പശ്ചിമേഷ്യയിലെ യുദ്ധം അവസാനിപ്പിക്കുന്നതിനായി അമേരിക്ക മുന്നോട്ട് വെച്ച നിർദ്ദേശങ്ങൾ ഇറാൻ പരിശോധിക്കുന്നുണ്ടെങ്കിലും വാഷിംഗ്ടണുമായി നേരിട്ടുള്ള ചർച്ചകൾക്ക് തയ്യാറല്ലെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി വ്യക്തമാക്കി. ഇടനിലക്കാർ വഴി സന്ദേശങ്ങൾ കൈമാറുന്നത് അമേരിക്കയുമായുള്ള ഔദ്യോഗിക ചർച്ചയായി കണക്കാക്കാനാവില്ലെന്ന് അദ്ദേഹം ഔദ്യോഗിക ടെലിവിഷൻ ചാനലിന് നൽകിയ അഭിമുഖത്തിൽ പറഞ്ഞു.

ഇറാൻ ഭരണകൂടത്തിന്റെ ഉന്നത നേതൃത്വം അമേരിക്കയുടെ നിർദ്ദേശങ്ങൾ വിലയിരുത്തി വരികയാണ്. എന്നാൽ അമേരിക്കയുമായി നേരിട്ട് സംവദിക്കാൻ നിലവിൽ ഉദ്ദേശിക്കുന്നില്ല. വിവിധ ഇടനിലക്കാർ വഴി അമേരിക്ക സന്ദേശങ്ങൾ അയക്കുന്നുണ്ടെന്ന കാര്യം അരാഗ്ചി സ്ഥിരീകരിച്ചു.സ്വന്തം നിബന്ധനകൾ അംഗീകരിച്ചാൽ മാത്രമേ യുദ്ധം അവസാനിപ്പിക്കൂ എന്ന നിലപാടിലാണ് ഇറാൻ. ആക്രമണങ്ങൾ പൂർണ്ണമായും നിർത്തുക, ഭാവിയിൽ യുദ്ധമുണ്ടാകില്ലെന്ന് ഉറപ്പ് നൽകുക, യുദ്ധനഷ്ടങ്ങൾക്ക് പരിഹാരം കാണുക, ഹോർമുസ് കടലിടുക്കിന് മേലുള്ള ഇറാന്റെ അധികാരം അംഗീകരിക്കുക എന്നിവയാണ് ടെഹ്റാൻ മുന്നോട്ട് വെക്കുന്ന പ്രധാന ആവശ്യങ്ങൾ.യുദ്ധം എപ്പോൾ അവസാനിപ്പിക്കണമെന്ന് തീരുമാനിക്കാൻ അമേരിക്കൻ പ്രസിഡന്റ് ഡൊണാൾഡ് ട്രംപിനെ അനുവദിക്കില്ലെന്നും അമേരിക്കയുടെ നിബന്ധനകൾ അമിതമാണെന്നും ഇറാൻ വ്യക്തമാക്കി.അയൽരാജ്യങ്ങൾ അമേരിക്കയിൽ നിന്ന് അകലം പാലിക്കണമെന്ന് അരാഗ്ചി ആവശ്യപ്പെട്ടു. നേരത്തെ അമേരിക്ക മുന്നോട്ട് വെച്ച വെടിനിർത്തൽ നിർദ്ദേശം തള്ളിയ ഇറാൻ, ഇസ്രായേലിനും ഗൾഫ് രാജ്യങ്ങൾക്കും നേരെ പുതിയ ആക്രമണങ്ങൾ നടത്തിയിരുന്നു. കുവൈറ്റ് അന്താരാഷ്ട്ര വിമാനത്താവളത്തിലുണ്ടായ ഡ്രോൺ ആക്രമണം ഇതിന്റെ ഭാഗമായിരുന്നു.മേഖലയിൽ സംഘർഷം നിലനിൽക്കുന്ന പശ്ചാത്തലത്തിൽ കൂടുതൽ സൈനികരെ വിന്യസിക്കാൻ അമേരിക്കയും തയ്യാറെടുക്കുകയാണ്. ഇറാന്റെ കടുത്ത നിലപാടുകൾ സമാധാന ചർച്ചകളെ കൂടുതൽ സങ്കീർണ്ണമാക്കുന്നു.