ആഗോള രാഷ്ട്രീയത്തിന്റെ നിയന്ത്രണം കൈയ്യാളിയിരുന്ന, തങ്ങളുടെ സൈനിക-സാമ്പത്തിക മേധാവിത്വം കൊണ്ട് ലോകത്തെ വിറപ്പിച്ചിരുന്ന ഒരു സൂപ്പർ പവർ ഇന്ന് സ്വന്തം സഖ്യകക്ഷികളാൽ വഞ്ചിക്കപ്പെട്ടും, ശത്രുക്കളാൽ പരസ്യമായി വെല്ലുവിളിക്കപ്പെട്ടും നിൽക്കുകയാണ്. പശ്ചിമേഷ്യയുടെ മണ്ണിൽ അമേരിക്ക ഇന്ന് നേരിടുന്ന അപമാനം ചരിത്രത്തിൽ സമാനതകളില്ലാത്തതാണ്. ഒരു കാലത്ത് അമേരിക്കയിൽ നിന്ന് പുറപ്പെടുന്ന ഒരു ഫോൺ കോൾ കൊണ്ട് ലോകത്തെ ഏത് യുദ്ധവും അവസാനിപ്പിക്കാനും തുടങ്ങാനും അമേരിക്കയ്ക്ക് കഴിഞ്ഞിരുന്നു. എന്നാൽ ഇന്ന്, സ്വന്തം ആയുധവും പണവും വാങ്ങി യുദ്ധം ചെയ്യുന്ന ഇസ്രയേൽ പോലുമില്ലാത്ത ഒരു കൊച്ചു രാജ്യം അമേരിക്കൻ പ്രസിഡന്റിന്റെ വാക്കുകളെ പരസ്യമായി തള്ളിക്കളയുന്നു. മറുഭാഗത്ത്, അമേരിക്കയുടെ ഉപരോധങ്ങളെയും ഭീഷണികളെയും പൂർണ്ണമായി അവഗണിച്ചുകൊണ്ട് ഇറാന്റെ ബാലിസ്റ്റിക് മിസൈലുകൾ ഹോർമുസ് കടലിടുക്കിൽ അമേരിക്കൻ സാമ്രാജ്യത്വത്തിന്റെ പ്രൗഢിയായ അപ്പാച്ചെ ഹെലികോപ്റ്ററുകളെ വെടിവച്ചിടുന്നു.

പശ്ചിമേഷ്യയിൽ അമേരിക്കൻ ആധിപത്യത്തിന്റെ അന്ത്യം കുറിക്കുന്ന, ഒരു മഹാശക്തിയുടെ തകർച്ച അന്താരാഷ്ട്ര മാധ്യമമായ വിയോൺ റിപ്പോർട്ട് അനുസരിച്ച് കഴിഞ്ഞ ജൂൺ 9-ന് ഹോർമുസ് കടലിടുക്കിന് മുകളിൽ നടന്ന ആ സംഭവം കേവലം ഒരു ഹെലികോപ്റ്റർ തകരലായിരുന്നില്ല, മറിച്ച് അമേരിക്കയുടെ ആഗോള പ്രതിച്ഛായയ്ക്ക് ഏറ്റ കനത്ത പ്രഹരമായിരുന്നു. ഇറാന്റെ അത്യാധുനിക പ്രതിരോധ സംവിധാനങ്ങൾ അമേരിക്കയുടെ അഭിമാനമായ അപ്പാച്ചെ ഹെലികോപ്റ്ററിനെ വെടിവച്ചു വീഴ്ത്തിയപ്പോൾ ലോകം മുഴുവൻ ഞെട്ടി. എന്നാൽ അതിനേക്കാൾ വലിയ ഞെട്ടൽ ഉണ്ടായത് അമേരിക്കയിൽ നിന്നുള്ള പ്രതികരണത്തിലാണ്. സാധാരണഗതിയിൽ ഇത്തരം ഒരു ആക്രമണം ഉണ്ടായാൽ ശത്രുരാജ്യത്തെ ഭൂപടത്തിൽ നിന്ന് തുടച്ചുനീക്കുമെന്ന് ഭീഷണിപ്പെടുത്തുന്ന ഡോണൾഡ് ട്രംപ്, ഇത്തവണ തന്റെ ‘ട്രൂത്ത് സോഷ്യൽ’ പ്ലാറ്റ്‌ഫോമിൽ കുറിച്ചത് തികച്ചും വിനീതവും ജാഗ്രത നിറഞ്ഞതുമായ വാക്കുകളായിരുന്നു. അമേരിക്കയുടെ സൈനിക ശക്തിയെക്കുറിച്ച് വീമ്പിളക്കുന്നതിന് പകരം, പശ്ചിമേഷ്യയിൽ കൂടുതൽ വലിയൊരു