പശ്ചിമേഷ്യൻ യുദ്ധത്തെത്തുടർന്ന് ആഗോള എണ്ണ വിപണിയിലുണ്ടായ കടുത്ത പ്രതിസന്ധി പരിഹരിക്കുന്നതിനായി നിർണ്ണായക നീക്കവുമായി അമേരിക്ക. ഉപരോധം ഏർപ്പെടുത്തിയിരുന്ന റഷ്യൻ എണ്ണയും പെട്രോളിയം ഉൽപ്പന്നങ്ങളും വാങ്ങാൻ മറ്റ് രാജ്യങ്ങൾക്ക് ഡൊണാൾഡ് ട്രംപ് ഭരണകൂടം 30 ദിവസത്തെ ഇളവ് അനുവദിച്ചു.നിലവിൽ കടലിൽ കുടുങ്ങിക്കിടക്കുന്ന റഷ്യൻ എണ്ണക്കപ്പലുകൾക്ക് ഈ തീരുമാനത്തോടെ മോചനം ലഭിക്കും. അന്താരാഷ്ട്ര വിപണിയിൽ ക്രൂഡ് ഓയിൽ വില ബാരലിന് 100 ഡോളറിന് മുകളിൽ എത്തിയ സാഹചര്യത്തിലാണ് വിപണിയെ ശാന്തമാക്കാൻ യുഎസ് ഈ താൽക്കാലിക നടപടി സ്വീകരിച്ചത്.ഇറാൻ ഹോർമുസ് കടലിടുക്ക് അടച്ചതോടെ ലോകത്തെ എണ്ണ വിതരണ ശൃംഖല പൂർണ്ണമായും തകർന്നിരിക്കുകയാണ്. ഇതിനെത്തുടർന്നുണ്ടായ ക്ഷാമം പരിഹരിക്കാനാണ് മാർച്ച് 12 വരെ കപ്പലുകളിൽ കയറ്റിയ റഷ്യൻ എണ്ണ വിൽക്കാൻ യുഎസ് ട്രഷറി വകുപ്പ് അനുമതി നൽകിയത്.ഈ ലൈസൻസ് വാഷിംഗ്ടൺ സമയം ഏപ്രിൽ 11 അർദ്ധരാത്രി വരെ നിലനിൽക്കും. നേരത്തെ മാർച്ച് 5-ന് ഇന്ത്യയ്ക്ക് സമാനമായ ഇളവ് അമേരിക്ക അനുവദിച്ചിരുന്നു.ലോകത്തിന്റെ വിവിധ ഭാഗങ്ങളിലായി ഏകദേശം 30 ഇടങ്ങളിൽ കുടുങ്ങിക്കിടക്കുന്ന 124-125 ദശലക്ഷം ബാരൽ റഷ്യൻ എണ്ണ ഈ തീരുമാനത്തിലൂടെ വിപണിയിലെത്തും. ഇത് ഗൾഫ് മേഖലയിലെ വിതരണ തടസ്സം മൂലമുള്ള കുറവ് നികത്താൻ സഹായിക്കും.റഷ്യയ്ക്ക് സാമ്പത്തിക നേട്ടം ഉണ്ടാക്കാത്ത വിധത്തിൽ വളരെ ചുരുങ്ങിയ കാലയളവിലേക്കാണ് ഈ ഇളവ് നൽകിയിരിക്കുന്നതെന്ന് യുഎസ് ട്രഷറി സെക്രട്ടറി സ്കോട്ട് ബെസന്റ് പറഞ്ഞു. ഹോർമുസ് കടലിടുക്ക് തുറക്കുന്നത് വരെ ചില ഉപരോധങ്ങളിൽ ഇളവ് നൽകുമെന്ന് ട്രംപ് നേരത്തെ സൂചിപ്പിച്ചിരുന്നു.ഇന്ധനവില കുതിച്ചുയരുന്നത് തടയാൻ തങ്ങളുടെ തന്ത്രപരമായ എണ്ണശേഖരത്തിൽ (Strategic Petroleum Reserve) നിന്ന് 172 ദശലക്ഷം ബാരൽ ക്രൂഡ് ഓയിൽ പുറത്തുവിടുമെന്ന് യുഎസ് ഊർജ്ജ വകുപ്പ് അറിയിച്ചു.അന്താരാഷ്ട്ര ഊർജ്ജ ഏജൻസിയിലെ (IEA) 32 അംഗരാജ്യങ്ങൾ ചേർന്ന് ആകെ 400 ദശലക്ഷം ബാരൽ എണ്ണ വിപണിയിലെത്തിക്കാൻ തീരുമാനിച്ചിട്ടുണ്ട്. ചരിത്രത്തിലെ ഏറ്റവും വലിയ എണ്ണ വിതരണ തടസ്സമാണ് പശ്ചിമേഷ്യൻ യുദ്ധം മൂലം ഉണ്ടായിരിക്കുന്നതെന്ന് ഏജൻസി വിലയിരുത്തി.ഫെബ്രുവരി 28-ന് അമേരിക്കയും ഇസ്രായേലും ഇറാനെതിരെ ആക്രമണം തുടങ്ങുന്നതിന് മുൻപ് ബാരലിന് 73-75 ഡോളർ ആയിരുന്ന എണ്ണവില ഇപ്പോൾ 100 ഡോളറിന് മുകളിലാണ്. ലോകത്തെ ആകെ എണ്ണ ഉപഭോഗത്തിന്റെ 25 ശതമാനത്തോളം കടന്നുപോകുന്ന ഹോർമുസ് കടലിടുക്ക് ഇറാൻ അടച്ചതാണ് ഇതിന് പ്രധാന കാരണം.യുദ്ധം തുടങ്ങിയ ശേഷം ഈ മേഖലയിൽ 16 കപ്പലുകൾക്ക് നേരെ ആക്രമണമുണ്ടായി. കടലിടുക്ക് അടച്ചിടുന്നത് തുടരുമെന്ന് ഇറാന്റെ പുതിയ നേതാവ് മോജ്തബ ഖമേനി വ്യക്തമാക്കിയതോടെ പശ്ചിമേഷ്യയിൽ നിന്നുള്ള എണ്ണ നീക്കം ഉടൻ പുനരാരംഭിക്കാൻ സാധ്യതയില്ലെന്നാണ് റിപ്പോർട്ടുകൾ.