കഠിനമായ ശൈത്യതരംഗവും രൂക്ഷമായ മൂടൽമഞ്ഞും രാജ്യതലസ്ഥാനത്തെ ജനജീവിതം സ്തംഭിപ്പിച്ചിരിക്കുകയാണ്. മഞ്ഞും പുകയും കലർന്ന ആവരണം കാരണം സൂര്യപ്രകാശം പോലും ഭൂമിയിൽ എത്താത്ത അവസ്ഥയാണുള്ളത്. പകൽ സമയത്തും അന്തരീക്ഷം ഇരുളടഞ്ഞു നിൽക്കുന്നതിനാൽ താപനില ശരാശരി 16.9 ഡിഗ്രി സെൽഷ്യസിലേക്ക് താഴ്ന്നു. കാഴ്‌ചാപരിധി ഗണ്യമായി കുറഞ്ഞത് ഡൽഹിയിലെ ഗതാഗത സംവിധാനങ്ങളെയും ജനങ്ങളുടെ ദൈനംദിന ജീവിതത്തെയും വലിയ രീതിയിൽ ബാധിച്ചിട്ടുണ്ട്.

മൂടൽമഞ്ഞ് ഏറ്റവും കൂടുതൽ പ്രതിസന്ധി സൃഷ്ടിച്ചത് വ്യോമഗതാഗതത്തിലാണ്. കാഴ്ചാപരിധി കുറഞ്ഞതിനെത്തുടർന്ന് ശനിയാഴ്ച മാത്രം ഡൽഹി വിമാനത്താവളത്തിൽ നിന്നുള്ളതും അങ്ങോട്ടേക്ക് വരേണ്ടതുമായ നൂറിലധികം വിമാന സർവീസുകൾ തടസ്സപ്പെട്ടു. സഫ്ദർജംഗിലും പാലം മേഖലയിലും രാവിലെ സമയങ്ങളിൽ കാഴ്ചാപരിധി 200 മുതൽ 350 മീറ്റർ വരെ മാത്രമായിരുന്നു. ഉച്ചയോടെ നേരിയ പുരോഗതി ഉണ്ടായെങ്കിലും വിമാന സർവീസുകളുടെ കൃത്യസമയത്തെ പ്രവർത്തനത്തെ ഇത് സാരമായി ബാധിച്ചു.

ഡൽഹിയിലെ വായുനിലവാരം ശനിയാഴ്ച അതീവ ഗുരുതരമായ നിലയിലേക്ക് കൂപ്പുകുത്തി. വൈകുന്നേരം നാല് മണിക്ക് 398 ആയിരുന്ന വായു ഗുണനിലവാര സൂചിക (AQI), വെറും ഒരു മണിക്കൂറിനുള്ളിൽ 401 എന്ന അപകടകരമായ നിലയിലെത്തി. വാഹനങ്ങളിൽ നിന്നുള്ള പുക, വ്യവസായശാലകളിലെ മാലിന്യങ്ങൾ, വീടുകളിൽ നിന്നുള്ള വിസർജ്യങ്ങൾ, തുറസായ സ്ഥലങ്ങളിൽ മാലിന്യം കത്തിക്കുന്നത് എന്നിവ അന്തരീക്ഷ മലിനീകരണം ഇത്രത്തോളം രൂക്ഷമാകുന്നതിന് പ്രധാന കാരണങ്ങളായി ചൂണ്ടിക്കാണിക്കപ്പെടുന്നു.