യുഎസ് എഎംഡിഎല്‍ പ്രളയ ഭീഷണി തുടരുന്നു; കനത്ത മഴയിലും കടലാക്രമണത്തിലും വ്യാപക നാശനഷ്ടം
26, October, 2026
Updated on 26, October, 2026 1
 |
വാഷിംഗ്ടണ്‍: തെക്കുപടിഞ്ഞാറന്‍ യുഎസില്‍ പ്രളയഭീഷണി തുടരുന്നു. പ്രതികൂല കാലാവസ്ഥയില്‍ ഭാഗികമായി മെച്ചപ്പെടലുണ്ടെങ്കിലും ന്യൂ മെക്‌സിക്കോയിലും കൊളറാഡോയിലും സ്ഥിതി രൂക്ഷമാണ്. ശനിയാഴ്ച പെയ്ത കനത്ത മഴയെ തുടര്‍ന്ന് പ്രദേശത്ത് പെട്ടെന്നുണ്ടായ വെള്ളപ്പൊക്കത്തില്‍ വ്യാപക നാശനഷ്ടമുണ്ടായി.
മണിക്കൂറില്‍ രണ്ട് ഇഞ്ച് വരെ മഴയ്ക്കൊപ്പം ശക്തമായ ഇടിമിന്നലിനും സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കി. പടിഞ്ഞാറന്‍ ടെക്‌സസ് മുതല്‍ തെക്കുപടിഞ്ഞാറന്‍ കന്‍സസ് വരെയുള്ള മേഖലകളില്‍ നാല് തലങ്ങളുള്ള മുന്നറിയിപ്പ് സംവിധാനത്തില്‍ രണ്ടാം നിലയിലുള്ള പ്രളയസാധ്യത രേഖപ്പെടുത്തിയിട്ടുണ്ട്. തുടര്‍ച്ചയായി പെയ്യുന്ന കനത്ത മഴ കാരണം ചെറിയ തോതില്‍ മഴ ലഭിച്ചാല്‍ പോലും പെട്ടെന്നുള്ള വെള്ളപ്പൊക്കത്തിലേക്ക് നയിക്കാമെന്നാണ് വിലയിരുത്തൽ. മണിക്കൂറില്‍ ശക്തമായ വേഗത്തിലുള്ള കാറ്റ്, ഒറ്റപ്പെട്ട ആലിപ്പഴവര്‍ഷം, ചുഴലിക്കാറ്റ് എന്നിവയ്ക്കും സാധ്യതയുണ്ട്. തിങ്കളാഴ്ചയോടെ പ്രളയഭീഷണി കുറയുമെന്നാണ് പ്രതീക്ഷിക്കുന്നതെങ്കിലും ചിലയിടങ്ങളില്‍ വെള്ളക്കെട്ട് തുടരും.
ന്യൂ മെക്‌സിക്കോയിലെ സാന്‍ ജുവാന്‍ നദിയില്‍ ശനിയാഴ്ച ജലനിരപ്പ് 21 അടിയിലെത്തി. 1935ന് ശേഷമുള്ള ഏറ്റവും ഉയര്‍ന്ന ജലനിരപ്പാണിത്. നദി കരകവിഞ്ഞൊഴുകിയതോടെ ഷിപ്റോക്ക് മേഖലയിലെ ജനവാസ കേന്ദ്രങ്ങള്‍ വെള്ളത്തിനടിയിലായി. നദികളിലും നീര്‍ച്ചാലുകളിലും ജലനിരപ്പ് ക്രമാതീതമായി ഉയരുന്നത് അപകടഭീഷണി ഇരട്ടിയാക്കുന്നു. താഴ്ന്ന പ്രദേശങ്ങളില്‍ താമസിക്കുന്നവര്‍ ജാഗ്രത പാലിക്കണമെന്ന് അധികൃതര്‍ നിര്‍ദേശിച്ചു.
വടക്കുകിഴക്കന്‍ മേഖലയിലെ ഉയര്‍ന്ന മര്‍ദവും അറ്റ്‌ലാന്റിക് സമുദ്രത്തിലെ ന്യൂനമര്‍ദവും ചേര്‍ന്ന് തീരത്തേക്ക് ശക്തമായ കാറ്റ് വീശിയടിക്കുന്നുണ്ട്. ഞായറാഴ്ച മുതല്‍ ചൊവ്വാഴ്ച വരെ തീരപ്രദേശങ്ങളില്‍ മണിക്കൂറില്‍ 20 മുതല്‍ 35 മൈല്‍ വരെ വേഗതയില്‍ കാറ്റ് വീശാന്‍ സാധ്യതയുണ്ട്.
വര്‍ഷത്തിലെ ഏറ്റവും ഉയര്‍ന്ന വേലിയേറ്റമായ കിങ് ടൈഡും ശക്തമായ കാറ്റും ഒരുമിച്ചെത്തുന്നതോടെ ഫ്‌ലോറിഡയിലെ മിയാമി മുതല്‍ നോര്‍ത്ത് കരോലിനയിലെ ഔട്ടര്‍ ബാങ്ക്‌സ് വരെയുള്ള തീരങ്ങളില്‍ വലിയ തോതിലുള്ള തീരപ്രളയ മുന്നറിയിപ്പ് നല്‍കി.
തെക്കുകിഴക്കന്‍ ഫ്‌ലോറിഡയിലെ പോര്‍ട്ട് സെന്റ് ലൂസി മുതല്‍ മിയാമി വരെയുള്ള ഭാഗങ്ങളില്‍ പെട്ടെന്നുള്ള വെള്ളപ്പൊക്ക ഭീഷണിയുണ്ട് (രണ്ടാം ഘട്ടം). ഫ്‌ലോറിഡ, ജോര്‍ജിയ തീരപ്രദേശങ്ങളില്‍ അതിതീവ്ര തീരപ്രളയത്തിന് സാധ്യതയുള്ളതായി അധികൃതര്‍ അറിയിച്ചു. ഫ്‌ലോറിഡ മുതല്‍ കരോലിന തീരങ്ങളില്‍ 12 അടി വരെ ഉയരമുള്ള തിരമാലകളും അപകടകരമായ അടിയൊഴുക്കുകളും പ്രകടമാണ്. ചൊവ്വാഴ്ച വരെ തീരദേശവാസികള്‍ അതീവ ജാഗ്രത പുലര്‍ത്തണം.