പാരിസ്: ഫ്രാൻസിലെ നൂറുകണക്കിന് സൂപ്പർമാർക്കറ്റുകളിലെ ഫ്രിഡ്ജുകളുടെയും ഫ്രീസറുകളുടെയും നിയന്ത്രണം ഏറ്റെടുത്ത് സൈബർ അക്രമികൾ. വാരാന്ത്യത്തിൽ നടന്ന വൻ സൈബർ ആക്രമണത്തിൽ സൂപ്പർമാർക്കറ്റ് റഫ്രിജറേഷൻ സംവിധാനങ്ങളുടെ താപനില ഏകദേശം 50 ഡിഗ്രി സെൽഷ്യസിലേക്ക് ഉയർത്തുകയായിരുന്നു. ഇതോടെ ടൺ കണക്കിന് ഭക്ഷണസാധനങ്ങളും ഫ്രഷ് ഉൽപ്പന്നങ്ങളും നശിച്ചു. ചില കേന്ദ്രങ്ങളിൽ അമിത താപനിലയെത്തുടർന്ന് തീപിടുത്തവും റിപ്പോർട്ട് ചെയ്തിട്ടുണ്ട്. പാരീസ് അധികൃതർ അന്വേഷണം ആരംഭിച്ചെങ്കിലും നാശനഷ്ടങ്ങളുടെ പൂർണ്ണ വ്യാപ്തി വ്യക്തമായിട്ടില്ല.പ്രമുഖ സൂപ്പർമാർക്കറ്റ് ശൃംഖലയായ ഇന്റർമാർച്ചെയുടെ സി.ഇ.ഒ തിയറി കോട്ടില്ലാർഡിന്റെ പ്രാഥമിക നിഗമനമനുസരിച്ച് കോടിക്കണക്കിന് യൂറോയുടെ നഷ്ടമാണ് വ്യാപാരികൾക്ക് ഉണ്ടായിരിക്കുന്നത്. ഫ്രാൻസിന്റെ നാഷണൽ സൈബർ സെക്യൂരിറ്റി ഏജൻസി അന്വേഷണം ഊർജിതമാക്കി. പ്രമുഖ ഡാനിഷ് എഞ്ചിനീയറിംഗ് സ്ഥാപനമായ ‘ഡാൻഫോസ്’ നൽകുന്ന റഫ്രിജറേഷൻ സിസ്റ്റത്തിലെ സുരക്ഷാ പഴുതുകളാണ് ആക്രമണത്തിന് കാരണമായതെന്നാണ് സൂചന. കാരിഫോർ, മോണോപ്രിക്സ്, കോ-ഓപ്പറേറ്റീവ് യു തുടങ്ങി നിരവധി മുൻനിര റീട്ടെയിൽ ഔട്ട്ലെറ്റുകളെയും ആക്രമണം സാരമായി ബാധിച്ചു.റീട്ടെയിൽ മേഖലയിലെ ഇന്റർനെറ്റുമായി ബന്ധിപ്പിച്ചിരിക്കുന്ന ഓപ്പറേഷൻ സാങ്കേതികവിദ്യകളിൽ നിലനിൽക്കുന്ന പഴകിയ ഫേംവെയറുകളാണ് ഹാക്കർമാർ ചൂഷണം ചെയ്തതെന്ന് റിപ്പോർട്ടുകൾ വ്യക്തമാക്കുന്നു. ഫ്രാൻസിന് പുറമെ സ്പെയിൻ, പോർച്ചുഗൽ, പോളണ്ട്, ജർമ്മനി, ബെൽജിയം തുടങ്ങിയ യൂറോപ്യൻ രാജ്യങ്ങളിലെ സ്ഥാപനങ്ങളെയും ഈ സൈബർ ആക്രമണം ബാധിച്ചിട്ടുണ്ട്. ജനങ്ങളുടെ ഭക്ഷ്യസുരക്ഷയെയും വിതരണ ശൃംഖലയെയും നേരിട്ട് ബാധിക്കുന്ന ഇത്തരം ആക്രമണങ്ങൾ അഭൂതപൂർവ്വവും അതീവ ഗുരുതരവുമാണെന്ന് വ്യവസായ പ്രമുഖർ ചൂണ്ടിക്കാണിക്കുന്നു.

ആഗോളതലത്തിൽ ഭക്ഷ്യ-പാനീയ വിതരണ രംഗം ഹാക്കർമാരുടെ പ്രധാന ലക്ഷ്യമായി മാറിക്കൊണ്ടിരിക്കുകയാണെന്ന് വിദഗ്ദ്ധർ മുന്നറിയിപ്പ് നൽകുന്നു. നേരത്തെ യുകെയിലെ പ്രമുഖ റീട്ടെയിലർമാരായ മാർക്ക്സ് & സ്പെൻസർ, ഹാരോഡ്സ് തുടങ്ങിയവയും സമാനമായ സൈബർ ആക്രമണങ്ങൾക്ക് ഇരയായി കോടിക്കണക്കിന് ഡോളറിന്റെ നഷ്ടം നേരിട്ടിരുന്നു. വ്യാവസായിക അടിത്തറകളെ തകർക്കുന്ന തരം റാൻസംവെയർ ഗ്രൂപ്പുകൾ ഇന്റർനെറ്റ് അധിഷ്ഠിത മെഷിനറികളിലെ പഴുതുകൾ മുതലെടുക്കുന്നത് വർദ്ധിച്ചുവരുന്ന സാഹചര്യത്തിൽ ശക്തമായ സൈബർ സുരക്ഷാ മാനദണ്ഡങ്ങൾ നടപ്പിലാക്കാനൊരുങ്ങുകയാണ് കമ്പനികൾ.