ഇന്ത്യയും അമേരിക്കയും തമ്മിലുള്ള ഇടക്കാല വ്യാപാര കരാർ ഈ വരുന്ന മാർച്ചിൽ ഒപ്പുവെക്കുമെന്ന് കേന്ദ്ര വാണിജ്യ വ്യവസായ മന്ത്രി പീയൂഷ് ഗോയൽ അറിയിച്ചു. ഏപ്രിൽ മാസത്തോടെ കരാർ പ്രവർത്തനക്ഷമമാകുമെന്നാണ് പ്രതീക്ഷിക്കുന്നത്. കരാറിന്റെ നിയമപരമായ വശങ്ങൾ അന്തിമമാക്കുന്നതിനായി ഇരുരാജ്യങ്ങളിലെയും ഉദ്യോഗസ്ഥർ തമ്മിലുള്ള നിർണ്ണായകമായ മൂന്ന് ദിവസത്തെ കൂടിക്കാഴ്ച ഫെബ്രുവരി 23-ന് അമേരിക്കയിൽ ആരംഭിക്കുമെന്നും അദ്ദേഹം വ്യക്തമാക്കി. ഇന്ത്യയും അമേരിക്കയും തമ്മിലുള്ള വ്യാപാര ബന്ധം കൂടുതൽ ശക്തിപ്പെടുത്തുന്നതിനുള്ള ഒരു ചട്ടക്കൂട് ഈ മാസം ആദ്യം തന്നെ രൂപീകരിച്ചിരുന്നു.അമേരിക്കയുമായുള്ള കരാറിന് പുറമെ, ബ്രിട്ടൻ, ഒമാൻ എന്നീ രാജ്യങ്ങളുമായുള്ള ഇന്ത്യയുടെ സ്വതന്ത്ര വ്യാപാര കരാറുകളും ഏപ്രിലിൽ തന്നെ നടപ്പിലാക്കാൻ സാധ്യതയുണ്ടെന്ന് മന്ത്രി പറഞ്ഞു. ന്യൂസിലൻഡുമായുള്ള കരാർ സെപ്റ്റംബറോടെ പ്രാബല്യത്തിൽ വരുമെന്നാണ് പ്രതീക്ഷിക്കുന്നത്. ആഗോള വിപണിയിൽ ഇന്ത്യയുടെ സാന്നിധ്യം വർദ്ധിപ്പിക്കുന്നതിനും കയറ്റുമതി മേഖലയ്ക്ക് പുത്തൻ ഉണർവ് നൽകുന്നതിനും ഈ വ്യാപാര കരാറുകൾ വലിയ തോതിൽ സഹായകമാകുമെന്നാണ് വിലയിരുത്തപ്പെടുന്നത്.