ജിദ്ദ: ഊർജ്ജ സുരക്ഷയും പ്രാദേശിക സഹകരണവും ലക്ഷ്യമിട്ടുള്ള ഗൾഫ് പര്യടനത്തിന്റെ ഭാഗമായി ഇറ്റാലിയൻ പ്രധാനമന്ത്രി ജോർജിയ മെലോണി വെള്ളിയാഴ്ച സൗദി അറേബ്യയിലെ ജിദ്ദയിൽ എത്തി. മേഖലയിൽ നിലവിലുള്ള സംഘർഷാവസ്ഥയ്ക്ക് ശേഷം യൂറോപ്യൻ യൂണിയൻ, ജി20, നാറ്റോ എന്നീ കൂട്ടായ്മകളുടെ നേതൃനിരയിൽ നിന്നും ഗൾഫ് സന്ദർശിക്കുന്ന ആദ്യത്തെ പ്രമുഖ നേതാവാണ് മെലോണി എന്ന് ഇറ്റാലിയൻ പ്രധാനമന്ത്രിയുടെ ഓഫീസ് അറിയിച്ചു. സന്ദർശന വേളയിൽ സൗദി അറേബ്യ, ഖത്തർ, യുണൈറ്റഡ് അറബ് എമിറേറ്റ്സ് എന്നീ രാജ്യങ്ങളിലെ ഉന്നത പ്രതിനിധികളുമായി അവർ കൂടിക്കാഴ്ച നടത്തും.

ഇറാനിയൻ ആക്രമണങ്ങളുടെ പശ്ചാത്തലത്തിൽ ഗൾഫ് രാജ്യങ്ങളുമായുള്ള ബന്ധം ശക്തിപ്പെടുത്തുന്നതിനും ഇറ്റലിയുടെ പൂർണ്ണ പിന്തുണ അറിയിക്കുന്നതിനുമാണ് ഈ സന്ദർശനം പ്രധാനമായും ലക്ഷ്യമിടുന്നത്. ഇതിനുപുറമെ, മേഖലയിലെ പ്രമുഖ രാഷ്ട്രങ്ങളുമായി കൂടുതൽ കരുത്തുറ്റ തന്ത്രപരമായ പങ്കാളിത്തം കെട്ടിപ്പടുക്കാനും ഇറ്റലി ആഗ്രഹിക്കുന്നു. നിലവിലെ സങ്കീർണ്ണമായ രാഷ്ട്രീയ സാഹചര്യത്തിൽ ഇറ്റലിയുടെ നിലപാട് വ്യക്തമാക്കുന്നതിനും മേഖലയിലെ സമാധാനശ്രമങ്ങളിൽ പങ്കാളിയാകുന്നതിനും ഈ സന്ദർശനം വഴിതുറക്കുമെന്നാണ് വിലയിരുത്തപ്പെടുന്നത്.

ഇറ്റലിയുടെ ദേശീയ ഊർജ്ജ സുരക്ഷ ശക്തമാക്കുക എന്നതും ഈ യാത്രയുടെ പ്രധാന ഉദ്ദേശ്യങ്ങളിലൊന്നാണ്. ഇറ്റലിയെ സംബന്ധിച്ചിടത്തോളം എണ്ണയുടെയും പ്രകൃതിവാതകത്തിന്റെയും നിർണ്ണായക സ്രോതസ്സാണ് ഗൾഫ് രാജ്യങ്ങൾ. ആഗോള വിപണിയിലെ ഇന്ധനവില നിയന്ത്രിക്കുന്നതിലും ഈ രാജ്യങ്ങൾ നിർണ്ണായക പങ്ക് വഹിക്കുന്നുണ്ട്. ഗൾഫ് രാജ്യങ്ങളുമായുള്ള ഊർജ്ജ സഹകരണം ഉറപ്പാക്കുന്നതിലൂടെ രാജ്യത്തെ ഇന്ധന ലഭ്യത സുരക്ഷിതമാക്കാനും സാമ്പത്തിക സ്ഥിരത നിലനിർത്താനുമാണ് ഇറ്റാലിയൻ സർക്കാർ ലക്ഷ്യമിടുന്നത്.