അമേരിക്ക ആണവ പരീക്ഷണങ്ങൾ പുനരാരംഭിക്കുമെന്ന പ്രസിഡന്റ് ഡോണൾഡ് ട്രംപിന്റെ പ്രഖ്യാപനം, റഷ്യയുടെയും ചൈനയുടെയും ആണവ ശേഷിയോട് കിടപിടിക്കാൻ ലക്ഷ്യമിട്ടുള്ളതായിരുന്നെങ്കിലും, യാഥാർത്ഥ്യത്തിൽ അത് അമേരിക്കയുടെ ആണവ ശേഷിയിലെ ദയനീയമായ തളർച്ചയെയാണ് തുറന്നുകാട്ടുന്നത്. വാഷിംഗ്ടൺ പോസ്റ്റിന്റെ റിപ്പോർട്ട് അനുസരിച്ച്, അമേരിക്കയിൽ ആണവ പരീക്ഷണങ്ങൾ പുനരാരംഭിക്കാൻ വർഷങ്ങളെടുക്കുമെന്നും, അതിനായി കോടിക്കണക്കിന് ഡോളർ ചെലവഴിക്കേണ്ടി വരുമെന്നും വിദഗ്ധർ ചൂണ്ടിക്കാട്ടുന്നു.

ട്രംപിന്റെ വാചകമടിക്ക് പിന്നിലെ യാഥാർത്ഥ്യം

ട്രംപ്, “റഷ്യയ്ക്കും ചൈനയ്ക്കും തുല്യമായി നമ്മുടെ ആണവായുധങ്ങൾ പരീക്ഷിക്കാൻ യുദ്ധ വകുപ്പിന് നിർദ്ദേശം നൽകിയതായി” പ്രഖ്യാപിക്കുകയും, തയ്യാറെടുപ്പുകൾ ഉടൻ ആരംഭിക്കുമെന്ന് പറയുകയും ചെയ്തിരുന്നു. എന്നാൽ മൂന്ന് പതിറ്റാണ്ടുകളായി ഈ രാജ്യങ്ങളൊന്നും നടത്തിയിട്ടില്ലാത്ത ഭൂഗർഭ ആണവ സ്ഫോടനങ്ങളെയാണോ അദ്ദേഹം ഉദ്ദേശിച്ചത് എന്ന് വ്യക്തമല്ല. ഏതായാലും, അമേരിക്ക ഇത്തരം ഒരു നീക്കവുമായി മുന്നോട്ട് പോയാൽ, ശക്തമായ പ്രതികരണത്തിന് അത് കാരണമാകുമെന്ന് റഷ്യ ഇതിനോടകം തന്നെ മുന്നറിയിപ്പ് നൽകിയിട്ടുണ്ട്.

നെവാഡ: ഉറങ്ങിക്കിടക്കുന്ന പരീക്ഷണസ്ഥലം

മൂന്ന് പതിറ്റാണ്ടുകൾക്ക് മുമ്പ് (1992-ൽ) അമേരിക്ക അവസാനമായി ആണവ സ്ഫോടനം നടത്തിയ നെവാഡ പരീക്ഷണ സ്ഥലം, ഇപ്പോൾ കമ്പ്യൂട്ടർ സിമുലേഷനുകളും ‘സബ്ക്രിട്ടിക്കൽ ടെസ്റ്റുകളും’ മാത്രമാണ് ഉപയോഗിക്കുന്നത്. അമേരിക്കയുടെ ആണവശേഖരം സുരക്ഷിതമാണെന്ന് ഉറപ്പിക്കാൻ ഇത് മാത്രം മതി എന്നാണ് ഇതുവരെയുള്ള വാദം.

ട്രംപിന്റെ നിർദ്ദേശം നടപ്പിലാക്കുകയാണെങ്കിൽ, അതിന്റെ ദൗത്യം പെന്റഗണിന്റേതല്ല, മറിച്ച് നെവാഡ പരീക്ഷണ കേന്ദ്രത്തിന്റെ മേൽനോട്ടം വഹിക്കുന്ന ഊർജ്ജ വകുപ്പിന് (NNSA) ആയിരിക്കും. എന്നാൽ അവിടെ പരീക്ഷണം പുനരുജ്ജീവിപ്പിക്കുന്നത് അമേരിക്കയ്ക്ക് വലിയ സാമ്പത്തിക ബാധ്യത വരുത്തിവയ്ക്കും.

ഏണസ്റ്റ് മോണിസ് (മുൻ ഊർജ്ജ വകുപ്പ് മേധാവി): ശാസ്ത്രീയ വിവരങ്ങൾ ശേഖരിക്കാതെ നടത്തുന്ന ഒരു “സ്റ്റണ്ട്” സ്ഫോടനം പോലും തയ്യാറാക്കാൻ “ഒരുപക്ഷേ ഒരു വർഷം” എടുത്തേക്കാം.