യുദ്ധത്തിലേക്ക് കാര്യങ്ങൾ പോകാതിരിക്കാനുള്ള മുൻകരുതൽ വേണമെന്നാണ് ട്രംപ് ആവശ്യപ്പെട്ടത്. കഴിഞ്ഞ വാരാന്ത്യത്തിൽ ഇറാൻ ഇസ്രയേലിന് നേരെ വിനാശകരമായ മിസൈൽ വർഷം നടത്തിയപ്പോഴും ട്രംപ് ഇതേ ജാഗ്രതയാണ് കാണിച്ചത്. അമേരിക്കയും ഇറാനും തമ്മിൽ രഹസ്യമായി നടത്തിവന്നിരുന്ന വെടിനിർത്തൽ ചർച്ചകളെയും സമാധാന കരാറുകളെയും ഈ സംഘർഷം പൂർണ്ണമായി ഇല്ലാതാക്കുമെന്ന് ട്രംപ് ഭയപ്പെടുന്നു. ഈ അമേരിക്കയുടെ ഭയമാണ് അവരെ ശത്രുക്കൾക്ക് മുന്നിൽ ദുർബലരും വിനീതരുമായി ചിത്രീകരിക്കുന്നത്.

പശ്ചിമേഷ്യൻ രാഷ്ട്രീയത്തിൽ കാലങ്ങളായി ഇറാൻ പിന്തുടർന്നിരുന്ന നയമായിരുന്നു “തന്ത്രപരമായ ക്ഷമ”. അമേരിക്കയിൽ നിന്നോ ഇസ്രയേലിൽ നിന്നോ ഉണ്ടാകുന്ന പ്രകോപനങ്ങൾക്ക് ഉടനടി നേരിട്ട് മറുപടി നൽകാതെ, തങ്ങളുടെ പ്രോക്സി ഗ്രൂപ്പുകളായ ഹിസ്ബുള്ളയിലൂടെയും ഹൂതികളിലൂടെയും പരോക്ഷമായി തിരിച്ചടിക്കുന്നതായിരുന്നു ഈ രീതി. എന്നാൽ, ഇറാനിലെ പുതിയ നേതൃത്വം ഈ നയത്തെ പൂർണ്ണമായി മാറ്റിമറിച്ചു കഴിഞ്ഞു. സംയമനം പാലിക്കുന്നത് ബലഹീനതയുടെ ലക്ഷണമാണെന്നാണ് പുതിയ ഇറാനിയൻ ഭരണകൂടം വിശ്വസിക്കുന്നത്. 2025-ൽ നടന്ന 12 ദിവസത്തെ കടുത്ത യുദ്ധത്തിൽ അവസാനമായി സംയമനത്തിന്റെ പാത സ്വീകരിച്ച പരമോന്നത നേതാവ് ആയത്തുള്ള അലി ഖമേനി ഇപ്പോൾ ജീവിച്ചിരിപ്പില്ല. നിലവിലെ പുതിയ നേതാവായ അദ്ദേഹത്തിന്റെ മകൻ മുജ്തബ ഖമേനി, ഇറാനിയൻ റെവല്യൂഷണറി ഗാർഡ്സ് കോർപ്സിന് പൂർണ്ണ സ്വാതന്ത്ര്യമാണ് നൽകിയിരിക്കുന്നത്. അമേരിക്കൻ ഭീഷണികളെ ഭയപ്പെടാതെ, ഇസ്രയേലിന്റെ ഏത് നീക്കത്തിനും നേരിട്ട് മിസൈലുകൾ കൊണ്ട് മറുപടി നൽകുക എന്നതാണ് ഇവരുടെ പുതിയ നയം. ലെബനനിലെ ബെയ്റൂട്ടിന്റെ തെക്കൻ പ്രാന്തപ്രദേശങ്ങളിലുള്ള ഹിസ്ബുള്ള കേന്ദ്രങ്ങളിൽ ഇസ്രയേൽ ബോംബാക്രമണം തുടർന്നാൽ മിസൈൽ വർഷം നടത്തുമെന്ന് ഇറാൻ പരസ്യമായി മുന്നറിയിപ്പ് നൽകിയിരുന്നു. എന്നാൽ അമേരിക്കയുടെയും ഇറാന്റെയും മുന്നറിയിപ്പുകളെ കാറ്റിൽപ്പറത്തി നെതന്യാഹു ബെയ്റൂട്ടിൽ ബോംബിട്ടപ്പോൾ, ഇറാൻ ഒട്ടും സമയം കളയാതെ തങ്ങളുടെ വാക്ക് പാലിച്ചു. ഇറാന്റെ ഈ അഗ്രസീവ് നയം അമേരിക്കയെ പ്രതിരോധത്തിലാക്കിയിരിക്കുകയാണ്.

