ഇക്കുറി അത്തം പത്തിനല്ല, പതിനൊന്നിനാണ് തിരുവോണം. ചിത്തിര രണ്ട് ദിവസമുണ്ടായിരുന്നു എന്നതാണ് ആ അധിക ദിവസത്തിന് കാരണം. കൊല്ലവർഷം 1201-ാം ആണ്ട് ചിങ്ങമാസത്തിലെ ചോതി ഇന്നാണ്. ഇന്ന് ചിങ്ങം 13, ഇന്നത്തെ പൂക്കളത്തിൽ ആരെല്ലാമാണ് അണിനിരക്കുക? എന്തെല്ലാം പ്രത്യേകതകളാണ് ചിങ്ങത്തിലെ ചോതിയ്ക്കുള്ളതെന്നറിയാം.. 

മൂന്നാം ദിവസത്തെ ഓണം ചോതി നക്ഷത്രത്തോടൊപ്പമാണ് തുടങ്ങുന്നത്. എന്നത്തേയും പോലെ ഈ ദിനത്തിലും പൂക്കളം ഒരുക്കുന്നു. ഇത്തവണ പൂക്കളം ഡിസൈനില്‍ മൂന്ന് നിറങ്ങളിലുള്ള പൂക്കള്‍ ഉപയോഗിക്കുന്നു എന്നതാണ് പ്രത്യേകത. ഈ ദിവസം, പൂക്കളത്തിലേക്ക് ഒന്നിലധികം വരിയില്‍ പൂക്കള്‍ ചേര്‍ക്കുന്നു. ഇത് കാഴ്ചയില്‍ പൂക്കളത്തെ വലുതാക്കുന്നു. ചോതിനാള്‍ മുതല്‍ മാത്രമേ ചെമ്പരത്തിപ്പൂവിന് പൂക്കളത്തില്‍ സ്ഥാനമുള്ളൂ. പൂക്കളത്തിന് നിറവും വലിപ്പവും കൂടി വരുന്നത് ചോതിനാള്‍ മുതലാണ്. 

ഗൃഹനാഥന്റെ കയ്യിലെ പണം കുറഞ്ഞു വരുന്നതും ചോതി നാള്‍ തൊട്ടാണ്. പുതിയ വസ്ത്രങ്ങള്‍ എടുക്കാനും ആഭരണങ്ങള്‍ വാങ്ങാനും ഗൃഹോപകരണങ്ങള്‍ സ്വന്തമാക്കാനും മറ്റും ആളുകള്‍ കൂടുതലായും തിരഞ്ഞെടുക്കുന്നത് ചോതി ദിവസമാണ്. ഓണക്കോടി എന്നറിയപ്പെടുന്ന പുതിയ വസ്ത്രങ്ങളും ആഭരണങ്ങളും പരസ്പരം സമ്മാനമായി നല്‍കുന്നതാണ് ഓണത്തിന്റെ ഒരു പ്രധാന ആകര്‍ഷണം. ഓണക്കോടി മുതിര്‍ന്നവരാണ് എല്ലാവര്‍ക്കും നല്‍കുന്നത്. കുടുംബത്തിലെ കാരണവരാണ് ഈ ചടങ്ങ് നിര്‍വ്വഹിച്ച് പോരുന്നത്. 

ചോതി ദിനത്തില്‍ ഐശ്വര്യത്തിനും സന്തോഷത്തിനും വേണ്ടി പ്രത്യേകം പ്രാര്‍ത്ഥനകളും മറ്റും നടത്തുന്നു. കുടുംബാംഗങ്ങള്‍ വിവിധങ്ങളായ സാധനങ്ങള്‍ വാങ്ങുന്നതിനായി പുറത്ത് പോകുന്നതാണ് ആഘോഷത്തിന്റെ രസകരമായ ഒരു കാര്യം. ഓണത്തിനായി പലഹാരങ്ങള്‍ തയ്യാറാക്കാന്‍ ആരംഭിക്കുന്നതും ചോതി ദിവസം മുതലാണ്.