അമേരിക്കയുടെ കരുത്തിൽ വിശ്വസിച്ച് ഇറാനെതിരെ നീങ്ങാൻ ഒരുങ്ങുന്ന രാജ്യങ്ങൾക്ക് ഇറാന്റെ കടുത്ത മുന്നറിയിപ്പ്! ലോകത്തിലെ ഏറ്റവും നിർണായകമായ എണ്ണക്കപ്പൽ പാതകളിലൊന്നായ ഹോർമുസ് കടലിടുക്കിൽ അമേരിക്കയ്ക്കൊപ്പം നിന്നാൽ എന്തായിരിക്കും സംഭവിക്കുക? സൈനികരെ അയച്ചാലും യുദ്ധക്കപ്പലുകൾ വിന്യസിച്ചാലും സാമ്പത്തിക നടപടികളിൽ പങ്കാളികളായാലും അത് ഇറാനെതിരായ ആക്രമണത്തിൽ പങ്കുചേരുന്നതിന് തുല്യമായി കണക്കാക്കുമെന്നാണ് പ്രഖ്യാപനം. എന്നാൽ ഇത്തവണ ഇറാൻ നൽകിയ മുന്നറിയിപ്പിനെ വ്യത്യസ്തമാക്കുന്നത് അതിനായി ഉപയോഗിച്ച ഒരു കൊറിയൻ പഴഞ്ചൊല്ലാണ്.

‘ഒരു കൊക്കിനൊപ്പം പറക്കാൻ ശ്രമിക്കുന്ന കുരുവി അതിന്റെ കാലുകൾ ഒടിക്കും.’ ലോകശക്തിയായ അമേരിക്കയെ പിന്തുടർന്ന് സംഘർഷത്തിലേക്ക് ഇറങ്ങുന്ന രാജ്യങ്ങൾ സ്വന്തം ഭാവി അപകടത്തിലാക്കുമെന്ന സന്ദേശമാണ് ഇതിലൂടെ ഇറാൻ നൽകുന്നത്. അമേരിക്കയുടെ സഖ്യരാജ്യങ്ങളെ ലക്ഷ്യമിട്ടുള്ള ഈ മുന്നറിയിപ്പ് പശ്ചിമേഷ്യയിൽ പുതിയ ആശങ്കകൾ ഉയർത്തുകയാണ്. അന്താരാഷ്ട്ര മാധ്യമമായ വാന ന്യൂസ് റിപ്പോർട്ട് ചെയ്ത ഈ സംഭവം ഹോർമുസ് കടലിടുക്കിലെ സംഘർഷം കൂടുതൽ രൂക്ഷമാകുമോ എന്ന ചോദ്യവും ഉയർത്തുന്നു.

ഇറാൻ വിദേശകാര്യ മന്ത്രാലയ വക്താവ് എസ്മയിൽ ബഗായിയാണ് അമേരിക്കയുമായി സഹകരിക്കാൻ ആലോചിക്കുന്ന രാജ്യങ്ങൾക്ക് മുന്നറിയിപ്പ് നൽകിയത്. ഹോർമുസ് കടലിടുക്കിലെയും പശ്ചിമേഷ്യയിലെയും സാഹചര്യങ്ങളിൽ ഇടപെടാൻ അമേരിക്ക ചില രാജ്യങ്ങൾക്കുമേൽ സമ്മർദം ചെലുത്തുന്നതായുള്ള റിപ്പോർട്ടുകളോട് പ്രതികരിക്കുകയായിരുന്നു അദ്ദേഹം. സാമൂഹികമാധ്യമമായ എക്സിലൂടെയാണ് ഇറാന്റെ നിലപാട് വ്യക്തമാക്കിയത്.

ഒരു കൊക്കിനൊപ്പം പറക്കാൻ ശ്രമിക്കുന്ന കുരുവി അതിന്റെ കാലുകൾ ഒടിക്കും.’ കൊറിയൻ പഴഞ്ചൊല്ല് ഉദ്ധരിച്ചുകൊണ്ടായിരുന്നു ബഗായിയുടെ പ്രതികരണം. ശക്തരായ രാജ്യങ്ങളുടെ നീക്കങ്ങളെ അനുകരിച്ച് സ്വന്തം ശേഷിക്കപ്പുറമുള്ള സംഘർഷങ്ങളിൽ ഇടപെടുന്നത് അപകടകരമായ പ്രത്യാഘാതങ്ങൾക്ക് വഴിയൊരുക്കുമെന്ന മുന്നറിയിപ്പാണ് ഇതിലൂടെ ഇറാൻ നൽകുന്നത്.ഇറാനെതിരായ അമേരിക്കൻ സൈനിക നടപടികളിൽ നേരിട്ടോ അല്ലാതെയോ പങ്കാളികളാകുന്ന രാജ്യങ്ങളെ ആക്രമണത്തിൽ പങ്കെടുത്തവരായി കണക്കാക്കുമെന്നാണ് ബഗായിയുടെ പ്രഖ്യാപനം. നാവികസേനാ കപ്പലുകൾ അയയ്ക്കുന്നതും സൈനിക ഉപകരണങ്ങൾ ലഭ്യമാക്കുന്നതും സഹായ ഉദ്യോഗസ്ഥരെ വിന്യസിക്കുന്നതും ഇതിൽ ഉൾപ്പെടുമെന്ന് അദ്ദേഹം വ്യക്തമാക്കി.