ഈ യുദ്ധത്തിൽ അമേരിക്ക നേരിടുന്ന ഏറ്റവും വലിയ തിരിച്ചടി സ്വന്തം സഖ്യകക്ഷിയായ ഇസ്രയേലിൽ നിന്ന് തന്നെയാണ്. അമേരിക്കയിൽ കടുത്ത ജനവിരുദ്ധതയ്ക്ക് കാരണമായ പശ്ചിമേഷ്യൻ യുദ്ധം എങ്ങനെയെങ്കിലും അവസാനിപ്പിക്കാൻ ട്രംപ് തീവ്രശ്രമം നടത്തുമ്പോൾ, ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു യുദ്ധം കൂടുതൽ വ്യാപിപ്പിക്കാനാണ് ആഗ്രഹിക്കുന്നത്. ട്രംപ് ഭരണകൂടം ഇറാനുമായി ഒരു പുതിയ ആണവ കരാറിലോ സമാധാന കരാറിലോ ഒപ്പുവെക്കുമെന്ന് നെതന്യാഹു ഭയപ്പെടുന്നു. തങ്ങളെ മറികടന്ന് അമേരിക്ക ഇറാനോട് മൃദുസമീപനം സ്വീകരിക്കുന്നത് തടയാൻ നെതന്യാഹു നിരന്തരം പ്രകോപനങ്ങൾ സൃഷ്ടിക്കുകയാണ്. ലെബനനിൽ വെടിനിർത്തൽ ചർച്ചകൾ പുരോഗമിക്കുമ്പോഴും 3,600-ലധികം ഷിയാ മുസ്ലീങ്ങളെയാണ് ഇസ്രയേൽ സൈന്യം കൊന്നൊടുക്കിയത്. ട്രംപ് നെതന്യാഹുവിനെ ഫോണിൽ വിളിച്ച് “നിനക്ക് ഭ്രാന്താണോ, എന്താണ് ഈ ചെയ്യുന്നത്” എന്ന് ആക്രോശിച്ചിട്ടും ഇസ്രയേൽ തങ്ങളുടെ ആക്രമണം നിർത്തിയില്ല. ഇറാന്റെ പ്രധാന പെട്രോകെമിക്കൽ സമുച്ചയങ്ങൾ ആക്രമിച്ചുകൊണ്ട് നെതന്യാഹു ട്രംപിനെ പൂർണ്ണമായി നാണംകെടുത്തുകയും വഞ്ചിക്കുകയുമാണ് ചെയ്തത്. അമേരിക്കയുടെ വാക്കിന് സ്വന്തം പങ്കാളിയുടെ ഇടയിൽ പോലും വിലയില്ല എന്ന നഗ്നമായ സത്യമാണ് ഇതിലൂടെ പുറത്തുവന്നത്.

