ജപ്പാനിൽ ട്രാഫിക് നിയമങ്ങൾ പ്രകാരം മദ്യപിച്ച് സൈക്കിൾ ഓടിക്കുന്നവർക്ക് കനത്ത പിഴയും തടവുശിക്ഷയുമാണ് ലഭിക്കുക. ഇപ്പോഴിതാ 900-ത്തോളം പേരുടെ കാർ ഡ്രൈവിംഗ് ലൈസെൻസാണ് മദ്യപിച്ച് സൈക്കിൾ ഓടിച്ചതിന് റദ്ദാക്കിയിരിക്കുന്നത്. അടുത്തിടെയാണ് ജപ്പാനിൽ സൈക്കിൾ യാത്രക്കാർക്ക് കർശനമായ പിഴ ചുമത്തുന്ന ട്രാഫിക് നിയമങ്ങൾ നിലവിൽ വന്നത്. മദ്യപിച്ച് സൈക്കിൾ ഓടിക്കുന്നവർക്ക് മൂന്ന് വർഷം തടവും 500,000 യെൻ (3,200 ഡോളർ) പിഴയോ ലഭിക്കും. കാറോടിക്കുമ്പോൾ അപകടം വരുത്താനുള്ള സാധ്യതയുണ്ടെന്ന് ചൂണ്ടിക്കാട്ടിയാണ് കാറുകളുടെ ലൈസൻസ് റദ്ദാക്കുന്നത്.

കഴിഞ്ഞ വർഷത്തേക്കാൾ ഈ വർഷം ജനുവരി മുതൽ സെപ്റ്റംബർ വരെ സസ്പെൻഡ് ചെയ്ത കാർ ഡ്രൈവിംഗ് ലൈസൻസുകളുടെ എണ്ണം കുത്തനെ വർദ്ധിച്ചു എന്നാണ് റിപ്പോർട്ടുകൾ. ബ്രീത്ത് ആൽക്കഹോൾ പരിശോധനയിൽ ലിറ്ററിന് 0.15 മില്ലിഗ്രാമോ അതിൽ കൂടുതലോ അളവ് കണ്ടാൽ സൈക്കിളോടിച്ചവർക്കെതിരെ പിഴ ചുമത്താമെന്നാണ് നിയമം പറയുന്നത്.

മദ്യപിച്ച് സൈക്കിൾ ഓടിക്കുന്നവർക്ക് സൈക്കിൾ നൽകാൻ തയ്യാറാവുന്നവർക്കും, സൈക്കിൾ യാത്രക്കാർക്ക് മദ്യം നൽകുന്നവർക്കും പിഴകൾ ബാധകമായേക്കാം. 4,500 -ലധികം പേർ 2024 നവംബറിനും ഈ വർഷം ജൂണിനും ഇടയിൽ മദ്യപിച്ച് സൈക്കിൾ ഓടിച്ചെന്നാണ് പോലീസ് കണക്കുകൾ പറയുന്നത്.

പകർച്ചവ്യാധിയുടെ സമയത്താണ് ജപ്പാനിൽ സൈക്കിളുകൾക്ക് പ്രിയമേറിയത്. എന്നാൽ അപകടങ്ങളും അതുപോലെ കൂടിവന്നപ്പോൾ നിയമം വരികയും ചെയ്തു. 72,000 -ത്തിലധികം സൈക്കിൾ അപകടങ്ങളാണ് 2023 -ൽ ജപ്പാനിൽ രേഖപ്പെടുത്തിയത്.