ഡൽഹി-മീററ്റ് പാതയിൽ യാത്രക്കാരുടെ ദീർഘകാലത്തെ കാത്തിരിപ്പിന് വിരാമമിട്ടുകൊണ്ട് ഇന്ത്യയിലെ ആദ്യത്തെ റീജിയണൽ റാപ്പിഡ് ട്രാൻസിറ്റ് സിസ്റ്റവും, മീററ്റ് മെട്രോയുടെ ശേഷിക്കുന്ന ഭാഗങ്ങളും പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തു. ഡൽഹിയിലെ സരായ് കാലെ ഖാൻ മുതൽ മീററ്റിലെ മോഡിപുരം വരെയുള്ള ഈ അത്യാധുനിക ഗതാഗത ശൃംഖല പ്രവർത്തനസജ്ജമായതോടെ ഇരു നഗരങ്ങൾക്കിടയിലുള്ള യാത്രാസമയം ഒരു മണിക്കൂറിൽ താഴെയായി കുറഞ്ഞു. ഉദ്ഘാടനത്തിന് ശേഷം മുഖ്യമന്ത്രി യോഗി ആദിത്യനാഥിനൊപ്പം ശതാബ്ദി നഗറിൽ നിന്ന് മീററ്റ് സൗത്തിലേക്ക് പ്രധാനമന്ത്രി മെട്രോ യാത്ര നടത്തുകയും യാത്രക്കാരുമായി സംവദിക്കുകയും ചെയ്തു. ഏകദേശം 12,930 കോടി രൂപയുടെ വികസന പദ്ധതികളാണ് ഇതിനോടനുബന്ധിച്ച് അദ്ദേഹം രാഷ്ട്രത്തിന് സമർപ്പിച്ചത്.

മണിക്കൂറിൽ 180 കിലോമീറ്റർ വേഗതയിൽ സഞ്ചരിക്കാൻ ശേഷിയുള്ള നമോ ഭാരത് ട്രെയിനുകളും, 120 കിലോമീറ്റർ വേഗതയുള്ള മീററ്റ് മെട്രോയും ഒരേ ട്രാക്കിലൂടെ സർവീസ് നടത്തുന്നു എന്നത് ഈ പദ്ധതിയുടെ പ്രത്യേകതയാണ്. ഇന്ത്യയിൽ ഇതാദ്യമായാണ് ഇത്തരമൊരു സാങ്കേതിക വിദ്യ പരീക്ഷിക്കുന്നത്. മീററ്റ് മെട്രോയുടെ 23 കിലോമീറ്റർ ഇടനാഴിയിൽ 13 സ്റ്റേഷനുകളാണുള്ളത്. ഇതിൽ സരായ് കാലെ ഖാൻ സ്റ്റേഷൻ റെയിൽവേ, മെട്രോ, ഐഎസ്ബിടി എന്നിവയെ ബന്ധിപ്പിക്കുന്ന ഒരു പ്രധാന മൾട്ടി-മോഡൽ ഹബ്ബായി വികസിപ്പിച്ചിരിക്കുന്നു. ഇത് യാത്രക്കാർക്ക് തടസ്സമില്ലാത്ത യാത്രാ സൗകര്യം ഉറപ്പാക്കുന്നു.നമോ ഭാരത് ട്രെയിനുകൾ ആധുനിക സൗകര്യങ്ങളാൽ സമ്പന്നമാണ്. ഡിജിറ്റൽ ഡ്രൈവർ കൺസോൾ, പ്രീമിയം കോച്ചുകൾ, സ്ത്രീകൾക്കായി പ്രത്യേക കോച്ച്, മൊബൈൽ-ലാപ്‌ടോപ്പ് ചാർജിംഗ് പോയിന്റുകൾ എന്നിവ ഇതിലുണ്ട്. ടിക്കറ്റിംഗിനായി ക്യുആർ കോഡ് അധിഷ്ഠിത സംവിധാനവും സ്മാർട്ട് വെൻഡിംഗ് മെഷീനുകളും ഏർപ്പെടുത്തിയിട്ടുണ്ട്. ഭാവിയിൽ ഡൽഹി-അൽവാർ, ഡൽഹി-കർണാൽ ഇടനാഴികളുമായി ഇതിനെ ബന്ധിപ്പിക്കാനും പദ്ധതിയുണ്ട്. നഗരങ്ങളിലെ തിരക്ക് കുറയ്ക്കാനും സുസ്ഥിരമായ ഗതാഗത സംവിധാനം പ്രോത്സാഹിപ്പിക്കാനും ലക്ഷ്യമിട്ടുള്ള കേന്ദ്ര സർക്കാരിന്റെ ഈ നീക്കം എൻസിആർ മേഖലയുടെ വികസനത്തിൽ വലിയ മാറ്റങ്ങൾ കൊണ്ടുവരുമെന്ന് വിലയിരുത്തപ്പെടുന്നു.