അമേരിക്കൻ പ്രസിഡന്റിന് പോലും നെതന്യാഹുവിനെ നിയന്ത്രിക്കാൻ കഴിയാത്തതിന് പിന്നിൽ കൃത്യമായ രാഷ്ട്രീയ-സാമ്പത്തിക കാരണങ്ങളുണ്ട്. ലോകത്തിൽ അമേരിക്കയിൽ നിന്നും ഏറ്റവും കൂടുതൽ സാമ്പത്തിക-സൈനിക സഹായം കൈപ്പറ്റുന്ന രാജ്യം ഇസ്രയേലാണ്. പ്രതിവർഷം നൽകുന്ന 3.8 ബില്യൺ ഡോളറിന് പുറമെ, 2023-ലെ ഹമാസ് ആക്രമണത്തിന് ശേഷം 10.6 ബില്യൺ ഡോളറാണ് അമേരിക്കൻ കോൺഗ്രസ് ഇസ്രയേലിന് നൽകിയത്. ഡോണൾഡ് ട്രംപ് രണ്ടാം തവണ അധികാരമേറ്റയുടനെ 8 ബില്യൺ ഡോളറിന്റെ പ്രത്യേക പാക്കേജും, ഈ ജനുവരിയിൽ 6.5 ബില്യൺ ഡോളറിന്റെ ആയുധ സഹായവും പ്രഖ്യാപിച്ചിരുന്നു. അമേരിക്കയുടെ ഈ പണവും ആയുധവുമില്ലാതെ ഇസ്രയേലിന് ഒരു ദിവസം പോലും യുദ്ധം മുന്നോട്ട് കൊണ്ടുപോകാൻ കഴിയില്ല. എന്നിട്ടും ഈ സഹായങ്ങൾ നിർത്തലാക്കാൻ ട്രംപിന് സാധിക്കുന്നില്ല. കാരണം, അമേരിക്കൻ രാഷ്ട്രീയത്തെ നിയന്ത്രിക്കുന്ന ‘എഐപിഎസി’ പോലുള്ള ശക്തമായ ഇസ്യേൽ അനുകൂല ലോബികൾ അമേരിക്കൻ ജനപ്രതിനിധികളുടെ തിരഞ്ഞെടുപ്പ് ഫണ്ടുകളിലേക്ക് നേരിട്ടാണ് പണമൊഴുക്കുന്നത്. അമേരിക്കൻ മാധ്യമങ്ങളിലും റിപ്പബ്ലിക്കൻ പാർട്ടിയിലുമുള്ള നെതന്യാഹുവിന്റെ സ്വാധീനം കാരണം, അമേരിക്കൻ താല്പര്യങ്ങളേക്കാൾ ഇസ്രയേലിന്റെ താല്പര്യങ്ങൾക്ക് മുൻഗണന നൽകാൻ അമേരിക്ക നിർബന്ധിതരാകുന്നു.

ഈ തകർച്ചയ്ക്ക് ഇസ്രയേലിനെ മാത്രം കുറ്റം പറഞ്ഞിട്ട് കാര്യമില്ല, കാരണം ഈ കെണി ട്രംപ് തന്നെ സ്വയം ഒരുക്കിയതാണ്. തന്റെ ആദ്യ ഭരണകാലം മുതൽ ട്രംപ് എടുത്ത എല്ലാ തീരുമാനങ്ങളും പശ്ചിമേഷ്യയിൽ അമേരിക്കയുടെ വിശ്വാസ്യത പൂർണ്ണമായി തകർക്കുന്നതായിരുന്നു. അന്താരാഷ്ട്ര നിയമങ്ങളെ കാറ്റിൽപ്പറത്തി അമേരിക്കൻ എംബസി ടെൽ അവീവിൽ നിന്നും ജറുസലേമിലേക്ക് മാറ്റിയതും, വെസ്റ്റ് ബാങ്കിലെ നിയമവിരുദ്ധ ഇസ്രയേലി കുടിയേറ്റങ്ങൾക്ക് അനുമതി നൽകിയതും അറബ് ലോകത്തെ ജനങ്ങളെ അമേരിക്കയ്ക്ക് ശത്രുക്കളാക്കി മാറ്റി. ‘അബ്രഹാം ഉടമ്പടി’ വഴി അറബ് ഭരണാധികാരികളെ ഇസ്രയേലുമായി അടുപ്പിക്കാൻ ട്രംപ് ശ്രമിച്ചെങ്കിലും, ആ രാജ്യങ്ങളിലെ സാധാരണ ജനങ്ങൾ ഇതിനെ കടുത്ത ഭാഷയിലാണ് എതിർത്തത്. 72,000-ത്തിലധികം ഫലസ്തീനികളുടെ മരണത്തിന് ഇടയാക്കിയ ഗാസ യുദ്ധത്തിൽ, അന്താരാഷ്ട്ര കോടതി നെതന്യാഹുവിനെതിരെ അറസ്റ്റ് വാറണ്ട് പുറപ്പെടുവിച്ചിട്ടും ട്രംപ് ഇസ്രയേലിനെ അന്ധമായി പിന്തുണച്ചു. അമേരിക്കയുടെ അടുത്ത സഖ്യകക്ഷിയായ ഖത്തറിന്റെ മധ്യസ്ഥതയിൽ ഒപ്പിട്ട ഗാസ കരാറിന് ശേഷവും ഇസ്രയേൽ അവിടെ 900-ലധികം ആളുകളെ കൊന്നൊടുക്കി. ഈ വഞ്ചനകളെല്ലാം പശ്ചിമേഷ്യയിൽ അമേരിക്കയെ ഒരു വിശ്വസിക്കാൻ കൊള്ളാത്ത രാജ്യമാക്കി മാറ്റി തീർത്തു.