ന്യൂഡൽഹിയിൽ ബ്രിക്സ് ഉച്ചകോടി ആരംഭിച്ചപ്പോൾ മുതൽ ലോകം കാത്തിരുന്ന ആ ചിത്രം തന്റെ സമൂഹമാധ്യമങ്ങളിലൂടെ പങ്കുവെച്ചിരിക്കുകയാണ് പ്രധാനമന്ത്രി നരേന്ദ്രമോദി. ​ന്യൂഡൽഹിയിലെ ഭാരത് മണ്ഡപത്തിൽ നടക്കുന്ന പതിനെട്ടാമത് ബ്രിക്സ് ഉച്ചകോടിയിൽ ലോകശ്രദ്ധ ആകര്‍ഷിച്ച് മൂന്ന് വൻകിട രാഷ്ട്ര നേതാക്കളുടെ അപൂർവ്വ ചിത്രങ്ങളാണ് മോദി പങ്കുവെച്ചത്. ചൈനീസ് പ്രസിഡന്റ് ഷി ജിൻപിങ്, റഷ്യൻ പ്രസിഡന്റ് വ്ളാഡിമിർ പുടിൻ എന്നിവർക്കൊപ്പം സന്തോഷത്തോടെ കൈകോർത്തുനിൽക്കുന്ന ചിത്രം  മോദി തന്റെ സോഷ്യൽ മീഡിയ അക്കൗണ്ടുകളിലൂടെ പങ്കുവെച്ചു. ആഗോള രാഷ്ട്രീയ അനിശ്ചിതത്വങ്ങൾ നിലനിൽക്കുന്ന സാഹചര്യത്തിൽ റഷ്യ, ചൈന, ഇന്ത്യ എന്നീ പ്രമുഖ ശക്തികളുടെ നേതാക്കൾ ഒരുമിച്ചു നിൽക്കുന്ന ഈ ചിത്രം അന്താരാഷ്ട്ര തലത്തിൽ വലിയ സന്ദേശമാണ് നൽകുന്നത്.

കഴിഞ്ഞ ദിവസങ്ങളിലായി സോഷ്യൽ മീഡിയയിൽ നിരവധി പേരാണ് ഈ ചിത്രത്തിനായി കാത്തിരിക്കുന്നു എന്ന പോസ്റ്റുകൾ ഷെയർ ചെയ്തിരുന്നത്. ഈ ചിത്രത്തിന് പുറമെ ഇന്തോനേഷ്യൻ പ്രസിഡന്റ് പ്രബോവോ സുബിയാന്തോ, ഇറാൻ പ്രസിഡന്റ് മസൂദ് പെസെഷ്കിയാൻ, ദക്ഷിണാഫ്രിക്കൻ പ്രസിഡന്റ് സിറിൽ റാമഫോസ തുടങ്ങിയ പ്രമുഖ നേതാക്കളുമായി ഒരുമിച്ചു നടക്കുന്ന ചിത്രങ്ങളും പ്രധാനമന്ത്രി പങ്കുവെച്ചിട്ടുണ്ട്. ഭാരത് മണ്ഡപത്തിലെ സമ്മേളന ഹാളിൽ നേതാക്കൾ തമ്മിൽ നടത്തിയ ഊഷ്മളമായ സൗഹൃദ സംഭാഷണങ്ങളും പരസ്പര ബഹുമാനത്തോടെയുള്ള പെരുമാറ്റവും നയതന്ത്ര ലോകത്ത് വലിയ ചർച്ചയായി മാറിയിട്ടുണ്ട്. ആഗോളതലത്തിൽ തർക്കങ്ങളും സംഘർഷങ്ങളും നിലനിൽക്കുമ്പോഴും സഹകരണത്തിന്റെയും സംഭാഷണങ്ങളുടെയും പ്രാധാന്യമാണ് ഈ കൂടിക്കാഴ്ച വ്യക്തമാക്കുന്നത്.

പാശ്ചാത്യ ശക്തികളുടെ നയങ്ങൾക്കെതിരെ വികസ്വര രാജ്യങ്ങളുടെ കൂട്ടായ്മ കൂടുതൽ ശക്തമാകുന്നു എന്നതിന്റെ തെളിവായി വിദേശ മാധ്യമങ്ങൾ ഈ ചിത്രത്തെ വിലയിരുത്തുന്നു. ഉച്ചകോടിയുടെ ഭാഗമായി നടന്ന ഉഭയകക്ഷി ചർച്ചകളിൽ അതിർത്തി സുരക്ഷ, ആഗോള സാമ്പത്തിക സഹകരണം, ഊർജ്ജ വിതരണം തുടങ്ങിയ സുപ്രധാന വിഷയങ്ങൾ റഷ്യൻ, ചൈനീസ് നേതാക്കളുമായി ഇന്ത്യ ചർച്ച ചെയ്തു. പരസ്പര വിശ്വസ്തതയും ആഗോള ഭരണസംവിധാനങ്ങളിലെ മാറ്റങ്ങളും ലക്ഷ്യമിട്ടാണ് ഈ വർഷത്തെ ബ്രിക്സ് ഉച്ചകോടി മുന്നോട്ട് പോകുന്നത്.