരഞ്ഞെടുപ്പിൽ ഗാന്ധിയൻ പീപ്പിൾസ് മൂവ്‌മെന്റിന് തിരഞ്ഞെടുപ്പ് കമ്മീഷൻ വിസിൽ ചിഹ്നം അനുവദിച്ചിരുന്നു. ആ പാർട്ടിയെ നയിച്ചിരുന്ന തമിഴരുവി മണിയൻ പിന്നീട് ടിവികെയിൽ ലയിച്ചതും ഈ ചിഹ്നത്തിന് പുതിയ അർത്ഥതലങ്ങൾ നൽകുന്നു. ഇതോടെ, വിസിൽ ടിവികെയുടെ രാഷ്ട്രീയ യാത്രയിൽ പഴയ അനുഭവങ്ങളെയും പുതിയ ലക്ഷ്യങ്ങളെയും ബന്ധിപ്പിക്കുന്ന ഒരു ചിഹ്നമായി മാറുകയാണ്.

ചലച്ചിത്ര–രാഷ്ട്രീയ ബന്ധങ്ങളുടെ പശ്ചാത്തലത്തിൽ വിസിലിന് മറ്റൊരു പ്രതീകാത്മകതയും ഉണ്ട്. വിജയുമായി അടുത്ത ബന്ധമുള്ള രണ്ട് പ്രമുഖ തമിഴ് സിനിമാ അഭിനേതാക്കൾ മുമ്പ് വിസിൽ ചിഹ്നത്തിൽ മത്സരിച്ച തെരഞ്ഞെടുപ്പുകൾ ഇതിന് അധിക പ്രാധാന്യം നൽകുന്നു. ‘നെരുക്കു നേർ’, ‘ഗില്ലി’, ‘സച്ചിൻ’ തുടങ്ങിയ ചിത്രങ്ങളിൽ വിജയ്‌ക്കൊപ്പം അഭിനയിച്ച അന്തരിച്ച ഹാസ്യനടൻ മയിൽസാമി, 2021 ലെ തമിഴ്‌നാട് നിയമസഭാ തിരഞ്ഞെടുപ്പിൽ വിരുഗമ്പാക്കം മണ്ഡലത്തിൽ നിന്ന് സ്വതന്ത്ര സ്ഥാനാർത്ഥിയായി മത്സരിച്ചത് വിസിൽ ചിഹ്നത്തിലായിരുന്നു. ആ തെരഞ്ഞെടുപ്പിൽ അദ്ദേഹം 1,440 വോട്ടുകൾ നേടി.

അതുപോലെ തന്നെ, വിജയ്‌ക്കൊപ്പം നിരവധി സിനിമകളിൽ അഭിനയിച്ച പ്രകാശ് രാജ് 2019 ലെ ലോക്‌സഭാ തിരഞ്ഞെടുപ്പിൽ ബെംഗളൂരു സെൻട്രൽ മണ്ഡലത്തിൽ നിന്ന് സ്വതന്ത്ര സ്ഥാനാർത്ഥിയായി മത്സരിച്ചതും വിസിൽ ചിഹ്നത്തിലായിരുന്നു. ആ മത്സരത്തിൽ അദ്ദേഹം 28,906 വോട്ടുകൾ നേടി. ഈ സംഭവങ്ങൾ, വിസിൽ ചിഹ്നം തമിഴ് സിനിമാ–രാഷ്ട്രീയ ലോകത്ത് നേരത്തെ തന്നെ പരിചിതമായിരുന്നുവെന്നത് ഓർമ്മിപ്പിക്കുന്നു.

ഇതെല്ലാം ചേർന്നുനോക്കുമ്പോൾ, വിസിൽ എന്ന ചിഹ്നം ടിവികെയ്ക്ക് വെറും ഒരു തിരഞ്ഞെടുപ്പ് അടയാളമല്ല. പ്രതിഷേധത്തിന്റെ ശബ്ദം, അധികാരത്തെ ചോദ്യം ചെയ്യുന്ന സൂചന, ജനങ്ങളെ ഉണർത്തുന്ന ഒരു വിളി ഈ അർത്ഥതലങ്ങളൊക്കെയാണ് വിസിൽ രാഷ്ട്രീയത്തിൽ കൈവരിക്കുന്നത്. 2026 ലെ നിയമസഭാ തിരഞ്ഞെടുപ്പിൽ, ഈ വിസിൽ എത്രത്തോളം ശക്തമായി മുഴങ്ങുമെന്നതും, അത് തമിഴ്‌നാട് രാഷ്ട്രീയ ഭൂപടത്തിൽ എത്രത്തോളം മാറ്റങ്ങൾ സൃഷ്ടിക്കുമെന്നതുമാണ് ഇനി കാത്തുനോക്കേണ്ടത്