ഐക്യരാഷ്ട്രസഭയുടെ രക്ഷാസമിതിയിൽ (യു.എൻ.എസ്.സി) ഇന്ത്യക്ക് സ്ഥിരാംഗത്വം നൽകണമെന്ന ആവശ്യത്തിന് പൂർണ്ണ പിന്തുണ പ്രഖ്യാപിച്ച് റഷ്യ. ന്യൂയോർക്കിൽ നടന്ന ഐക്യരാഷ്ട്രസഭാ പൊതുസഭയുടെ (യു.എൻ.ജി.എ) വാർഷിക സമ്മേളനത്തിൽ സംസാരിക്കവെ റഷ്യൻ വിദേശകാര്യ മന്ത്രി സെർജി ലാവ്‌റോവാണ് ഇക്കാര്യം വ്യക്തമാക്കിയത്. ആഗോളതലത്തിൽ വളർന്നുവരുന്ന ശക്തിയെന്ന നിലയിൽ ഇന്ത്യക്കും ബ്രസീലിനും രക്ഷാസമിതിയിൽ സ്ഥിരം സീറ്റ് നൽകണമെന്ന് അദ്ദേഹം ആവശ്യപ്പെട്ടു. എന്നാൽ പാശ്ചാത്യ രാജ്യങ്ങൾക്ക് രക്ഷാസമിതിയിൽ ഇനി കൂടുതൽ സീറ്റുകൾ നൽകുന്നത് അംഗീകരിക്കാൻ കഴിയില്ലെന്നും അദ്ദേഹം കടുത്ത ഭാഷയിൽ മുന്നറിയിപ്പ് നൽകി.രക്ഷാസമിതിയിൽ നിലവിൽ അഞ്ചു സ്ഥിരാംഗങ്ങളാണ് ഉള്ളത്. ആഗോള ശക്തിസമവാക്യങ്ങൾ മാറിയ സാഹചര്യത്തിൽ ഏഷ്യ, ആഫ്രിക്ക, ലാറ്റിൻ അമേരിക്ക എന്നീ മേഖലകളിൽ നിന്നുള്ള വികസ്വര രാജ്യങ്ങൾക്ക് കൂടുതൽ പ്രാതിനിധ്യം ലഭിക്കേണ്ടതുണ്ടെന്ന് ലാവ്‌റോവ് ചൂണ്ടിക്കാട്ടി. ജർമ്മനി, ജപ്പാൻ തുടങ്ങിയ പാശ്ചാത്യ സഖ്യകക്ഷികൾക്ക് സ്ഥിരാംഗത്വം നൽകുന്നതിനെ അദ്ദേഹം ശക്തമായി എതിർത്തു. ലോകത്തിലെ ഭൂരിപക്ഷം വരുന്ന വികസന പാതയിലുള്ള രാജ്യങ്ങളുടെ ശബ്ദം ഐക്യരാഷ്ട്രസഭയിൽ ശക്തമാകേണ്ടത് അത്യന്താപേക്ഷിതമാണെന്ന് അദ്ദേഹം അഭിപ്രായപ്പെട്ടു.റഷ്യക്ക് പുറമെ മോറീഷ്യസ്, പോർച്ചുഗൽ തുടങ്ങിയ മറ്റ് നിരവധി രാജ്യങ്ങളും രക്ഷാസമിതിയിൽ ഇന്ത്യക്ക് സ്ഥിരാംഗത്വം നൽകണമെന്ന ആവശ്യത്തെ സമ്മേളനത്തിൽ പിന്തുണച്ചു. അന്താരാഷ്ട്ര കാര്യങ്ങളിൽ ഇന്ത്യ നടത്തുന്ന ക്രിയാത്മകമായ ഇടപെടലുകൾ കണക്കിലെടുത്ത് ഇന്ത്യക്ക് അർഹമായ സ്ഥാനം നൽകണമെന്ന് മോറീഷ്യസ് വിദേശകാര്യ മന്ത്രി പറഞ്ഞു. വർഷങ്ങളായി ഇന്ത്യ ഉന്നയിക്കുന്ന ഈ ന്യായമായ ആവശ്യത്തിന് ആഗോള തലത്തിൽ വലിയ പിന്തുണ ലഭിക്കുന്നത് ഇന്ത്യയുടെ നയതന്ത്ര വിജയമായാണ് വിലയിരുത്തപ്പെടുന്നത്.