ഈയിടെയായി ആർട്ടിഫിഷ്യൽ ഇൻ്റലിജൻസ് സാങ്കേതികവിദ്യ ദിവസം ചെല്ലുന്തോറും കൂടുതൽ ബുദ്ധിവൈഭവമുള്ളതായി മാറിക്കൊണ്ടിരിക്കുകയാണ്. ഇലോൺ മസ്‌കിൻ്റെ വാക്കുകൾ വിശ്വസിക്കാമെങ്കിൽ, അടുത്ത നാലോ അഞ്ചോ വർഷത്തിനുള്ളിൽ ഈ സാങ്കേതികവിദ്യ ലോകത്തിലെ എല്ലാ മനുഷ്യരുടെയും മൊത്തം ബുദ്ധിശക്തിയെ മറികടക്കാനുള്ള പാതയിലാണ്.

പ്രമുഖ സംരംഭകനായ പീറ്റർ എച്ച്. ഡയമണ്ടിസ് എക്‌സിൽ പങ്കുവെച്ച ഒരു പോസ്റ്റിന് മറുപടിയായാണ് മസ്‌ക് ഈ ധീരമായ പ്രവചനം നടത്തിയത്. മനുഷ്യരാശിയുടെ ഭാവിയിലെ സമൃദ്ധി എന്നത് കേവലം കമ്പ്യൂട്ടിംഗ് ശേഷിയും ഊർജ്ജവും വർദ്ധിക്കുന്നത് കൊണ്ട് മാത്രമല്ല, മറിച്ച് പുതിയ കാര്യങ്ങൾ കണ്ടുപിടിക്കാനും പ്രശ്നങ്ങൾ പരിഹരിക്കാനും ആവശ്യമായ ഉപകരണങ്ങളും വിഭവങ്ങളും കൂടുതൽ ആളുകളിലേക്ക് എത്തുന്നതിലൂടെയുമാണ് ഉണ്ടാകുന്നത് എന്നാണ് ഡയമണ്ടിസ് തന്റെ പോസ്റ്റിൽ സൂചിപ്പിച്ചത്.സമൃദ്ധി എന്നത് കൂടുതൽ കമ്പ്യൂട്ടിംഗ് ശേഷിയും കൂടുതൽ ഊർജ്ജവും മാത്രമല്ല. അത് കൂടുതൽ ചിന്താശേഷിയുള്ള മനസ്സുകളാണ്. പുതിയ കാര്യങ്ങൾ കണ്ടെത്താനും സൃഷ്ടിക്കാനും പ്രശ്നങ്ങൾ പരിഹരിക്കാനും സ്വാതന്ത്ര്യമുള്ള കൂടുതൽ ആളുകളാണ്. മനുഷ്യന്റെ പ്രതിഭയുടെ പരിധി എപ്പോഴും മനുഷ്യജനസംഖ്യയുടെ വലിപ്പവും അവർക്ക് ഉപകരണങ്ങളിലേക്കും വിഭവങ്ങളിലേക്കുമുള്ള ലഭ്യതയുമായിരുന്നു. മനുഷ്യരാശി ബഹിരാകാശത്തേക്ക് ചുവടുവെക്കുന്നതോടെ നമ്മൾ എല്ലാ പരിമിതികളെയും തകർത്തെറിയും," ഡയമണ്ടിസ് എക്‌സിൽ കുറിച്ചു.ഈ പോസ്റ്റിനോട് പ്രതികരിച്ചുകൊണ്ട് ടെസ്‌ല, എക്‌സ്എഐ (xAI) മേധാവി എഴുതിയത് ഇങ്ങനെയാണ്, "മിക്കവാറും 4 അല്ലെങ്കിൽ 5 വർഷത്തിനുള്ളിൽ എഐ എല്ലാ മനുഷ്യരുടെയും മൊത്തം ബുദ്ധിശക്തിയെ മറികടക്കും." മനുഷ്യൻ്റെ പുരോഗതി എന്നത് കൂടുതൽ മനസ്സുകളും മികച്ച ഉപകരണങ്ങളും വിഭവങ്ങളിലേക്കുള്ള വലിയ ലഭ്യതയും ഉള്ളതുകൊണ്ടാണ് ഉണ്ടാകുന്നത് എന്ന ഡയമണ്ടിസിന്റെ വാദത്തെ പിന്തുണയ്ക്കുന്നതാണ് മസ്‌കിന്റെ ഈ കമൻ്റ്.

