എറണാകുളം : മുതിർന്ന ഐപിഎസ് ഉദ്യോഗസ്ഥനായ എഡിജിപി എസ്. ശ്രീജിത്തിന് ഡിജിപിയായി സ്ഥാനക്കയറ്റം നൽകിയ സംസ്ഥാന സർക്കാർ നടപടിക്കെതിരെ രൂക്ഷവിമർശനവുമായി ഹൈക്കോടതി. ഗൗരവതരമായ അഴിമതി ആരോപണങ്ങൾ നേരിടുന്ന ഒരു ഉദ്യോഗസ്ഥന് സ്ഥാനക്കയറ്റം നൽകാൻ എന്താണ് ഇത്രയധികം തിടുക്കമെന്ന് കോടതി ചോദിച്ചു. എഡിജിപിയായ ഒരാൾക്ക് ഡിജിപിയായി പ്രൊമോഷൻ നൽകുമ്പോൾ പ്രാഥമികമായി വേണ്ട വിജിലൻസ് ക്ലിയറൻസ് എവിടെപ്പോയെന്നും, നിലവിലെ സ്ഥാനക്കയറ്റ നടപടികൾ പൂർണ്ണമായും സർവീസ് ചട്ടങ്ങൾക്ക് വിരുദ്ധമാണെന്നും ഹൈക്കോടതി തുറന്നടിച്ചു. സ്ഥാനക്കയറ്റം തികച്ചും സ്വാഭാവികവും സാധാരണവുമായ ഭരണനിർവ്വഹണ നടപടി മാത്രമാണെന്ന് സർക്കാർ അഭിഭാഷകൻ വിശദീകരിക്കാൻ ശ്രമിച്ചെങ്കിലും കോടതി അത് തള്ളിക്കളഞ്ഞു.

​ബോഡി ബിൽഡർമാർക്ക് മോട്ടോർ വാഹന വകുപ്പിലും പോലീസിലും ഇൻസ്പെക്ടർ തസ്തികകളിൽ വഴിവിട്ട് നിയമനം നൽകാനായി അന്നത്തെ ഹെഡ്ക്വാർട്ടേഴ്സ് എഡിജിപിയായിരുന്ന എസ്. ശ്രീജിത്ത് നിർണ്ണായക ഇടപെടലുകൾ നടത്തുകയും അഴിമതി കാണിക്കുകയും ചെയ്തുവെന്ന് ആരോപിച്ച് പൊതുപ്രവർത്തകൻ കെ.എം. ഷാജഹാൻ സമർപ്പിച്ച ഹർജിയിലാണ് കോടതിയുടെ നിർണ്ണായക ഇടപെടൽ. ശ്രീജിത്തിനെതിരെ വിജിലൻസ് അന്വേഷണം നടത്താൻ അനുമതി തേടി വിജിലൻസ് ഡയറക്ടർ ആഭ്യന്തര-വിജിലൻസ് വകുപ്പ് അഡീഷണൽ ചീഫ് സെക്രട്ടറിക്ക് കത്തുനൽകിയിരുന്നു. എന്നാൽ അന്നത്തെ ആഭ്യന്തര സെക്രട്ടറിയും നിലവിലെ ചീഫ് സെക്രട്ടറിയുമായ ബിശ്വനാഥ് സിൻഹ, നിലവിലെ ആഭ്യന്തര സെക്രട്ടറി മിൻഹാജ് ആലം എന്നിവർ ഉന്നത സ്വാധീനം ഉപയോഗിച്ച് വിജിലൻസ് അന്വേഷണാനുമതി തടയുകയും ശ്രീജിത്തിന് വഴിവിട്ട് സഹായം നൽകുകയുമായിരുന്നുവെന്നാണ് ഹർജിക്കാരന്റെ പ്രധാന ആരോപണം.

​കെ.എം. ഷാജഹാന്റെ പരാതിയിൽ വിജിലൻസ് അന്വേഷണം പ്രഖ്യാപിക്കുന്ന കാര്യത്തിൽ അന്തിമ തീരുമാനമെടുക്കാൻ ഹൈക്കോടതി സർക്കാരിന് നൽകിയ രണ്ടാഴ്ചത്തെ സമയപരിധി അവസാനിക്കാനിരിക്കെയാണ് കോടതി ഈ കടുത്ത ചോദ്യങ്ങൾ ഉന്നയിച്ചത്. ആരോപണവിധേയനായ ഉദ്യോഗസ്ഥനെ രക്ഷിക്കാൻ ഉന്നത സിവിൽ സർവീസ് ഉദ്യോഗസ്ഥരടക്കം നടത്തിയ നീക്കങ്ങളെ നിരീക്ഷിച്ച കോടതി വിഷയം സംബന്ധിച്ച് കൃത്യമായ വിശദീകരണം നൽകാൻ സർക്കാരിനോട് ആവശ്യപ്പെട്ടിട്ടുണ്ട്. ഉന്നത പോലീസ് തലപ്പത്തെ സ്ഥാനക്കയറ്റങ്ങളുമായി ബന്ധപ്പെട്ട് കോടതിയുടെ ഭാഗത്തുനിന്നുണ്ടായ ഈ കടുത്ത നിലപാട് ആഭ്യന്തര വകുപ്പിനും സർക്കാരിനും വൻ തിരിച്ചടിയായിട്ടുണ്ട്.