യുക്രെയ്ൻ പ്രസിഡന്റ് വോളോഡിമർ സെലൻസ്‌കിയുമായി ഫ്ലോറിഡയിലെ മാർ-എ-ലാഗോ വസതിയിൽ നടത്തിയ മൂന്ന് മണിക്കൂർ നീണ്ട ചർച്ചയ്ക്ക് ശേഷം സമാധാന കരാർ ഉടൻ ഉണ്ടായേക്കുമെന്ന് അമേരിക്കൻ പ്രസിഡൻ്റ് ഡൊണാൾഡ് ട്രംപ്. യുക്രെയ്‌നിന്റെ സുരക്ഷാ ഗ്യാരണ്ടി സംബന്ധിച്ച കാര്യങ്ങൾ 95 ശതമാനവും പൂർത്തിയായതായി ട്രംപ് പറഞ്ഞു.എന്നാൽ കിഴക്കൻ യുക്രെയ്‌നിലെ ഭൂമി സംബന്ധിച്ച തർക്കങ്ങളിൽ (പ്രത്യേകിച്ച് ഡോൺബാസ് മേഖല) ഇപ്പോഴും അനിശ്ചിതത്വം തുടരുകയാണെന്ന് അദ്ദേഹം മുന്നറിയിപ്പ് നൽകി. ചർച്ചകൾ വളരെ ഫലപ്രദമായിരുന്നുവെന്നും സമാധാനത്തിലേക്ക് നമ്മൾ ഏറെ അടുത്തെത്തിയെന്നും ട്രംപ് മാധ്യമപ്രവർത്തകരോട് പറഞ്ഞു.ട്രംപിനൊപ്പം മാധ്യമങ്ങളെ കണ്ട സെലൻസ്‌കി കൂടിക്കാഴ്ചയ്ക്ക് നന്ദി അറിയിക്കുകയും നിർദ്ദിഷ്ട സമാധാന ചട്ടക്കൂടിന്റെ എല്ലാ വശങ്ങളും ചർച്ച ചെയ്തതായി വ്യക്തമാക്കുകയും ചെയ്തു. യുക്രെയ്ൻ മുന്നോട്ട് വെച്ച 20 ഇന സമാധാന പദ്ധതിയിൽ 90 ശതമാനം കാര്യങ്ങളിലും ധാരണയായിട്ടുണ്ട്. യുക്രെയ്‌നിന്റെ പ്രധാന ആവശ്യമായ സുരക്ഷാ ഗ്യാരണ്ടിയുടെ കാര്യത്തിൽ പൂർണ്ണമായ തീരുമാനമായെന്നും സെലൻസ്‌കി പറഞ്ഞു.സുസ്ഥിരമായ സമാധാനം കൈവരിക്കുന്നതിലെ പ്രധാന നാഴികക്കല്ലാണ് സുരക്ഷാ ഗ്യാരണ്ടികൾ," അദ്ദേഹം കൂട്ടിച്ചേർത്തു. വരും ആഴ്ചകളിൽ യുക്രേനിയൻ, യൂറോപ്യൻ പ്രതിനിധികൾ സാങ്കേതിക വശങ്ങൾ പൂർത്തിയാക്കാൻ വീണ്ടും യോഗം ചേരും. ജനുവരിയിൽ വാഷിംഗ്ടണിൽ വെച്ച് ട്രംപ് വീണ്ടും ചർച്ചകൾക്ക് ആതിഥേയത്വം വഹിക്കുമെന്നും അദ്ദേഹം അറിയിച്ചു.സമാധാന ചർച്ചകളിൽ പ്രധാന തടസ്സമായി നിൽക്കുന്നത് കിഴക്കൻ യുക്രെയ്‌നിലെ ഡോൺബാസ് മേഖലയെക്കുറിച്ചുള്ള തർക്കമാണ്. ഈ മേഖലയിൽ ഒരു സ്വതന്ത്ര വ്യാപാര മേഖല സ്ഥാപിക്കുന്ന കാര്യത്തിൽ ധാരണയായൊ എന്ന ചോദ്യത്തിന്, വിഷയം ഇപ്പോഴും പരിഹരിക്കപ്പെട്ടിട്ടില്ലെന്നും എന്നാൽ ഉടൻ തീരുമാനമുണ്ടാകുമെന്നും ട്രംപ് മറുപടി നൽകി.ഡോൺബാസ് വിഷയത്തിൽ യുക്രെയ്‌നിന്റെ നിലപാട് വളരെ വ്യക്തമാണെന്നും റഷ്യയുടെ നിലപാടിൽ നിന്ന് അത് വ്യത്യസ്തമാണെന്നും സെലൻസ്‌കി വ്യക്തമാക്കി. നിലവിൽ യുക്രെയ്‌നിന്റെ നിയന്ത്രണത്തിലുള്ള ഭൂമിയെ തങ്ങൾ മാനിക്കുന്നുവെന്നും അദ്ദേഹം പറഞ്ഞു.