മനുഷ്യൻ്റെ കഴിവുകൾ വികസിപ്പിക്കുന്നതിൻ്റെ ശക്തിയെക്കുറിച്ച് ഡയമണ്ടിസ് എടുത്തുപറഞ്ഞപ്പോൾ, എഐ അടുത്ത വലിയ കുതിച്ചുചാട്ടമാണെന്നാണ് മസ്‌ക് ചൂണ്ടിക്കാണിച്ചത്. അതായത് ആർട്ടിഫിഷ്യൽ ഇന്റലിജൻസിന് ഉടൻ തന്നെ മനുഷ്യരാശിയുടെ മൊത്തത്തിലുള്ള ബൗദ്ധിക ശേഷിയെ മറികടക്കാൻ കഴിയുമെന്ന് അദ്ദേഹം സൂചിപ്പിച്ചു.

കൂടുതൽ ബുദ്ധിയുള്ള എഐയുടെ വരവിനായി മസ്‌ക് ഇത്രയും കുറഞ്ഞ സമയപരിധി നൽകുന്നത് ഇതാദ്യമായല്ല. ആർട്ടിഫിഷ്യൽ ജനറൽ ഇൻ്റലിജൻസ് (AGI) 2026-ഓടെ തന്നെ യാഥാർത്ഥ്യമായേക്കാമെന്നും ഈ ദശകത്തിൻ്റെ അവസാനത്തോടെ ഡിജിറ്റൽ ഇന്റലിജൻസ് എല്ലാ മനുഷ്യരുടെയും സംയുക്ത ബുദ്ധിശക്തിയെ മറികടക്കുമെന്നും മസ്‌ക് പലപ്പോഴും വാദിച്ചിട്ടുണ്ട്.

അടുത്ത ഒരു വർഷത്തിനുള്ളിൽ, അതായത് 2027 ഓടെ തന്നെ ഒരു സിംഗിൾ എഐ മോഡലിന് ഏതൊരു വ്യക്തിഗത മനുഷ്യനേക്കാളും ബുദ്ധിശക്തി കൈവരിക്കാൻ കഴിയുമെന്ന് മസ്‌ക് വിശ്വസിക്കുന്നുണ്ടെങ്കിലും, 2030-ഓടെ മാത്രമേ യഥാർത്ഥ ആർട്ടിഫിഷ്യൽ സൂപ്പർഇന്റലിജൻസ് (ASI) ഉയർന്നുവരൂ എന്നാണ് അദ്ദേഹം കരുതുന്നത്. ദാവോസിൽ നടന്ന വേൾഡ് ഇക്കണോമിക് ഫോറത്തിൽ സംസാരിക്കവെ അദ്ദേഹം പറഞ്ഞു, "2030 അല്ലെങ്കിൽ 2031 ഓടെ എഐക്ക് മനുഷ്യരാശിയുടെ മൊത്തം ബുദ്ധിശക്തിയേക്കാൾ കൂടുതൽ സ്മാർട്ടാകാൻ കഴിയും." പല നയരൂപകർത്താക്കളും മനസ്സിലാക്കുന്നതിനേക്കാൾ വേഗത്തിലാണ് സാങ്കേതിക വികസനം മുന്നോട്ട് പോകുന്നതെന്നും അദ്ദേഹം കൂട്ടിച്ചേർത്തു.