മിയാമി അന്താരാഷ്ട്ര വിമാനത്താവളത്തിൽ ഉപക്ഷിക്കപ്പെട്ട നിലയിൽ കണ്ടെത്തിയ ബാഗ് ഭീതി പരത്തി. വിമാനത്താവളത്തിന്റെ സൗത്ത് ടെർമിനലിൽ സംശയാസ്പദമായി ബാഗ് കണ്ടെത്തിയതോടെ ഞായറാഴ്ച വൈകുന്നേരത്തോടെ ആയിരക്കണക്കിന് യാത്രക്കാരെയാണ് ഒഴിപ്പിച്ചത്. തുടർന്ന് ബാഗിൽ അപകടകരമായ ഒന്നുമില്ലെന്ന് സ്ഥിരീകരിച്ചതോടെയാണ് ആശങ്ക ഒഴിയുകയും പ്രവർത്തനം സാധാരണ നിലയിലാവുകയും ചെയ്തത്.

ഡോർ 21 ന് സമീപമുള്ള ഡിപ്പാർച്ചർ ഏരിയയിലാണ് ഒരു ബാഗ് ഉപേക്ഷിക്കപ്പെട്ട നിലയിൽ കിടക്കുന്നതായി കണ്ടെത്തുന്നത്. വിവരം ലഭിച്ചതിനെ തുടർന്ന് മുൻകരുതൽ നടപടിയുടെ ഭാഗമായി അധികൃതർ ഉടൻ തന്നെ യാത്രക്കാരോടും ജീവനക്കാരോടും ഒഴിഞ്ഞുപോകാൻ നിർദ്ദേശിക്കുകയായിരുന്നു. തിരക്കേറിയ സമയത്തുണ്ടായ ഈ സംഭവം വിമാനത്താവളത്തിൻറെ പ്രവർത്തനത്തെ സാരമായി തന്നെ ബാധിച്ചു.

മുൻകരുതൽ നടപടിയുടെ ഭാഗമായാണ് യാത്രക്കാർക്ക് ടെർമിനലിൽ നിന്ന് വേഗത്തിലും സുരക്ഷിതമായും പുറത്തുപോകാൻ നിർദ്ദേശം നൽകിയതെന്ന് ഉദ്യോഗസ്ഥർ പറഞ്ഞു. കെട്ടിടത്തിൽ നിന്ന് കഴിയുന്നത്ര ദൂരേക്ക് മാറാനാണ് ഉദ്യോഗസ്ഥർ നിർദ്ദേശം നൽകിയതെന്ന് ദൃക്‌സാക്ഷികൾ വിവരിക്കുന്നു.

സൗത്ത് ടെർമിനൽ ഏരിയയിൽ സംശയാസ്പദമായ രീതിയിൽ ഒരു വസ്തു കണ്ടെത്തിയിട്ടുണ്ടെന്നും അന്വേഷണം നടക്കുന്നുണ്ടെന്നും മിയാമി-ഡേഡ് ഷെരീഫ് ഓഫീസ് സ്ഥിരീകരിച്ചു. തുടർന്ന് വിമാനത്താവളത്തിലെ പ്രവർത്തനത്തിൽ തടസം നേരിട്ടതായി അധികൃതർ എക്സിലൂടെ യാത്രക്കാർക്ക് മുന്നറിയിപ്പ് നൽകി. പരിശോധനകൾ കാരണം വിമാനങ്ങൾ വൈകാൻ സാധ്യതയുണ്ടെന്നും അധിക സമയം കരുതണമെന്നും നിർദ്ദേശം നൽകി.

ഒടുവിൽ ആശ്വാസം

മിയാമി-ഡേഡ് ഷെരീഫ് ഓഫീസ് നടത്തിയ വിശദമായ പരിശോധനകൾക്ക് ശേഷം ബാഗിൽ അപകടകരമായ ഒന്നുമില്ലെന്ന് സ്ഥിരീകരിച്ചു. ഇതിനെ തുടർന്ന് അടച്ചിട്ട ചെക്പോസ്റ്റുകൾ തുറക്കുകയും വിമാനത്താവളത്തിൻറെ പ്രവർത്തനം സാധാരണ നിലയിലാവുകയും ചെയ്തു. ഇതോടെ ഏതാനും സമയം നീണ്ടുനിന്ന വലിയ ആശങ്കകൾക്കാണ് വിരാമമായത്.

കഴിഞ്ഞ ദിവസമുണ്ടായ മറ്റൊരു ബോംബ് ഭീഷണിക്ക് പിന്നാലെയാണ് ഈ സംഭവമുണ്ടാകുന്നത്. ഈ ആഴ്ച ആദ്യം, ഹ്യൂസ്റ്റണിലേക്കുള്ള അമേരിക്കൻ എയർലൈൻസ് വിമാനത്തിൽ കയറാൻ തയ്യാറെടുക്കുന്നതിനിടെ ഒരു യാത്രക്കാരൻ തൻറെ കയ്യിൽ ബോംബുണ്ടെന്ന് പറഞ്ഞത് വലിയ പരിഭ്രാന്തി സൃഷ്ടിച്ചിരുന്നു. ബാഗ് വെക്കാൻ സ്ഥലമില്ലാത്തതിനാൽ അത് ചെക്ക്-ഇൻ ചെയ്യണമെന്ന് വിമാന ജീവനക്കാർ ആവശ്യപ്പെട്ടപ്പോഴാണ് യാത്രക്കാരൻ പരിഹാസരൂപേണ ഇക്കാര്യം പറഞ്ഞത്. അന്ന് ഡോഗ് സ്ക്വാഡിനെ ഉൾപ്പെടെ ഉപയോഗിച്ച് പരിശോധന നടത്തിയെങ്കിലും ഒന്നും കണ്ടെത്താനായിരുന്നില്ല.