പശ്ചിമ ബംഗാളിൽ അന്താരാഷ്ട്ര സാന്താൾ സമ്മേളനത്തിൽ പങ്കെടുക്കാനെത്തിയ രാഷ്ട്രപതി ദ്രൗപദി മുർമുവിന് നേരിടേണ്ടി വന്ന അസൗകര്യങ്ങളിൽ ഭരണകക്ഷിയായ തൃണമൂൽ കോൺഗ്രസിനെതിരെ (TMC) രൂക്ഷവിമർശനവുമായി പ്രധാനമന്ത്രി നരേന്ദ്ര മോദി. ഗോത്രവർഗക്കാരിയായ രാഷ്ട്രപതിയോടുള്ള തൃണമൂൽ കോൺഗ്രസിന്റെ അഹങ്കാരവും വൃത്തികെട്ട രാഷ്ട്രീയവും ബംഗാളിലെ ജനങ്ങൾ ഉടൻ തകർക്കുമെന്ന് മോദി പറഞ്ഞു. ഡൽഹി മെട്രോയുടെ ഉദ്ഘാടനച്ചടങ്ങിലും സോഷ്യൽ മീഡിയ പ്ലാറ്റ്‌ഫോമായ എക്‌സിലൂടെയുമാണ് പ്രധാനമന്ത്രി തന്റെ പ്രതിഷേധം രേഖപ്പെടുത്തിയത്.

മാർച്ച് ഏഴിന് ഡാർജിലിംഗിൽ നടന്ന സാന്താൾ സമ്മേളനത്തിന്റെ നടത്തിപ്പിലെ വീഴ്ചകളിൽ രാഷ്ട്രപതി നേരിട്ട് അതൃപ്തി പ്രകടിപ്പിച്ചിരുന്നു. വേദി മാറ്റിയതും സൗകര്യങ്ങൾ കുറഞ്ഞതും കൂടാതെ മുഖ്യമന്ത്രി മമത ബാനർജിയും മറ്റ് മന്ത്രിമാരും ചടങ്ങിൽ നിന്ന് വിട്ടുനിന്നതും വലിയ വിവാദങ്ങൾക്കാണ് വഴിതെളിച്ചത്. രാഷ്ട്രപതിയെയും ഇന്ത്യൻ ഭരണഘടനയെയും അപമാനിക്കുന്നതിന് തുല്യമാണ് ടിഎംസി സർക്കാരിന്റെ ഈ നടപടിയെന്ന് പ്രധാനമന്ത്രി കുറ്റപ്പെടുത്തി. നാരീശക്തിയെയും ഗോത്രവർഗ സമൂഹത്തെയും ശാക്തീകരിക്കാൻ വിശ്വസിക്കുന്ന എല്ലാവരെയും ഈ സംഭവം വേദനിപ്പിച്ചതായി മോദി പറഞ്ഞു. രാഷ്ട്രപതിയെ ബഹുമാനിക്കുന്നതിന് പകരം വിശുദ്ധമായ ഒരു ചടങ്ങ് ബഹിഷ്കരിക്കുകയാണ് സംസ്ഥാന സർക്കാർ ചെയ്തതെന്നും ഇതിന് അവർ കനത്ത വില നൽകേണ്ടി വരുമെന്നും അദ്ദേഹം കൂട്ടിച്ചേർത്തു. ജനാധിപത്യത്തിന്റെ എല്ലാ സീമകളും ലംഘിച്ച ബംഗാൾ സർക്കാരിനെതിരെ നാരീശക്തി ഒരിക്കലും ക്ഷമിക്കില്ലെന്നും പ്രധാനമന്ത്രി ഓർമ്മിപ്പിച്ചു.എന്നാൽ, പ്രധാനമന്ത്രിയുടെ ആരോപണങ്ങളെ പശ്ചിമ ബംഗാൾ മുഖ്യമന്ത്രി മമത ബാനർജി ശക്തമായി തള്ളിക്കളഞ്ഞു. ബിജെപിയുടെ നിർദ്ദേശപ്രകാരം രാഷ്ട്രപതി രാഷ്ട്രീയം കളിക്കുകയാണെന്നും സംസ്ഥാനത്തെ അപകീർത്തിപ്പെടുത്താൻ അവരെ കരുവാക്കുകയാണെന്നും മമത തിരിച്ചടിച്ചു. വരാനിരിക്കുന്ന നിയമസഭാ തിരഞ്ഞെടുപ്പ് തിരക്കുകൾ കാരണമാണ് തനിക്ക് ചടങ്ങിൽ പങ്കെടുക്കാൻ സാധിക്കാത്തതെന്നും എല്ലാ പരിപാടികളിലും എല്ലായ്പ്പോഴും സന്നിഹിതരാകാൻ കഴിയില്ലെന്നും അവർ വ്യക്തമാക്കി.