സൈനിക ഇടപെടലുകൾക്ക് പുറമെ ഇറാനെതിരായ സാമ്പത്തിക സമ്മർദങ്ങളിലും സഹകരിക്കുന്ന രാജ്യങ്ങൾ ഉത്തരവാദിത്തം ഏറ്റെടുക്കേണ്ടിവരുമെന്നാണ് ഇറാന്റെ നിലപാട്. അമേരിക്കയുടെ ഇത്തരം നടപടികളെ ‘സാമ്പത്തിക ഭീകരത’ എന്നാണ് ഇറാൻ വിശേഷിപ്പിക്കുന്നത്. അന്താരാഷ്ട്ര നിയമങ്ങൾ ചൂണ്ടിക്കാട്ടിയാണ് ഇറാൻ മുന്നറിയിപ്പ് ശക്തമാക്കിയിരിക്കുന്നത്. ഐക്യരാഷ്ട്രസഭയുടെ ചാർട്ടറിലെ ആർട്ടിക്കിൾ 2(4), യുഎൻ പൊതുസഭയുടെ പ്രമേയം 3314 എന്നിവ പരാമർശിച്ച ബഗായ്, ഇറാനെതിരായ ആക്രമണാത്മക നടപടികളിലുള്ള സഹകരണം അന്താരാഷ്ട്ര നിയമലംഘനമാകുമെന്ന് വാദിച്ചു. എന്നാൽ ഏതൊരു പ്രത്യേക സൈനിക നടപടിയും നിയമവിരുദ്ധമാണോ എന്നത് അതിന്റെ സാഹചര്യങ്ങളും അന്താരാഷ്ട്ര നിയമങ്ങളും അടിസ്ഥാനമാക്കിയാണ് വിലയിരുത്തേണ്ടത്.

ഹോർമുസ് കടലിടുക്കിലെ കപ്പൽഗതാഗതം സംരക്ഷിക്കാനെന്ന പേരിലോ കടൽക്കൊള്ള തടയാനെന്ന പേരിലോ നടത്തുന്ന നീക്കങ്ങൾക്കും ഇറാന്റെ മുന്നറിയിപ്പ് ബാധകമാണെന്നാണ് ബഗായിയുടെ നിലപാട്. ഇത്തരം പേരുകൾ ഉപയോഗിച്ചതുകൊണ്ട് ഇറാൻ ശത്രുതാപരമെന്ന് കണക്കാക്കുന്ന നടപടികളുടെ സ്വഭാവം മാറില്ലെന്നും അദ്ദേഹം വ്യക്തമാക്കി.ലോകത്തെ എണ്ണവ്യാപാരത്തിന്റെ നിർണായക ഭാഗം കടന്നുപോകുന്ന ഹോർമുസ് കടലിടുക്കിലെ സംഘർഷങ്ങൾ അന്താരാഷ്ട്ര വിപണികളെയും ബാധിക്കുമെന്നതിനാൽ ഈ മുന്നറിയിപ്പിന് വലിയ പ്രാധാന്യമുണ്ട്. മേഖലയിലെ സൈനിക നീക്കങ്ങൾ വർധിച്ചാൽ ഊർജവിതരണത്തിലും കപ്പൽഗതാഗതത്തിലും ആശങ്കകൾ ശക്തമായേക്കാം.

അമേരിക്കയുമായുള്ള ഉഭയകക്ഷി കരാറുകൾ ചൂണ്ടിക്കാട്ടി അന്താരാഷ്ട്ര നിയമപരമായ ഉത്തരവാദിത്തങ്ങളിൽനിന്ന് ഒഴിഞ്ഞുമാറാൻ ഒരു രാജ്യത്തിനും കഴിയില്ലെന്നും ബഗായ് മുന്നറിയിപ്പ് നൽകി. ഇറാന്റെ മുന്നറിയിപ്പ് അമേരിക്കയ്ക്കു മാത്രമല്ല, വാഷിങ്ടണുമായി സഹകരിക്കാൻ തയ്യാറെടുക്കുന്ന എല്ലാ രാജ്യങ്ങൾക്കുമുള്ള സന്ദേശമാണ്. ഹോർമുസിൽ അമേരിക്കയുടെ നീക്കങ്ങൾ ശക്തമാകുമോ? അതോ ഇറാന്റെ മുന്നറിയിപ്പ് കൂടുതൽ രാജ്യങ്ങളെ ഇടപെടലിൽനിന്ന് പിന്തിരിപ്പിക്കുമോ? പശ്ചിമേഷ്യയിലെ അടുത്ത നീക്കങ്ങളാണ് ഇനി നിർണായകമാകുക.