ന്യൂഡൽഹി : കേരള സർക്കാരും ഗവർണറും തമ്മിൽ ദീർഘകാലമായി നിലനിന്നിരുന്ന വി.സി നിയമന തർക്കത്തിൽ ചരിത്രപരമായ ഒത്തുതീർപ്പ്. കരാർ പ്രകാരം എ.പി.ജെ. അബ്ദുൾ കലാം സാങ്കേതിക സർവകലാശാല (കെ.ടി.യു) വൈസ് ചാൻസലറായി ഡോ. സിസ തോമസും ഡിജിറ്റൽ സർവകലാശാല വൈസ് ചാൻസലറായി ഡോ. സജി ഗോപിനാഥും തസ്തികകളിൽ തുടരും. ഇരുകൂട്ടരും ഒപ്പുവെച്ച സമവായ കരാർ ഔദ്യോഗികമായി ലഭിച്ചതോടെ വിഷയവുമായി ബന്ധപ്പെട്ട് സുപ്രീം കോടതിയിലുണ്ടായിരുന്ന ഹർജി കേസ് തീർപ്പാക്കി. 

സുപ്രീം കോടതിയുടെ പ്രത്യേക ലോക് അദാലത്ത് ബെഞ്ചാണ് കേസ് പരിഗണിച്ച് തീർപ്പാക്കിയത്. തിരുവനന്തപുരം ജില്ലാ ലീഗൽ സർവീസസ് അതോറിറ്റി സെക്രട്ടറിയുടെ മധ്യസ്ഥതയിൽ നടന്ന ചർച്ചയിലാണ് ഗവർണറുടെ സെക്രട്ടറിയേറ്റിലെയും ഉന്നതവിദ്യാഭ്യാസ വകുപ്പിലെയും ഉദ്യോഗസ്ഥർ കരാറിൽ ഒപ്പുവെച്ചത്. യു.ജി.സി ചട്ടങ്ങൾക്ക് അനുസൃതമായി സർവകലാശാലാ നിയമങ്ങളിൽ ആവശ്യമായ ഭേദഗതി വരുത്താമെന്ന് സംസ്ഥാന സർക്കാർ കോടതിയിൽ സമ്മതിച്ചിട്ടുണ്ട്.

നേരത്തെ റിട്ടയേർഡ് ജസ്റ്റിസ് സുധാംശു ധൂലിയ അധ്യക്ഷനായ സർച്ച് കമ്മിറ്റി തയ്യാറാക്കിയ പട്ടികയിൽ നിന്നാണ് ഡോ. സിസ തോമസിനെയും ഡോ. സജി ഗോപിനാഥിനെയും വി.സിമാരായി രാജ്ഭവൻ നിയമിച്ചിരുന്നത്. ഗവർണർ മുന്നോട്ടുവെച്ച പേരുകളിലൊന്നും സർക്കാർ പ്രതിനിധീകരിച്ച പേരുകളിലൊന്നും ഇരുവിഭാഗവും ധാരണയിലെത്തിയതോടെയാണ് മാസങ്ങൾ നീണ്ട ഭരണഘടനാ പ്രതിസന്ധിക്ക് ശാശ്വത പരിഹാരമായത്. വിഷയം സുപ്രീം കോടതിയിൽ അവസാനിച്ചതോടെ സർവകലാശാലകളുടെ പ്രവർത്തനങ്ങൾ കൂടുതൽ വേഗത്തിലാകുമെന്നാണ് പ്രതീക്ഷിക്കുന്നത്.