ലോകത്തെ അമ്പരപ്പിച്ചുകൊണ്ട് യുഎസ് പ്രസിഡന്റ് ഡൊണാൾഡ് ട്രംപ് അയച്ച വിചിത്രമായ സന്ദേശത്തെക്കുറിച്ചുള്ള വിവരങ്ങൾ നോർവേ പ്രധാനമന്ത്രി ജോനാസ് ഗഹർ സ്റ്റോർ പുറത്തുവിട്ടു. തനിക്ക് സമാധാനത്തിനുള്ള നൊബേൽ സമ്മാനം നൽകാത്തതിലുള്ള നിരാശയാണ് ഗ്രീൻലാൻഡ് പിടിച്ചെടുക്കാനുള്ള തന്റെ നീക്കത്തിന് പിന്നിലെന്ന് ട്രംപ് സന്ദേശത്തിൽ വെളിപ്പെടുത്തി. എന്നാൽ നൊബേൽ സമ്മാന നിർണ്ണയത്തിൽ സർക്കാരിന് യാതൊരു പങ്കുമില്ലെന്ന് നോർവേ പ്രധാനമന്ത്രി ട്രംപിന് മറുപടി നൽകി.

ഞായറാഴ്ച ഉച്ചകഴിഞ്ഞാണ് ട്രംപിന്റെ സന്ദേശം ലഭിച്ചതെന്ന് ജോനാസ് ഗഹർ സ്റ്റോർ സ്ഥിരീകരിച്ചു. "നൊബേൽ സമ്മാനം നൽകുന്നത് സ്വതന്ത്രമായ ഒരു സമിതിയാണ്, അല്ലാതെ നോർവേ സർക്കാരല്ല എന്ന് ഞാൻ പ്രസിഡന്റ് ട്രംപിന് വ്യക്തമായി വിശദീകരിച്ചു നൽകിയിട്ടുണ്ട്," അദ്ദേഹം പ്രസ്താവനയിൽ പറഞ്ഞു. നോർവേയും ഫിൻലാൻഡും ഉൾപ്പെടെയുള്ള യൂറോപ്യൻ രാജ്യങ്ങൾക്ക് മേൽ ട്രംപ് പ്രഖ്യാപിച്ച താരിഫ് വർദ്ധനവിനെതിരെ സ്റ്റോറും ഫിൻലാൻഡ് പ്രസിഡന്റ് അലക്സാണ്ടർ സ്റ്റബ്ബും ചേർന്ന് ട്രംപിനെ ബന്ധപ്പെട്ടതിന് പിന്നാലെയാണ് ഈ മറുപടി സന്ദേശം വന്നത്.എട്ട് യുദ്ധങ്ങൾ തടഞ്ഞിട്ടും തനിക്ക് സമാധാന നൊബേൽ നൽകാൻ നോർവേ തയ്യാറായില്ലെന്ന് ട്രംപ് സന്ദേശത്തിൽ ആരോപിക്കുന്നു. "എട്ട് യുദ്ധങ്ങൾ തടഞ്ഞിട്ടും നിങ്ങളുടെ രാജ്യം എനിക്ക് സമാധാന നൊബേൽ നൽകേണ്ടെന്ന് തീരുമാനിച്ച സ്ഥിതിക്ക്, ഇനി സമാധാനത്തെക്കുറിച്ച് മാത്രം ചിന്തിക്കാൻ എനിക്ക് ബാധ്യതയില്ല. ഇനി മുതൽ അമേരിക്കയുടെ നന്മയ്ക്കും ഉചിതമായ കാര്യങ്ങൾക്കും മാത്രമേ ഞാൻ മുൻഗണന നൽകൂ," ട്രംപ് കുറിച്ചു.സന്ദേശത്തിന്റെ ബാക്കി ഭാഗത്ത് ഗ്രീൻലാൻഡിനെതിരെ ട്രംപ് കടുത്ത നിലപാടുകൾ സ്വീകരിച്ചു. ഗ്രീൻലാൻഡിനെ റഷ്യയിൽ നിന്നോ ചൈനയിൽ നിന്നോ സംരക്ഷിക്കാൻ ഡെന്മാർക്കിന് കഴിയില്ലെന്ന് ട്രംപ് വാദിച്ചു. "ഗ്രീൻലാൻഡിന് മേൽ അമേരിക്കയ്ക്ക് പൂർണ്ണ നിയന്ത്രണം ലഭിക്കാതെ ലോകം സുരക്ഷിതമാകില്ല," എന്നും അദ്ദേഹം കൂട്ടിച്ചേർത്തു. എന്നാൽ ഗ്രീൻലാൻഡ് ഡെന്മാർക്കിന്റെ ഭാഗമാണെന്നും ഇക്കാര്യത്തിൽ നോർവേ ഡെന്മാർക്കിന് പൂർണ്ണ പിന്തുണ നൽകുമെന്നും സ്റ്റോർ ആവർത്തിച്ചു. ആർട്ടിക് മേഖലയിലെ സുരക്ഷ ഉറപ്പാക്കാൻ നാറ്റോ സ്വീകരിക്കുന്ന നടപടികളെ പിന്തുണയ്ക്കുന്നുവെന്നും അദ്ദേഹം വ്യക്തമാക്കി.ഫെബ്രുവരി 1 മുതൽ ഡെന്മാർക്ക്, നോർവേ, സ്വീഡൻ, ഫ്രാൻസ്, ജർമ്മനി, ബ്രിട്ടൻ, നെതർലാൻഡ്‌സ്, ഫിൻലാൻഡ് എന്നീ രാജ്യങ്ങളിൽ നിന്നുള്ള ഉൽപ്പന്നങ്ങൾക്ക് 10 ശതമാനം താരിഫ് ഏർപ്പെടുത്തുമെന്നാണ് ട്രംപിന്റെ ഭീഷണി. ഗ്രീൻലാൻഡ് വിൽക്കുന്ന കാര്യത്തിൽ ധാരണയായില്ലെങ്കിൽ ജൂൺ 1 മുതൽ ഇത് 25 ശതമാനമായി ഉയർത്തുമെന്നും അദ്ദേഹം മുന്നറിയിപ്പ് നൽകിയിട്ടുണ്ട്. ഈ താരിഫ് ഭീഷണി ആഗോള വിപണിയിൽ വലിയ ആശങ്കയാണ് സൃഷ്ടിച്ചിരിക്കുന്നത്.