കോറി ഹിൻഡർസ്റ്റൈൻ (മുൻ മുതിർന്ന NNSA ഉദ്യോഗസ്ഥൻ): ഏകദേശം 100 മില്യൺ ഡോളർ ചെലവിൽ ഏജൻസിക്ക് ഒരു പുതിയ ലംബ ഷാഫ്റ്റ് കുഴിക്കേണ്ടിവരും.

അനുഭവസമ്പത്തുള്ള വിദഗ്ധർ എവിടെ?

സാമ്പത്തിക പ്രതിസന്ധിക്കും സമയനഷ്ടത്തിനും പുറമെ, ആണവ പരീക്ഷണങ്ങൾക്ക് നേതൃത്വം നൽകാൻ കഴിവുള്ള വിദഗ്ധരുടെ കുറവും അമേരിക്കയെ അലട്ടുന്നുണ്ട്. ദീർഘകാല ആണവ ഉദ്യോഗസ്ഥനായ പോൾ ഡിക്ക്മാൻ മുന്നറിയിപ്പ് നൽകുന്നത് ശ്രദ്ധേയമാണ്. പ്രായോഗിക പരീക്ഷണ പരിചയമുള്ള ഉദ്യോഗസ്ഥരെ കണ്ടെത്താൻ അമേരിക്ക ബുദ്ധിമുട്ടിയേക്കാം. കഴിവുള്ള ടെസ്റ്റ് ഡയറക്ടർമാർ “ബ്യൂറോക്രാറ്റുകളോ പവർപോയിന്റ് ആൾക്കൂട്ടമോ അല്ല”, മറിച്ച് “നഖത്തിനടിയിൽ ധാരാളം അഴുക്കുള്ള” ആളുകളായിരിക്കണം എന്നാണ് അദ്ദേഹം പരിഹസിച്ചത്. അതായത്, മൂന്ന് പതിറ്റാണ്ടായി നിശ്ചലമായ ഒരു സംവിധാനം പുനരുജ്ജീവിപ്പിക്കാൻ അനുഭവജ്ഞാനമുള്ള ആളുകൾ അമേരിക്കയിൽ നിലവിലില്ലെന്ന് സാരം

റഷ്യയുടെ കുതിപ്പ്; അമേരിക്കയുടെ ആശങ്ക

അമേരിക്കൻ അധികാരികൾ പഴയ സംവിധാനങ്ങൾ പൊടിതട്ടിയെടുക്കാൻ ശ്രമിക്കുമ്പോൾ, റഷ്യ ആകട്ടെ നൂതന സാങ്കേതികവിദ്യകളിലൂടെ ആണവശേഷി വർധിപ്പിക്കുകയാണ്. പരിധിയില്ലാത്ത ദൂരമുള്ള ബ്യൂറെവെസ്റ്റ്‌നിക് ക്രൂയിസ് മിസൈൽ (Burevestnik cruise missile), അണ്ടർവാട്ടർ ഡ്രോൺ ആയ പോസിഡോൺ (Poseidon) എന്നിവയുടെ വിജയകരമായ പരീക്ഷണങ്ങൾ റഷ്യൻ പ്രസിഡന്റ് വ്‌ളാഡിമിർ പുടിൻ പ്രഖ്യാപിച്ചത് ട്രംപിന്റെ ഈ പ്രഖ്യാപനത്തിന് തൊട്ടുപിന്നാലെയാണ്. ഈ രണ്ട് ആയുധങ്ങളിലും പ്രൊപ്പൽഷൻ യൂണിറ്റായി ഉപയോഗിക്കുന്നത് മികച്ച കോം‌പാക്റ്റ് ന്യൂക്ലിയർ റിയാക്ടറുകളാണ്.

റഷ്യ കൈവരിച്ച ഈ വൻ മുന്നേറ്റത്തിന് മുന്നിൽ, പഴകി ദ്രവിച്ച നെവാഡയിലെ പരീക്ഷണ കേന്ദ്രം കുത്തിപ്പൊക്കിയുള്ള ട്രംപിന്റെ പ്രഖ്യാപനം, ലോക ശക്തി എന്ന നിലയിൽ അമേരിക്ക നേരിടുന്ന സാങ്കേതിക-പ്രായോഗിക പ്രതിസന്ധിയുടെ നേർചിത്രമാണ്. ഇത് അമേരിക്കയുടെ സുരക്ഷാ വാദങ്ങൾ വെറും വലിയ അവകാശവാദങ്ങൾ മാത്രമാണെന്ന് തെളിയിക്കുന്നു.